Tathun Kahiu

Metuh huran oloh melai ngaju malan manana kejau bara lewu tame akan bentuk pulau kayu kanih tau ije andau-andau tanjung kakejau mawi oloh helo te are masan bagawi malan. Kutelah cara oloh helo malan, memang tege kea je tukep tana dengan lewu je nangkuli bara lewu tapi ware je kejau tana gawi mangguang eka petak je subur. Kute kea dengan ije kabali jite je haru kawin laka telo bulan te ewen due manyangit malan manana hong bentuk himba kanih.

Kilau kare panganten taheta ewen due belom bahagia, pajuk pai kana duhi nyamah pasut parut bana gawi kacinta palus umah mananjung hong padang himba je benyem te. Sawa te puna bawi je bahalap hong lewu puna ware oloh hatur handak baya jatun je cucuk angat sana supa dengan bana te kilenkah sana ie maku narima ie maja misek akan huma, mungkin kana rayu bua Lepu atawa bua Rimbang je pasti jitelah jodoh jadi akae.

Sana jadi due telo bulan ewen hinje bana te oloh hatue je paham kabehu. Isut-isut ngabehu hayak purah mawi sawa, melai bentuk pulau kayu je ngabehu palingan kare bakei, beruk, kahiu ih. Sawa oloh bawi je sabar aluh rancak awi tuntang nampar mawi kare kembang moa'o bau mata. Jite ara sawan are je bahalap nampa-nampa kapapa mungkin tege je beken herah dia itah katawa kea. Biasa je rajin kalute hapa oloh hatue manutup kasala dengan sawa, kute kea dengan oloh bawi biasa tege-tege ih gau kasala bana.

Dia eleh jite bana te sakalinya oloh hatue je mahaga panyakit kadian kea, ie te tege eka kasala je nyahuka. Baya rajin parasih bau mata ih gawi, babuah melai parak kayu tau naksir bawi kare Bakei, Beruk, Kahiu gita hatue bakena. Handak takeleh sawa bagawi tarus bana je ware alasa dumah kare kahaba sangiang dewa budas, jite sabab gawi bana katawan eka kelemahan sawa. Hong kueh eka tege kanahoang hong hete kea eka kelemahan kutelah sabab sawa ware mangkeme pehe atei belom dengan bana te. Handak ie hatulang bahali angat, handak ie maningak kutuh-kai awi bana je sama purah muhun lenge. Kuan oloh helo amun oloh hatue atawa bawi je tamam dengan kabali dengan oloh beken balalu mana ampi ih oloh denga gawi sabab nihau percaya diri jadi, oloh je percaya diri je tau hai te gawi ie cinta dengan kare anak sawa, tunda kula, petak danum, lewu huma.

Kilenkah metuh ewen due buli bentuk andau bara tana sama heka-heka kea kambapi hapa mampelom Apui ewen due te lepah, maka tanjung due jam bara pasah ewen te haru sampai akan lewu kanih. Bana je bakulas te balalu hamauh dengan sawa te.

"Coba ikau ndi akan lewu kanih laku Apui helo akan kue, aku darem-darem angat bitikuh toh lagi" kuan bana umba sawa te.

"Iyoh ka" kuan sawa balalu haguet balua huma te.

"Ela lalau tahi ndi amun tau laku kare bari balut bara lewu aku balao kanaikuh toh" kuan bana hindai.

"Iyoh ka" kuan sawa nanjung tame akan jalan panda kare upun kayu te.

Kare batang kayu je are hai mawi derem upu bawala managat ih nanjung hong penda kayu te. Tanjung-tanjung bawi te marak kikeh-kikeh angat atei hong padang himba je benyem kute hayak peteh bana dengan mawi ie laju-laju ih mananjung. Laka ije jam tajung jalana te jadi into helat lewu dengan pasah sana rik-rak kare edan kayu barapak sawuh dia gitan banda sabab, maka cuaca dia kare hariwut narai. Ancap ie nyahukan akan balikat baner kayu je hai ie penasaran narai taluh je gawi kute te. Umbet krih-krah auh melai penda kayu te, penasaran angat rangkah-rangkah ie manjenguk bara balikat baner te. Tarewen tutu ie nanture tege due kungan Kahiu je kanjera kalahi dia lalau kejau bara eka nyahukan te, mik-mak sinde due kungan Kahiu te kalahi dia kanarai kalihai ampin ewen due te. Mawi bawi jite mikeh tutu nanture handak ie bundur handari bara hete buli akan pasah jelas gitan ewen due kahiu te tau nekap misak ewen due, handak ie naharep mandari jelas jite ie beken tandingan kahiu je due kungan te je kanjera kalahi.

Kahiu je tege kalahi te sama kilau kahain kalunen kea hayak pendeng sama kilau kalunen kea baya bau mata je puna Kahiu. Tahi bawi jite nantuani Kahiu je kalahi te dia puji ie nampayah Kahiu je kahai te hong pulau kayu te hayak beken ampi jenis bara Kahiu je biasa. Kahiu te laya kalahi umbet ije mamukul ije males baleh hindai mukul hila ije hindai sambil mambaleh sama jatun ati je kana. Kanatek kahiu te tau nangkeru akan hunjun kuluk musuh sambil mangkijak kuluk musuh tapi musuh sama lihai kea manarik biti akan penda sambil mangian biti mangejau bara musuh te.

"Kayah marapus gawi metu toh" kuan Bawi te hamauh hong atei marak kanai je jadi balao.

Kahiu jite dia hakun ranai kalahi, dumah kua garak biti ewen due dia gitan dumah kua lambat sama kilau bangang.

"Jadi kea aku toh tangkeng hetuh gawi ewen due toh" kua Bawi te mamikir arep.

Kahiu je rami kalahi te macam-macam ampi garak biti, umbet nangkeru mahila maju-bundur sambil-gantau sinde ampi ewen due te kalahi. Dawen kayu je melai petak rancak bahambur tarawang gawi kana riwut pukulan ewen due ampi, kute kea amun ije mampalua pukulan sambil nangkeru bahambur dawen kayu belom dengan kare pating kana riwut pukulan ewen te.

Sasar tahi bawi te nanture Kahiu je kalahi te sasar rami ampi gita tuntang bahalap ampin garak Kahiu te ampi je hapa hayak ganjil kea. Sasar tahi ie nanture sasar jelas ie nampayah garak te isut tutu ampi haguet biti mahila pukulan musuh kute kea je ije te isut-isut ih ampi garaka tuntang tege-tege ampi eka membaleh mamukul musuh hindai. Gawi aneh hayak rami ampi kahali Kahiu te balalu laya dia bingat hindai lao kanai te, dia sadar ie pai lenge umba panca-pancae kea malei likut baner te, gagiren kea nanture ampin garak biti kahiu je buah ampi te. Dia ie sadar ie jadi umba manumun garak Kahiu je kalahi te mik-mak kabuat melai balikat baner kayu te sambil hamauh hong atei kakutuh-kakai angat je puna tutu tege musuh kalahi.

Dia kerasaan andau sana halemei tukep sanja jadi, due kungan Kahiu te balalu umbet kalahi tuntang tau hakutak kalunen.

"Bara bihin kue hancuba puna saimbang tarus" kuan ije kungan Kahiu hakutak.

"Tapi kareh ikau kalah awikuh" kuan ije Kahiu tumbah.

"Amun aku masih barigas tatap kutuh-kutuh ih itah due" kua hindai.

"Bujur kea kuam, baya oloh je jadi nanture kue toh ih kareh tau marangkum pukulan kue" kuan je jite hamauh.

"Iyoh tutu kuam. Hayak pasi kea ie te gitangkuh rancak buah awi bana melai huma" kuan je ije te.

"Pas ih ara amun kute" kua dengan kula te.

"Mahi tagangu jalana gawi kue basingi tutu bana huma kanih denga toh" kuan ije tumbah.

"Dia masalah ih jite. Amun kutuh ampi handak permisi ih helo" kua ije jite balalu lilap baya tege hagarak isut dawen kayu melai lawi kanih.

"Iyoh aku gin buli kea" kua ije je jadi hayak lilap endau tisa suara je tapelai.

Karas angat bawi te manggau pandari ewen due te je baya tege riwut kute manguet dawen kayu dia gitan hindai metu. Sana jadi mangkeme aman hong hete haru bawi te balua bara balikat baner te balalu mananjung laju-laju akan lewu labih pas nyewut hadari mancoba manumun cara metu te hadari, aluh dia ie nanture ie mananterap ih tapi puna laju kea ie hadari laka lime lawas menit sampai ie akan lewu. Balalu ie akan huma oloh bakas balaku kambapi tuntang kuman helo haru balaku kare bari balut akan bana je hong pasah tana kanih.

Hong pasah bana gelisah hayak rahas tutu angat dengan sawa te.

"Kuan itah hanjulu malahan natumba patahi are, jatun beken gawi toh pasti pacaran ih dengan oloh lewu kanih" kua ngarunum kabuat hong pasah te.

Sambil munduk menter entah narai je mikir,.

"Kareh ah akae keme aku mahewes akae ie toh buli huma dia hadat katahi kutuh jatun beken ih gawi toh pasti lagi masawe ih" balalu hingkat ie manduan tetek kayu je sandang kea kambu balalu andak balikat atep te.

Dia lalau tahi sana tege sawa mantehau bara baun pasah kanih.

"Oh ka" kuan sawa mantehau ie.

"Oi ndi" kuan bana balalu hingkat manambang akan baun batunggang. "Tege imbitmuh kare bari panginan akangkuh nah?" Kuan bana kilau je dia basingi ih ampi.

"Tege ih toh" kua sambil manunjuk hong lontong je etu.

"Balao aku jadi ndi" kuan bana.

"Leha je dia basingi ampi banangkuh sinde toh" kuan sawa hengan bapikir nanture bana je hubah ampi dia kilau je ngira sulak.

"Aku gin balao kea nah ka" kuan sawa balalu lumpat akan huma tame mahalau batunggang. Bana je melai baun batunggang sulak manuntut sawa tame akan huma kea tuntang balalu manduan tetek kayu je nyadia balikat batunggang te jadi.

Metuh sawa laya ngalikut ie gawi tame huma hong hete ie balalu mahewes hapa kayu te akan takuluk sawa. Sawa je jadi tege supa ilmu silat bara Tathun Kahiu te biar dia ie nanture oloh mawi baya hining riwut pukulan te balalu suntup ie mahila tuntang mamukul barangai akan likut kana kanain bana balalu tambalang due telo depe balua bara huma te, tuntang tetek kayu je hapa mamukul sawa talapas bara lenge.

"Kilen mawi ikau ka?" Kuan sawa je jadi malekak lontong melai laseh te manalih bana je munduk melai petak sambil mimbing kanai.

Bana je isut dia manyangka sampai kute kagancang pukulan sawa je balemu ampi te, bana mangira jite baya kasalan tehnik endau metuh handak mamukul sawa. Sana sawa tukep handak mandohop ie balalu ie mangkat lenge nampeleng takuluk sawa hindai, tapi salenga ih sawa te manekap lenge tuntang capat tutu mangunci ie mawi mangketong biti melai petak gawi sawa.

"Narai kasalangkuh ka je awim tarus aku?" Kua sambil mambangkui bana te.

"Lekak aku ndi" kua laku asi-asi sinde lekak gawi sawa ih ie gawi masi.

Tapi sana lekak ie haluli manampar baun sawa hindai, sawa baya mahila isut ih balalu mambaleh mamangkut bana hayak mambaset pai bana te mawi bana balihang akan petak rangkah ih gawi sambil mangkut sawa biti mahakan tahampas takuluk bana. Tuntang ngunci gawi sawa kadue lenge akan likut hapa sapak sambil mukung likut bana je pangabehu te. Hong posisi kute mangat ih lenge te mudar baun bana akan petak atawa mangapek tapi ie dia maku gawi te. Sasar bagasak bana sasar segah ie mangunci lenge bana te mahakan balapas, biar kilen ampi kagancang amun je due lenge bakunci akan likut melai hunjun sapak sawa karas lenge handa mangutip kahang sawa te.

"Melek kuh amun masih badungil mawi aku" kuan sawa sambil tawe-tawe ih munduk melai likut sambil manekap lenge bana sambil angkat isut mangat bana kanatawan kamangat sawa amun handak mamelek lenge te.

"Ampun ndi. Pelek lengekuh toh" kuan bana ancap balaku ampun kamea angat kapehe tuntang puna dia olih malawan hindai.

"Melek ih ka gawi lengem toh baya tau mawi aku ih" kuan sawa sambil hureh-hureh ih denga.

"Aku terai ndi mawi ikau hindai" kuan bana balaku asi-asi sinde.

"Yelah ka, narai jaminan amun ikau mawi aku hindai ka" kua balemu ih auh tapi sambil mambet lenge bana isut-isut akan likut.

"Ampuuun... ndi.."

"He auh kaka dia aku melek lengem kea nah ka" kuan sawa balemu ih denga jatunti kare sangit auh sama kilau hureh malah labih romantis haream auh.

"Tau ikau melek lengekuh ndi amun kaka mawi ikau hindai" kua bajanji.

"Janjilah ka, ela nanjaru aku hindai"

"Iyoh kaka janji ndi" kua.

Balalu sawa malapas kunci te tuntang mamangkut bana.

"Aku sayang tutu dengam nah ka" kua hamauh tukep punding.

"Iyoh aku sayang kea dengam"

"Tapi buhen kaka handak mancatok aku endau?"

"jite... jite.."

"Jite gawi ikau sayang dengangkuh nah lah ka, sampai ikau je handak macatok aku kute? Amun kaka kute cara manyampai angat sayang akangkuh tau balehkuh kilau endau hindai cara andi mambaleh kasayang andi dengan kaka. Ji kueh mangat je kilau endau atau je kilau kutuh ka?" Kuan sawa sambil mahukup bana je mahingkep melai petak te.

"Je... je... aku balao tutu kanaikuh ndi" kuan bana.

"Hingkat akan huma tege ih bari balut hete imbitkuh endau" kuan sawa je tatap menyet ie melai likut.

"Nampi je ikau kilau kutuh" kuan bana.

"Ae narai mawi bihin etum ih aku pire ati ehat bitikuh nah ka, beken ikau dia olihkuh metu" kuan sawa hamauh tukep pinding.

"Babuah ih bahaikuh mikeh ikau bajatu nyewutmuh aku hindai mawi ika kareh" kuan bana balalu hingkat rangkah.

"Jamen ih palingan melekkuh lengem mawi aku" kua sambil manyium pipi bana.

****

"Eweh majar ikau kalahi nah ndi?" Kuan bana misek metuh jadi hanjewu andau hindai.

"Ye aku tulak akan lewu nyuhum male nah melai benteng jalan sana supa dengan tathun Kahiu je kalahi melai bentuk jalan kanih. Tahi ewen due te kalahi mawi aku lambat mimbit bari balut akan kaka" kua sawa denga.

"Jadi kilen ampi hindai sana ikau tau kalahi te ndi?" kuan bana denga hindai.

"Ye kute ih kesah" kuan sawa lepah sarita akan bana.

Kutelah pahari kesah asal silat Bangkui kuan oloh manyewut ara hindai into kueh bawi jite akhir jadi guru silat je terkenal, sampai pire-pire batang danum oloh are dumah baguru denga. Ware murid bahambur bara ngaju-ngawa sampai tege je dumah bara sila tasik kanih balajar silat Kahiu denga te.

Ikas toh helo sarita je inyampaikuh akan itah melai hetoh, ampun maaf amun are kakurangankuh hong manulis tuntang hakutak hong hetuh.

Iyarita Awie: S S