Atulah kesah.
Kesah jaman huran.
Batu Banama to benteng Rungan.
Hetelah belom.
Je biti balu.
Ije bahalap batuah tutu.
Dagang tamuei dia mahalau.
Denganlah balu pasti hasundau.
Manumun kesah.
Kesah jaman helo.
Hetelah belom je biti balu
Kutelah auh lagu huran.
Batu Banama hong benteng Rungan.
Kaleka Bawi kuwu je nyahukan.
Hong Bukit Tangkiling palus wayah tuh tau gitan.
Belom hong Palangka rugi amun dia puji mandai bukit Tangkiling, labih rugi hindai amun dia puji mahining bukit Tangkiling. Bukit Tangkiling puna balua bara kota Palangkara tapi dia lalau kejau kea jaka je nanjung hapa pai paling tahi ije puntung andau sampai tapi amun je are eka tende hindai tau je due telo andau mahi amun tende laka pal ije due dia olihkuh mikira je kute (hehe).
Amun andau-andau libur rami kawan tabela bawi hatue hong hete, baya ije ih petehku amun ketun mandai bukit Tangkiling te ela gawi je sewek-sewek, tau supa kakicas amun sewek-sewek gawi hete. Gawi hong hete tege sarita je terkenal kea, into kueh hong sarita te tege tulah. Hubungan asmara indu dengan anak je dia sengaja je mawi murka Hatalla balalu nyaluh jadi batu Banama.
Hong hetuh aku nampara mambuka sarita je supakuh bara oloh bakaskuh metuh katabela. Hong ije lewu saran batang danum Rungan te tege ije biti bawi kuwu, je bahalap dia baputi bahenda ampin pupus upak hayak malisen ganing ampi tanda sehat. Oloh je jadi bawi kuwu dia ie bawi sambarangan disamping bau mata bahalap atei kea bahalap, tuntang bara kakurik oloh bawi te tarus balajar melai hong huma biasa melai Betang oloh mingkes bawi kuwu te hong kamar khusus. Dia ie asal ngurung je bawi kuwu te tuntang limbah mahalau banyelo-nyelo haru sampai tarap jadi bawi kuwu.
Kute kea dengan bawi kuwu je melai Tangkiling toh tentu ie bara kakurik kea ie jadi ngurung balajar jituh jite kare kataun bara uras kare keluarga tame kare bangkui main. Kutelah je bawi kuwu mawaris kare pangatawan tuntang kataun kare tunda kula sampai ie tamat haru tau nyewut bawi kuwu arae. Kutelah bawi kuwu je into Tangkiling kea jadi sukup kare sakula haru ie balua, dia kanarai kahalap ampi bau mata sampai terkenal akan pire-pire batang danum kecantika.
Bawi kuwu jite are oloh mippen pire-pire hatue je dumah maja misek ie mimbit kawin tapi hindai masih supa angat je cucuk kutelah angat bawi kuwu te. Mawi sasar ware hatue je pensaran sampai akan pinding ije biti saudagar balalu tatarik kea handak coba nanture tuntang malamar bawi kuwu je terkenal kahalap hayak kapintar. Balalu saudagar te murik batang danum Kahayan mimbit ije biti oloh akan petunjuk jalan tuntang sambil tende bajualan kare piring mangkok jitelah dagangan. Kemungkin pedagang te oloh bara tiongkok je mimbit piring balanai malawen akan eka itah toh huran ie te kabali bawi kuwu je into Tangkiling te huran. Jite baya pemikiran ayungkuh harian malalus ampi kare kanyataan bahwa itah puna dia tau nampa barang malawen te bara huran, jadi aku manaksir ie te diantara oloh te je mimbit malawen huran.
Singkat sarita saudagar te sampai kea akan Rungan. Tende hong lewu bawi kuwu kutelah tujuan gawi mahining kahalap hayak kapintar je bahalap bawi kuwu dia ie pander puang metuh saudagar te nanture dia hakirep mata nampayah bawi mananjung akan batang.
"Kalunenkah atawa bidadari jituh" kutelah saudagar te hamauh hong atei mawi keang balengkung nanture kahalap bawi kuwu jite.
"Nampi saudagar kuam?" Kuan oloh je magah ie te misek.
"Puna tutu bahalap dia ie auh tanjaru ampi" kuan Saudagar te tumbah denga sana bawi kuwu jadi buli akan huma.
Ewen melai kapal te balalu matur kare rancana maja misek bawi kuwu jite mudahan narima. Kutelah kaharap saudagar te bahanyi balepah kare juala amun bawi kuwu balaku kute denga. Sebagai penghubung ie je mamander helo balalu maja akan huma bawi kuwu. Bapander dengan oloh bakas je tempun anak mikeh jadi tege je jadi oloh beken narima ewen. Mahining je masih jatun balalu mambuka pander beken mansanan rancana saudagar kapal je handak maja misek bawi kuwu te helo mangat amun jadi siap balalu saudagar te lumpat akan huma te mangat mangat nahiu hatature bau, kutelah je sanan gawi utusan saudagar te dengan oloh bakas bawi kuwu.
Ikei je bakas narima uras tagantung bawi kuwu je mamutus hindai gawi ikei je bakas dia tau mamaksa amun bawi kuwu kua sana dia. Kute kuan oloh bakas huma mamander akan utusan saudagar kea, keleh saudagar maja akan huma mangat bawi kuwu tau hatanture mata. Utusan saudagar balalu permisi muhun mansanan peteh ewen akan saudagar helun mangat saudagar mamikir amun hakun kutelah kuan utusan saudagar sambil muhun.
Mahining je kute saudagar balalu manyadia arep, baju pakaian je bahalap tuntang minyak harum gosok melai baju pakaia mangat bawi kuwu naksir denga. Sana jadi siap ewen balalu tulak maja misek bawi kuwu kutelah kutelah tujua je sampai lewu te ie bajualan. Saudagar jite je bajenta hayak bakena tuntang tatau kea, dia ati kasala amun bawi kuwu narima jadi sawan saudagar je puna bakena.
Sampai huma bawi kuwu ewen palus munduk bapander basarita ampin tujuan je sampai akan huma maja misek bawi kuwu kutelah kahimat. Bawi kuwu umba manyeneh kea sambil nampayah saudagar je bakena gagah hayak bajenta mawi atei tatarik kea dengan saudagar je kaya raya. Saudagar balalu mansanan bahwa ie handak manduan bawi kuwu akan sawa, baya pendapat indu dan bapae bawi kuwu je mamutus manarima atawa dia.
"Nampi kuam nak, saudagar toh maja misek handak manduan ikau akan sawa kua?" Kuan Indu misek denga.
"Iyoh ih amun je kute mai, aku narima ih amun je jadi bujur buah kutuh" kuan bawi kuwu tumbah balemu tapi jelas suara te je balua bara nyama.
"Iyoh ih amun je kute mangat itah matur rencana akan pangawin ketun due ih hindai" kuan bapa umba hamauh kea.
Balalu Saudagar te nyadia kare paramu tuntang palaku bara bawi kuwu te. Dia lalau bahali akan saudagar te manggau gawi ie puna ware paramu panatau je imbit ngawa ngaju kare palaku bawi kuwu hanjalu ih ie dinu. Balalu matur andau pesta tuntang marawei oloh pire-pire kalewu, sapi hadangan nyambalih akan pesta je hai tutu pangawin bawi kuwu dengan saudagar je bakena hayak bajenta sampai telo andau kutelah acara. Pesta je hai oloh are dumah dengan are alasan oloh are handak nampayah kabalin bawi kuwu je saudagar je bara laut pandumah. Kutelah ampin pesta ilalus buah-buah sampai lepah bahalap uras hakalurui kilau rencana ewen palepah.
Andau-andau baganti minggu, baganti bulan sampai ije nyelo bawi kuwu manak ije hasil ewen due manambah kasanang atei ewen te. Anak ewen hatue je bakena nangare Tang gawi bapae te oloh she Tang. Anak Tang puna lucu hayak baputi bakena dia kilau oloh lewu lincah harati ampi matuh te umur jadi ije nyelo.
Tambah nyelo anak Tang sasar hai bangang busik dengan kare kawala rami-rami. Kanjera kadungil anak oloh metuh kalute metuh te umur manjalan lime. Dari-daria kutelah kabangang Tang hapus huma lewu dengan kare kawalan mawi bawi kuwu tau rahas denga baya bapae rancak mambela.
Hong ije hanjewu andau tege tisa bari alem endau hindai lepah kinan bawi kuwu mikir amun nganan je masih bahalap jitenah sayang balalu nyanga akan panginan. Puna mangat je bari basanga mahi amun kinan dengan oloh tercinta baya kadungil anak Tang te kea ngaraen indu balaku bari basanga.
"Kareh hindai masak masih" kuan bawi kuwu dengan anak te.
"Isut ih nah mai" kua sambil magutil lenge indu.
"Kareh kea balasut toh nah" kuan indu denga.
"Jamen ih balasut tahan ih aku" kuan Tang sambil manggutil lenge indu je mimbing suduk hapa mangurah bari melai rinjing te.
"Ela manangis kareh ikau balasut toh nah" kuan indu masih tarus mangurah bari te.
"Dia kua" balalu manjuju lenge akan rinjing je kanjera kalasu te, narai atie ie tangis tangkariak tatekap rinjing je balasut te. Indu je laya matur bumbu akan balut te jadi tarewen hayak rahas dengan anak je dia tau ningak te. Marak angat kacewa atei te sana talekas lenge je mimbing sodok mancatok takuluk anak ayue te.
"Bada'i ih je anak oloh laut dia kasene kuan oloh je 'ela' jadi" kuan sambil mancatuk sodok te, bawi kuwu je jadi puji mamal kaji patua te biar rangkah ampi macatuk tapi puna bapuat mawi anak badaha kuluk kana lawin sodok te.
Mangkeme je catok indu kute anak Tang balalu hadari balua huma manalih bapa je melai kapal hong ngiwa sambil manangis mansanan indu je mancatok takuluk te kea. Bapa je lagi deruh matur jualan dagang handak masuh akan tumbang, nanture anak je dumah manangis sambil mimbing kuluk je badaha te balalu tarewen sambil hamauh.
"Hambuen mawi ikau anak Tang?" Kuan bapae balalu nangkeru akan pelabuhan manalih anak je kasayangan.
"Aku catok umai hapa sodok nah pa" kua malapor akan bapae sambil manangis.
"Hau kilen je kute auh ketun due indum, yo itah akan huma ih helo" kuan bapae balalu metun anak buli akan huma te. Sampai huma anak te balalu tujah gawi himang te pas kana kalaguet, balalu bapa nanture tuntang marawat anak ayue hatue jite. Sambil marawat ie misek dengan sawa.
"Hambuen ndi ikau mawi anakkuh kutuh?" Kua tenang ih dengan sawa bawi kuwu te.
"Ie je jajuan manderuh aku nah ka, lepah kea angat kasabarkuh endau. Buhen mawi ie?" Kuan bawi kuwu te misek nanture anak ewen te je tujah nyangka kare tahampas laka batang ngiwa enah.
"Catokmuh hapa sodok kua endau mawi ie je tujah toh" kuan bana denga.
"Tapi rangkah ih mancatok ie endau nah ka" kua sambil nanture himang anak te.
"Dia aku manyala ikau kea ndi amun je dia sengaja kea, coba ikau duan minyakkuh melai balikat batunggang hete" kuan bana dia maku hatumba taluh je jadi keleh ancap natamba bara hakaridu kutelah bana te marima hindai, amun mitung hapa angat kasangit dia olih menyelesai masalah malah nambah masalah maka tau.
"Toh ka" kuan bawi kuwu manjuluk kasa bara kare cupu, bakam batampung jadi penyang. Balalu bana manduan tuntang mukei ije bakam kalialang eka sarangan minyak bintang balalu uhus melai himang kuluk Tang mangat jeleng keleh kare himang.
Limbah jadi uhus minyak bintang bana hamauh dengan bawi kuwu mansanan arep handak satiar akan laut helo manggau barang jualan je imbit akan ngaju. Rencana jite jadi ije bulan helo jadi nahiu baya andau te ie mingat hindai akan bawi kuwu bahwa anak ewen te imbit malaut andau jewu mikeh hakaridu tarus dengan indu.
"Pire katahi ikau akan laut nah ka?" Kuan bawi kuwu misek bana hindai.
"Dia tentu kea amun jadi sukup taluh je inggaukuh te aku buli akan hetuh ndi" kuan kabali te denga.
"Handak angatkuh umba nah ka" kua sambil nanture.
"Melai laut hai galombang are bahaya je tau mantakan keleh andi manunggu melai huma gawi jalanan kaka are bahaya" kuan bana manjelas akae hindai mahi amun tege oloh bawi bahalap je umba mawi sasar ware oloh je mippen hal jite capat marawei bencana.
Bawi kuwu mamikir tuntang marima bujur kea je kuan bana, amun ie sampai umba kea baya manyusah jalanan akae. Paksa bawi kuwu bakalah akan kahalap ewen palepah baya anak Tang imbit bana umba hayak mangat balajar jadi pengusaha. Kutelah bana manjelas akae jatunti maksud mamisah handak sawa dengan sanang kea atei bawi kuwu manarima alasa je tame akal tuntang dia basingi ampin bau mata.
Asal bawi kuwu dia maku kea malapas anak Tang akae.
Tapi gawi alasan je bahalap akan anak kea.
Mangat tau sakula hong kerajaan Tiongkok cina.
Mangat mimbit kaharati buli akan huma.
Kutelah bana manjelas akae.
Dengan babehat angat atei bawi kuwu malapas.
Anak je tunggal umba bapae marantau.
Akan Tiongkok kanih kutehlah tujuan.
Nyakula Tang hong lingkungan kerajaan.
"Iyoh ih amun je kute" kuan bawi kuwu balalu nyadia paramu anak je jadi umur lime nyelo umba bapae namuei akan laut negeri Tiongkok kutelah tujuan je nuju.
Hanjewu andau ewen nampara haguet, bawi kuwu magah bana dengan anak sampai pelabuhan hete. Marak hong atei dia karuan angat pangkeme mudahan Hatalla malindung ewen due je tulak namuei te. Kutelah bawi kuwu badoa hong atei mudahan jalan je bahalap ije inetei tuah rajaki hai manggatang utus ikei kutelah haraf bawi kuwu hanjewu halemei.
Baminggu-minggu babulan-bulan palus balua batang danum Kahayan, ewen balalu matur jalanan akan negeri Tiongkok kutelah tujuan. Babulan-bulan ewen melai kapal kadang tende melai lewu oloh manggau danum batawah tuntang manggau pahata panginan ewen hong laut te. Ije nyelo jadi ewen melai laut balalu sampai akan tumbang batang Kuning hong Tiongkok metuh katika jite jaman dinasty Tang raja masih tukep hurui dengan banan bawi kuwu. Sana sampai akan petak ewen langsung manaharep raja Tang metuh te, maharaja dinasty Tang narima ewen te misek kabar bara banan bawi kuwu je haru buli namuei bara ngaju.
"Narai kabar toh?" Kuan maharaja misek ie.
"Kabar bahalap ih baginda, baya aku toh haru dumah bara lewu ngaju je tahi benyem jatun" kua malapor tamuei akan maharaja te.
"Hong kueh lewu te? Kueh rami dengan lewu itah toh ampi?" Kuan maharaja te ie hindai.
"Amun je karami rami lewu itah toh, hong lewu ngaju jatunti karami baya cucuk akan eka badagang bajual kare piring mangkok tuntang kare pakaian gawi hong kanih masih ketinggalan maharaja" kua manjelas keadaan eka itah hetuh akan maharaja Tang.
Mahining kute maharaja mamusut janggot je panjang te sambil nanture anak oloh je balikat pahari te.
"Anak eweh jikau?" Kua sambil maninjuk baun Tang.
"Anakkuh dengan oloh ngaju maharaja ye imbikuh akan hetuh mangat balajar badagang kea" kua mamander kea.
"Rima akengkuh toh, eweh ara ie toh?" Kuan maharaja misek hindai.
"Jatunti ara masih maharaja" kuan bapae hong bahasa mandarin mawi Tang benyem ih dia katawan narai je mander bapae dengan maharaja te.
"Hahaha... jadi kahain toh masih jatunti ara ela nanjaru aku" kuan maharaja denga.
"Are ampun maaf maharaja hong ngaju kanih baya nengakuh arae Tang ih manduan aran she itah kea, gawi amun nampakuh arae beken tau nihau she kareh hong kanih" kua manjelas akan maharaja.
" oh kute mangerti ih aku amun je kute, kilen toh rencana ikau handak nyakula ie hong hetuh keakah?" Kuan maharaja misek denga hindai sambil nanture bau.
"Kute kuangkuh amun maharaja maku ie sakula hong lingkungan kerajaan hetuh" kuan bapa Tang te dengan Maharaja.
"Tau bewei, baya ie harus nenga akae arae mangat dia Tang bewei" kuan maharaja denga.
"Kutelah diantara tujuankuh dumah akan hetuh balaku maharaja manenga aran akae toh" kuan bapae Tang te, maharaja mahining kute ie balalu bapikir hanjulu balalu hamauh hindai.
"Amun je kukau kuam aku manenga aran akan anak kau KILLIN, jadi arae te TANG KILLIN" kuan maharaja denga.
"Ware terima kasih maharaja, handak permisi ih aku toh" kuan bapa Killin dengan maharaja te.
"Iyoh, takkan bei" kuan maharaja sambil manguet sambil manenga aba-aba mangat bundur.
"Ela sampai dia bingat nyakula buah-buah anakmuh kau" kuan maharaja hindai.
"Iyoh maharaja" balalu ie bundur likut bara baun maharaja te.
Hong pandangan masyarakat Tiongkok helo, oloh je jadi raja iete oloh pilihan bara Langit (Tuhan), maka uras kare parentah ayue te dia bahanyi oloh malawa sembarangan gawi tau kicas, kutelah sepintas metuh jaman helo hong kanih te. Kute kea dengan bapae Killin ie balalu manumun parentah maharaja te denga Killin balalu tame sakula hong lingkungan kerajaan Tang. Baya akan manambah isut pangatawan itah metuh jaman dinasty Tang masih jatun ati je ara keramik Malawen, keramik matuh jaman Tang baya keramik biasa ih ware keramik je dia lalau bahalap tampa tuntang dia lalau hai kea rega amun bading dengan malawen. Malawen tege hong dinasty Ming, oloh malawen te Ming Merah gawi gambar bahandang dasar baputi susu tuntang are macam hindai warna malawen je beken hindai bara bahandang te.
Killin genep andau balajar melai istana ilmu silat ilmu surat dengan capat Killin rajin balajar tuntang jeleng kea tau. Ije nyelo due nyelo ie manuntut ilmu ware macam taluh je lajar hong karajaan te. Hong umur lime belas nyelo Killin jadi menguasai ilmu silat tuntang surat bara kerajaan Tang mawi kula beken bahiri nanture kaharati je mias bara je beken te.
Killin je tabela tame jadi prajurid karajaan Tang ie mamimpin baratus pasukan hong kerajaan. Kutelah Killin jadi kepercayaan maharaja Tang je bijaksana gawi ie sanggup menyelesai tugas rahasia bara maharaja metuh katika te. Kilenkah hong ije katika ie tulak manjalan tugas rahasia bara maharaja akan lewu je kejau kea manyalidik isu pemberontakan hong ije provinsi wilayah kerajaan Tang te. Ie tulak kabuat metuh te umur Killin jadi jalatien belas nyelo ie jadi are pengalama naharep masalah je kute tugas kabuat dia jadi masalah kanih kate kute.
Memang tutu kea isu te tege perkrutan rakyat je are hong daerah hete handak malapas arep bara kekuasaan Tang kutelah kabar je tasiar into hete. Mahining je kute Killin manggau kabar je pasti hindai maije bulan Killin mangumpul data bara kanih kate akhir ie supa kesimpulan je mantap tapi ie katawan ewen pemberontak balalu ewen barancana handak mampatei Killin kutelah hasil rapat darurat.
Killin je dia katawan rencana jahat oloh denga baya ie tarus waspada hong uras tugas je nenga maharaja akae. Andau te ie buli bara ibukota provinsi jite akan istana hapa ije kungan kuda je laju hadari kea. Killin haguet bara eka manginap hanjewu andau limbah jadi kuman belom into rumah makan ie balalu manguan jalanan.
Hapus jalan je jadi huru jatun atie halangan, bukit gunung tuntang lewu huma oloh je huru jadi main jam kejau malihi ibokota provinsi jite. Kilenkah metuh Killin tame ije parak kayu te sana jadi kejau tege oloh je manjaga jalan, atun laka bapuluh biti kare ewen matep jalan mimbing sanjata hong lenge ewen te, manture je kute Killin mangira ewen te parampok biasa je manjaga oloh mahalau hong hete.
"Muhun!" Kuan ije biti ewen te denga manyuhu muhun bara kuda.
"Tege narai?" Kuan Killin sambil nangkajuk bara hunjun akan petak.
"Ikau toh je ara Killin nah?" Kua hindai misek Killin te.
"Beken aranku Tang" kuan Killin tumbah.
"Bujur-bujur ela nanjaru ikei, gawi ikei toh utusan maharaja Tang handak manenga hadiah akae" kuan oloh te sambil mampalua lencana lambang ayun kerajaan Tang.
Nanture lencana jite ancap Killin manyembah gawi kutelah aturan hong kerajaan metuh te, eweh je mimbing lencana jite maka ie sama kilau Maharaja kea.
"Aku puna beken Killin arankuh Tang" kua dengan ewen je mangaku utusan maharaja.
"Sabujur sama ih aku nyuhu maharaja manggau Killin kea je akan hetuh" kuan Killin balalu palua lencana ayu je nenga maharaja aka, gantian ewen hindai je manyembah lencana ayue te habaleh sinde te.
"Yekah, jadi ikau toh handak akan kueh hindai manggau?" kuan pimpinan ewen te misek Killin hindai.
"Handak akan kota raja, gawi hiningkuh ie jadi akan kota raja kanih" kuan Killin sambil mingkes lencana ayue hindai.
"Nampi kuan ketun amun itah sama-sama gau ie akan kota raja kanih ih" kuan Killin dengan ewen.
"Puna pastilah je ie te akan kanih?" Kuan jite misek hindai.
"Iyoh, puna pasti jadi berita je supakuh toh andau male ie haguet akan kanih jadi" kuan Killin meyakinkan ewen te.
"Nampi kuan ketun amun itah toh hayak Tang akan kanih?" Kua misek dengan kare kawala je beken.
"Tau kea amun bahalap kea amun itah pakat manggau akan kanih" kuan ije bakas kea tumbah.
Ye ewen pakat akan kota raja te sambil pander-pander ewen hapus jalan te. Due andau ewen mangun panjalana te akhir sampai akan kota raja te.
Sana jadi sampai Killin balalu malapor akan maharaja hasil penyelidikan akan provinsi te tuntang mansanan kea tege sapuluh biti oloh je mimbit lencana ayun istana je handak manenga handak manenga akae hadiah bara maharaja.
"Tutukah tege hong kueh ewen metuh toh lagi?" Kuan maharaja misek hindai.
"Tege hong penginapan..." nyewut Killin eka ewen manginap te.
"Amun kute ikau manunggu hetuh ih biar aku mangirim Pangkalima akan kanih mimbit ewen akan hetoh" kuan maharaja denga.
Balalu maharaja mentehau panglima manenga tugas manjemput ewen sapuluh te akan istana.
"Siap maharaja" kuan panglima te balalu haguet bara istana te mimbit baratus pasuka akan penginapan je dia lalau kejau bara istana te.
Dia lalau tahi pangkalima te haguet balalu dumah ie mimbit ewen sapuluh te naharep maharaja hindai, sana sampai maharaja balalu misek ewen.
"Eweh manenga lencana istana akan ketun?" Kuan Maharaja dengan ewen te.
"Mentri anu nah maharaja je manjabat hong provinsi kanih" kuan je bakas ewen te.
"Narai kua manenga parentah te akan ketun?" Kuan maharaja te.
"Manyuhu manggau Killin gawi maharaja handak manenga hadiah akae baya nyuhu mimbit manalih ie" kua hindai mansanan jujur kilau kuan penguasa provinsi te (jaka wayah toh nah gubernur).
"Jadi supa ketun oloh je ara Killin te nah?" Kuan maharaja hindai.
"Jatun masih maharaja baya kuan Tang toh ie tege dinu kabar bahwa Killin jadi tege akan kota raja toh ye ikei balalu manggau akan hetuh nah" kuan oloh te sambil maninjuk Killin je tege hong ruangan hete.
"Kayahlah, taulah aku ture lencana je nenga gubernur akan ketun te?" Kuan maharaja balaku lencana jite hindai.
"Toh ie maharaja" kua balalu palua bara kantung baju juluk akan maharaja te. Maharaja mandua tuntang nanture lencana te puna mirip sinde ampin kare sulaman je tege hong hete, baya tege isut hijir benang sulam beken warna bara ayun istana jadi amun sepintas nanture puna ayun kerajaan Tang ampi.
"Lancana jituh dia ie aku je manenga jadi ketun sementara toh nahankuh pandehan manjemput gubernur je manenga lencana toh akan ketun" kuan Maharaja langsung manenga parentah manawan ewen basapuluh te.
"Tapi ikei puna dia tawan ije-ije maharaja" kua ije bakas hindai.
"Justru jite nah jite nah je ketun nahan helo hong hetuh kareh nunggu gubernur te jadi dumah hetuh ketun tau malawa" kuan maharaja te, balalu ewen te imbit prajurid akan penjara tahanan.
Metuh ewen handak bubar bara hete salenga dumah ije prajurid anak buah Killin akan hete kajeng kisu tutu ampi.
"Tege narai prajurid?" Kuan Killin nanture anak buah je panik ampi te.
"Anu... tuan.."
"anu narai ancap ander ih?"
"Anu bapam patei oloh" kuan prajurid te.
"Hau bujur auh, hong kueh ie wayah toh?" Kuan Killin je salenga genjeh-genjeh mahining kute.
"Tege melai huma ketun, dia ikei tawa eweh je mampatei" kuan prajurid te danga.
Mahining je kute balalu Killin balua bara istana te jatun ati permisi hindai dengan maharaja ie balalu manalih kuda langsung buli akan huma. Melai huna oloh are rami kumpul balalu Killin tame akan huma te. Nanture hantun bapae je lepah bahimang mawi ie manangis sangit dia karuan angat. Ie tarus manangis manyasal kea angat je masih ware hindai ie katawan toh te bara bapae te, tuntang je kanyasal angat ie jatun umba naharep eweh musuh bapae je mampatei te. Maharaja dumah akan hete kea.
"Jadi ih ken masih ware urusan je naharep hindai" kuan maharaja denga sambil manekap bahai.
"Aku nyasal angatkuh je dia sampet naharep musuh bapae te hayak ewehkah je kaputus kutuh" kua dengan maharaja te.
"Asal bujur buah itah manggau pasti dinu oloh je gawi toh" kuan Maharaja te manenga keyakinan akae.
Maharaja balalu marentah oloh murus hantun bapa Killin te, kare pati tabala nampa buah-buah. Kilin munduk sambil nampayah sambil bapikir manggau cara eweh je mampatei bapae. Ie mancoba marunding dengan maharaja mangumpul saksi je tege nampayah eweh je tame huma, hasil je tarang tege kea ciri biti oloh je tame huma jadi inampa.
"Ie lah amun kalutuh ampi?" Kuan pelukia je inyewa te mancoba manggambar oloh je gitan ewen tame akan huma te.
"Ie kukau ampi pakaia tuntang bau mata" kuan ije je beken balalu ma iyoh kea sama kute.
Killin balalu nanture gambar je nampa oloh te.
"puji aku ture oloh toh baya hong kuehlah?" Kua hamauh kabuat sambil mingat.
"Iyoh hong pelabuhan" kua balalu ie manduan Lunju haguet.
"Aku umba ikau kea" kuan Pangkalima te denga.
Limbah jadi kejau kea ewen due maharaja manugas telo biti oloh nanture ewen due amun narai-narai ancap nenga laporan akan istana. Kutelah maharaja manugas ewen telo prajurit pilihan istana.
Dia lalau tahi Killing dengan Pangkalima Tang te sampai akan pelabuhan te. Balalu Killing muhun manggau oloh je mirip dengan hong lukisan je nampa ewen te, tapi jadi tahi kea manggau puna jatun. Gawi heka Killin balalu tame akan kedai kuman handak manyuang kanai helo dengan pangkalima te. Ewen due tame akan kedai te sambil mameteh arak dengan daging hong kedai kuman te.
"Ela lalau tegang ikau tenang ih" kuan panglima te je nanture ampi Killin je sedih tutu te.
"Ah dia kea baya aku hengan kea akan kueh ie te?" Kuan kilin denga.
"Tege ih ie kareh" kuan Panglima te.
Metuh kanjera ewen due te bapander tame oloh balime biti akan kedai te. Ewen lime te balalu munduk hong meja je kejau kea bara ewen due te, Kilin nanture tuntang kasena ewen lime te bara ibukota provinsi je eka batugas mata-mata male. Ewen lime te acuh ih ampi baya sekilas hanjulu nanture Killin ewen due panglima te, metuh te kare panginan je meteh jadi damah agah pelayan akan ewen. Ancap Kilin ewen due panglima te kuman helo mangat jeleng manggau oloh je mirip dengan je tege hong lukisan te hindai. Limbah jadi lepah kuman Kilin balalu mambayar limbah te ewen balalu malihi kedai te hindai.
"Puna jatun kea ampi oloh jite laka hetuh" kuan Killin dengan Panglima te.
"Ela helo manyarah itah manggau helu" kuan panglima te je nanjung denga.
"Te kanih ampi" kuan Kilin balalu laju ie mananjung hong karatak te, nuntut gawi panglima te melai likut.
Sasar laju Kilin mananjung sasar laju kea oloh jite mananjung, tepa belai Kilin nampayah kute balalu hadari ie manyasah tapi oloh jite hadari kea akan arah balua bara kota raja.
"Hati-hati Kilin mikeh jabakan" kuan panglima je manuntut ie te hadari melai likut.
"Aku harus misek denga narai mawi ie je sampai hadari kutuh" kuan Kilin je jadi balua bara gerbang kota raja te akan ije parak kayu je tukep hete.
Kilin balalu tame akan parak kayu te kea inuntut gawi panglima denga. Tanjung-tanjung ewen due hong parak kayu je benyem te sana tege oloh tatawe hong parak kayu te. Kilin tarewen kea gawi suara tawe je aneh bahambur kanih kate auh asal.
"Ela je baya tatawe parahan baum akan hetuh amun je bahanyi te" kuan Kilin mangumbak, tapi oloh te dia tumbah malahan tatawe hetang.
Kilin balalu manjawut mandau je ayun taliau bapa, intu kueh mandau te sulak ayun bue hong Rungan je nenga langsung akan bapae gawi bapae je jadi malihi tuntang dia sampet mahapan mandau te metuh hapa mambela arep gawi andak melai hong kamar bagantung ih kutelah asal andau jite. Rangkah-rangkah Kilin ewen due panglima te mananjung hong penda kayu te sana.
"Sret.. sreet..." due pisau kurik tarawang akan arah ewen due bara due arah je hakabeken. Mahining je kute ancap Kilin mutar mandau.
"Cring..." sanjata je narawang musuh te tarampuk dengan mandau je laju tutu ie mamutar. Panglima beken hindai cara ayue ie manangkis hapa pedang senjata musuh balalu bajatu kea.
Pahayak te sapuluh biti oloh balua bara balikat kayu mangapung ewen due te. Lime diantara ewen te je supa dengan ewen hong kedai endau ije hindai oloh je nyasah Kilin endau, epat hindai dia Kilin kasene tapi panglima te kasena ewen epat te tokoh silat je terkenal metuh te.
"Narai mawi ketun mangapung ikei? En ketun handak memberontak dengan maharaja?" Kuan panglima te dengan ewen epat te.
"Eweh je handak berontak? Ikau ih herah" kuan tokoh utara sambil tatawe denga.
"Jadi narai urusan ketun sampai mangapung ikei due toh?" Kuan panglima hindai.
"Ikei jatun ati urusan dengan baya ikei tege urusan dengan anak oloh je dengam kau, handak palepah uru sampai akan uhat andau toh" kuan tokoh barat.
"Narai kasal ie toh dengam ketun?" Kuan panglima te hindai misek.
"Kilau ikau dia tawa ih urusan jituh jadi main puluh nyelo je nangkalau jadi ikei bara epat arah riwut toh puji kalah gawi bapae kau" kuan tokoh bara timur pander.
"Kan bapae jadi malihi jatunti hurui hindai denga toh urusan ketun dengan bapae" kuan panglima te, Kilin dia mangerti masalah narai je mander ewen te.
"Justru gawi jitelah ikei toh handak mampalepah masalah toh sampai akan uhat kanih" kuan tokoh selatan hamauh.
"Amun ketun jajuan mamaksa kanahoang kukau paksa aku umba mandohop ie" kuan panglima te balalu mamasang kuda-kuda jadi.
" memang jadi tahi kea angat ikei handak mancoba ikau panglima" kuan ije biti je balime te.
"Eweh ketun?" Kuan panglima misek ewen.
"Ikei toh je bagare arae lime Iblis jatun saingan" kua.
"Haru aku mahining" kuan panglima te.
"Puna dia ware oloh je mahining aran ikei gawi oloh je jadi mahining aran ikei uras naharep raja akherat kanih" kua hindai je sombong auh mawi arep sama kilau narai.
"Yekah, tapi andau toh giliran ketun ampi je naharep raja akherat hindai" kuan panglima te sambil tatawe ih.
"Itah nanture ih je kueh je bujur" kuan ewen lime te mangapung hong posisi peta je terkenal hong Tiongkok te je mawi musuh melai hong bahali balua tuntang bahali supa kamanangan.
"Babuah Lin posisi peta ampi je hapa ewen toh" kuan panglima ngarendeng kilin hindai.
"Iyoh, gitangkuh ih" kuan Kilin te ewen due balalu hatalikut naharep musuh je mangapung te.
"Aku mahining panglima toh ilmu pedang hebat luar biasa" kuan anggota iblis jatunti sainga hamauh denga.
"Dia kea je kute" kua tumbah sambil harinyum iblis jatun sainga uras harinyum ture ewen due.
"Narai rinyum-rinyum?" Kuan Kilin misek.
"Kareh nunggu sampai raja akherat kareh misek jite" kuan je baun Kilin tumbah.
"Lecak auh ewen toh hanak tutu kea" kuan Kilin ngarunum kabuat.
"Serang!" Kuan je baun Kilin hamauh sambil sambil manepe lunju akan baun atei Kilin, Kilin je jadi siap langsung manangkis hapa mandau, dumah hindai tejeb bara sambil nangkis hindai gawi Kilin, dumah hindai bara gantau nangkis hindai.
"jatun amun je kutuh ampi tepa tau buah kea aku toh" kua bapikir ampin cara serangan musuh je kute kalihai.
Ewen lime je sambil dari-daria ngaliling ewen due te, sambil manyarang teratur ampin parusika. Sasar tahi panglima dengan jadi terdesak hayak lingkaran ewen te sasar mangurik paksa panglima dengan Kilin hatalikut. Kilin mimbing mandau hapa lenge gantau panglima puna malajar ilmu pedang lihai te hapa lenge sambil. Hetelah masalah ewen due tau hasampuk siku mawi mampalambat garak.
"Kilen nah panglima dua hapan lenge gantau ikau nah?" Kuan Kilin umba panglima je handak tarus hasampuk lenge ewen due te.
"Matei aku hapa gantau gawi aku malajar ilmu pedang jituh puna hapa lenge sambil lenge gantaukuh nah meteng gurukuh akan likut bihin" kuan panglima tumbah sambil manangkis sanjata musuh je sasar racap manyarang.
Nanture ewen due je terdesak jadi kute ewen lime iblis te sasar bahimat manyarang ewen due te. Ewen lime te manyangka tikas te kataun Kilin dengan Panglima te padahal ewen due mahemat tenaga gawi lime musuh je labih hebat hindai jadi manunggu, tuntang mimpa kalaya ewen lime te je tarus manyarang ewen due je sasar hamuk ampi jadi.
Mandau je hong lenge mampalua bayangan je babilem jadi gawi kalaju main, pedang ayun panglima sama kea baya ije masalah ewen due te rancak tatarang siku ewen due. Bapae Kilin te tokoh silat hong wilayah bentuk je ikeh gawi epat tokoh mata riwut, tapi metuh ie dumah bara ngaju katawan ewen balalu ngarubut ewen into huma jitelah mawi ie matei gawi ewen epat te.
Kilin nanture jatun kemajuan jurus ewen lime te tikas kute ih mungkin jatun jurus beken hindai je hapa ewen je tau mampahimang ewen due panglima te. Metuh je baun ampi dia lalau waspada balalu Kilin nangkeru hayak manyimbur laju akan musuh je kurang waspada te. Musuh handak manangkis tapi lambat dia manyangka kacapat Kilin je kalute, hindai sampet bapikir narai-narai lenge gantau jadi nihau kinan mandau Kilin jadi. Nanture je kute kawala balalu mandohop mamunu Kilin tapi lambat kea helu Kilin nangkeru sambil manetek uyat musuh jite. Kutelah kacapat jurus lajar bapa akae bara kurik.
Dia benyem pangalima mahamuk kea nanture Kilin je jadi marunca. Musuh je intu baun jite je himat panglima sinde manejeb nihau lenge handue manejeb nihau kuluk kea. Ewen telo je jadi tisa jadi jera dia maku laya-laya hindai tapi kekutan jadi balemu singkat kesah ewen telo tisa te selesai kea.
"Hebat... hebat..." kuan tokoh utara sambil manapuk lukap nanture ewen lime uras tepas uyat.
"Dia kacewa ikei jadi dumah bara kejau akan hetuh" kuan je bara selatan hamauh kea.
"Biar ewen istirahat mangkeme kamanang helo" kuan je bara barat.
Panglima nanture akan bau Kilin ie katawa epat tokoh jite beken tandingan ewen due aluh biar ije ewen te ewen due ngarubut hindai tentu manang mahi amun je hayak-hayak bapa Kilin je hebat matei jadi. Kutelah panglima te barima kekuatan ewen due sesuai dengan pengalama je jadi rancak muhun akan medan tempur.
Beken dengan Kilin ie dia bapikir jituh jite, gawi ie jatun lalau are pengalama hayak puna dia kasene dengan ewen epat te.
Metuh kanjera ewen tende kute sana dumah pasukan kerajaan bara buhu akan hete. Nanture je kute ewen balime je tisa te balalu bapikir hadari helu.
"Metu kea kawan asu awangkau sana mandumah arep" kuan tokoh timur dengan ewen.
"Andau toh ketun bauntung ampi tapi andau rahian dia baka kilau toh hindai" kuan tokoh utara hamauh sambil mananjung mangejau bara hete.
"Kareh tege hindai katika itah supa" kuan tokoh bara barat manuntut kula je nanjung helu.
Dia lalau tahi sampai ewen prajurid kerajaan akan hete, mimpin gawi wakil panglima akan hete.
"Maaf panglima ikey talambat dumah" kuan wakil te hamauh denga.
"Pas katika ketun dumah toh dia kare lambat" kuan panglima te tumbah.
"Nampi nah jadi supa oloh je gau ketun due nah?" Kua misek hindai.
"Kareh ih mangesah nunggu sampai istana ih" kua panglima te balalu ewen hayak buli akan Istana hindai malapor akan maharaja.
Sampai akan istana panglima balalu manaharep manenga laporan akan maharaja ewen.
"Dia sala kea kilau dugaankuh te amun je kukau kuan ketun te" kuan maharaja limbah mahining kesah panglima te.
"Aku gin sama kea jadi manduga akan hete" kuan panglima te.
"Kutuh ikau melai hong istana ih ikau ken" kuan maharaja te dengan Kilin.
"Terima kasih maharaja" kuan Kilin denga.
Nampara bara te Kilin melau hong istana hindai. Baminggu-minggu babulan-bulan sana lembut pikiran Kilin handak manalih lewu indu akan ngaju hindai.
Hong ije katika ie mamander mama je jadi maharaja te niat atei je handak namuei manggau indu je tege hong ngaju hetuh.
"Iyoh amun kukau rencanam tau ih aku nenga modal akam badagang" kuan maharaja te denga.
"Are terima kasih maharaja" kuan Kilin balalu mundur buli akan eka hindai.
Maharaja balalu marentah anak buah manyadia ije kabawak kapal je hai hayak manyuang hoang hapa kare barang dagang je kuntep. Hanjulu ih oloh manyadia laka ije minggu jadi siap balayar kapal je meteh maharaja te. Maharaja balalu mantehau Kilin naharep ie.
"Kapal ayum jadi siap coba ikau nanture akan saran sungei kanih helo, limbah jadi ikau mariksa lapor akangkuh hindai" kuan maharaja te denga.
"Iyoh maharaja" kuan Kilin balalu balua bara Istana manuntut oloh je manenga laporan endau.
Sana sampai Kilin langsung mariksa kare ampin kapal te je puna bahalap hayak nahap ampi bahan je hapan manampa kapal te. Hong kapal jadi kuntep kare keramik, macam-macam tege piring, mangkuk, balanai, pot kambang, cupu, sampai kare bakam uras tege jadi. Handak ije puntung andau Kilin mariksa kapal te, limbah uras jadi pas gita haru ie mules akan istana nenga laporan akan maharaja.
"Bahalap ampin kapal te jadi maharaja" malapor akan maharaja te.
"Ye ih amun kute kuam, jadi kapal tuntang seluruh barang je tege hoang kapal te uras nengakuh akam. Ikau kareh ngawal gawi pire-pire biti pelaut je jadi anak buah ayum hong kapal te." kuan maharaja.
"Jadi pea rencanam haguet namuei toh?" Kuan maharaja misek denga, maharaja je misek te gawi katawa tokoh bara epat penjuru te pasti rami manggau Kilin melai luar istana hayak ewen je puji mamberontak je gagal gawi Kilin tentu umba kea mahimat Kilin. Jitelah sabab Maharaja sana Kilin tege rencana handak buli akan ngaju maharaja balalu mandukung capat.
"Jewu rencanaku haguet maharaja" kuan Kilin.
"Pas ih te pahayak palembut matan andau haguet" kuan maharaja te denga.
"Amun kute aku handak manatap paramukuh helo ara" kuan Kilin.
"Iyoh takkan bei, jewu sanan akangkuh amun ikau handak haguet" kuan maharaja denga.
"Iyoh maharaja" kuan Kilin balalu balua bara ruang rapat istana te buli akan huma eka je into lingkungan istana te.
Hanjewu andau Kilin balalu manalih istana manyundau maharaja, metuh katika jite maharaja kanjera kuman hanjewu.
"Kuman hetuh helo Lin" kuan maharaja mamakat ie. Mau dia mau Kilin umba kea kuman dengan maharaja metuh te.
"Pire kakejau lewu indum bara hetuh Lin?" Kuan maharaja sambil kuman denga.
"Amun mingat aku dengan bapae huran handak ije nyelo labih haru ikei sampai hetuh" kuan Kilin.
"Mias kakejau eka indum te Lin, tapi ikau jadi bauntung jadi sampai hetuh mudahan ikau sampai hong kanih tuntang amun ikau hakun mambangun lewu ketun kanih mangat manampa kerajaan Tang melai kanih" kuan maharaja denga.
"Jamen ih maharaja jikau pasti handak kea hong kemajuan kea" kuan Kiling.
"Kareh amun ikau jadi manampa kerajaan hong ngaju itah mangat bahubung mahalau perdagangan" kuan maharaja menjelas ake.
"Iyoh maharaja" kuan Kilin.
"Ikas te ih auh kuh akam takan bei ikau tulak" kuan maharaja denga hindai.
"Ware terima kasih maharaja kare kataum puna ingatkuh sampai jeha" kuan Kilin balalu bundur balua bara ruangan te.
Kilin balalu buli akan huma hindai manduan kare paramu je jadi nyadia sulak. Limbah jadi siap ie tulak akan pelabuhan hindai munda kare paramu te akan kapal, sampai kapal balalu ingkes melai kamar paramu. Balalu KIlin mariksa kapal hindai hanjulu balalu manyuhu ewen haguet.
Bara sungei Kuning Kilin nampara balayar.
Akan hila selatan kutelah tujuan je ngguang.
Minggu baganti minggu bulan nangkiri bulan.
Kadang Kilin tende sambil bajualan karemik tuntang sutera jitelah barang dagangan.
Tiap lewu je nende isek arae tuntang misek lewu ngaju masih hindai oloh katawa.
Ije nyelo Kilin jadi hong kapal te.
Kadang ie ngalamun kabuat taingat metuh balayar dengan bapae huran.
Ware kenangan melai laut dengan bapae metuh huran.
Mawi Kilin rancak mahantis danum mata amun jadi kalute.
Baya gawi kawalan je are hong kapal te.
Je mahibur atei je benyem sunyi.
Due nyelo singkat sarita.
Jalur je kuehkah je huru sama dia tawa.
Kilin nanture ije tumbang sungei je lumbah.
Kilin mamakat ewen akan hete.
Sampai hete tege huma ije tege oloh bakas je kanjera munduk marene.
Balalu Kilin balua bara kapal manalih akan oloh bakas te.
"Narai aran lewu hetoh nah mina?" Kuan Kilin dengan oloh bakas te.
"Tumbang Kahayan ara hetuh" kuan mina te denga.
"Hong kueh eka lewu ngaju mina?" Kuan Kilin.
"Ngaju? Ye hetoh nah" kuan mina.
"aku toh nah oloh ngaju nah" kuan mina te hindai.
"Iyoh are terima kasih ih mina, handak murik aku helu ara" kuan Kilin.
"Iyoh buah-buah ih" kuan mina te denga.
Balalu Kilin manarus panjalana murik akan Kahayan. Tege lewu supa ewen ie tende sambil bajual kare kain sutera tuntang keramik.
Bamingu-minggu babulan-bulan balalu sampai Kilin te akan ije lewu Kilin te kesah. Kilau bahut amun jadi sampai lewu ie bajualan daganga te. Kilin je jadi dia katawan arae lewu indu te pikir-pikir tikas cara kawin dengan oloh ngaju toh ih mangat tau supa keterangan alamat indu je oloh ngaju te.
Kilin oloh je pintar hayak harati supa akal je kute jadi mantap hong angat hong atei te.
Itah baya tau marencana tapi Hatalla je malalus kea.
Hong ije lewu je nende te Kilin tature ije biti bawi bahalap je bapili melai kapal ayue te.
Balalu Kilin misek dengan ije warga hete.
"Oh le, eweh bawi je bahalap jite?" Kuan kilin dengan oloh lewu je balanja hete.
"Ji kueh jikau nah bakas olo nah le, hayak balu hindai" kuan jite.
"Babuah auh leha je kilau kare oloh haru umur hanya belas ih gitangkuh?" kuan Kilin denga.
"Amun ikau dia percaya dengangkuh isek bei dengan oloh je tempun biti te" kuan oloh lewu te denga.
"Helo aku misek" kuan Kilin balalu manalih bawi kuwu te balalu maningak.
"Oh ndi, narai je gaum?" Kuan Kilin dengan bawi kuwu te.
"Ihat ku ture-ture ih" kuan bawi kuwu denga.
"Taulah kue bapander akan lahuan ndi tege taluh je isek kuh dengam" kuan Kilin bapander denga.
"Hau narai nah?" Kuan bawi kuwu denga.
"Tege bei" kuan Kilin denga.
"Iyoh ih" kuan bawi kuwu balalu manuntut kilin akan lahuan kapal te.
Dia perlu itah mahining pander ewen due je pasti hambun rayu Kilin dengan Bawi Kuwu te. Kilau anak tabela bahut hajanji purah balalu nutu bawi kuwu kea.
"Amun aka je puna tutu handak maja misek akan huma ih" kuan bawi kuwu te denga.
"Hong kueh eka humam ndi?" Kuan Kilin misek hindai.
"Hong ngaju kanih tege ih je batungket gantung ampi" kuan bawi kuwu denga.
"Iyoh kareh aku akan kanih" kuan Kilin denga.
"Yoh ih amun manunggu ikau andau toh melai huma" kua dengan Kilin te.
"Yoh bei" kuan Kilin.
"Amun kute handak mandai ih ara aku helo" kuan bawi kuwu sambil mananjung malihi kapal Kilin te.
Limbah jadi bawi kuwu mandai Kilin balalu matur rencana hindai maja misek bawi kuwu te akan huma. Sana andau halemei Kilin balalu mandai ke mimbit ije due biti anak buah maja akan eka bawi kuwu te. Tajung-tanjung Kilin melai lewu te puna jatun ie bingat hindai je eka kakurik huran hong hete. Dia tahi tanjung Kilin sampai akan huma bawi kuwu te, metuh te bawi kuwu kanjera munduk baun huma kea.
"Te ie kanih" kuan Kilin hamauh dengan kawal.
"Pire umur kira-kira kuam?" Kuan Kilin misek anak buah te.
"Amun manurut tampayahkuh laka uju belas hanya belas nyelo ih ampi, taw je kuam?" Kua misek kawal.
"Sama ih manumun tampayahkuh" kuan kawal tumbah.
"Salamat halemei ndi" kuan Kilin dengan Bawi Kuwu.
"Halemei kea, palus akan huma hetuh" kuan bawi kuwu.
"Iyoh palus kea ih toh" kuan Kilin denga.
Sana jadi tame huma Kilin balalu mamander rencana je handak misek bawi kuwu te. Ewen keluarga bawi kuwu te manarima tuntang sanan kea ampin riwayat bawi kuwu je balu manak jadi. Kilin dia pehe pikir je penting hong pikira tege eka oloh je tau mandohop ie manggau alamat eka indu kareh, kutelah tujuan Kilin je mangawin arep dengan bawi kuwu te. Puna bahalap cara je hapa Kilin te, gawi amun ie isek-isek barangai jelas tau beken je sundau, gawi masalah dia ie katawan into kueh eka tandipah lewu indu, sedangkan bawi kuwu je manyewut arep je bakas jite baya pander hapa marandah arep ih gawi jitelah ie dia maku hatatumba nahiu jite.
Limbah jadi lepah kare pander ewen matur rencana nampa pesta je sederhana ih akan pangawin ewen due te. Bawi kuwu dia maku kawin je rami-rami hindai gawi jadi balu kea mikira ie, baya masi akan Kilin je masih bujang ih marawei oloh ije kalewu te manyaksi acara ewen.
Acara jadi lepah ewen belom hinje buah-buah manguan pambelom into lewu te. Metuh kawin te Kilin mangganti arae mangat rajaki ewen due lancar maka ara ganti jadi Kiling into kueh bapa oloh she Tang maka ara lengkap Tang Kiling (due kata).
Jadi baminggu-minggu baganti bulan ewen due hinje. Kilenkah hong ije andau te Kiling toh sana gatel takuluk gawi guti nyit-nyet sinde angat pangkeme. Balalu ie manalih sawa te balaku dohop manggau guti akae.
"Ndi taulah ikau manggau guti akangkuh helu, bagatel sinde takulukkuh toh" kua dengan sawa te.
"Tau kea, hatuh aku gau akam ka" kuan Bawi Kuwu denga.
Balalu ie munduk bawi kuwu manakas takuluk manggau guti je kua te. Metuh kanjera kakas-kakas bawi kuwu nanture tege awan himang melai takuluk bana, gawi bana te rancak bakesah umba perang metuh hong Tiongkok akae balalu ie misek kunat te dengan bana.
"Tege awan kana senjata musuhmuh kah ka melai takulukmuh toh?" Kua misek Kiling te.
"Tegekah ampi ndi?" Kuan Kiling misek hindai.
"Iyoh ampi toh awa jadi keleh" kuan bawi kuwu dengan.
"Amun kunat jikau dia kare awan musuhkuh, tapi gawi kadungilkuh ih. Tanda mata bara indukuh" kua sambil tatawe.
"Tanda mata kilen auh nah ka?" Kuan bawi kuwu denga.
"Kutuh kuan bapae kuh mangesah. Metuh aku kurik metuh indukuh pakasak bari basanga aku handak balaku. Gawi bari te balasut indukuh ngahana, tapi aku badungil jajuan handak manyumput metuh indukuh laya aku manyumput. Tapi gawi je kajeng kisu beken je nekap beken je nanture balalu tatekap rinjing je balasu mawi aku manangis tuntang induku balalu rahas tutu, catok kulukuh hapa sodok bari te ye kau awa je gitam kau" kua mangaesah pandinu himang jite.
"Bujur-bujur je kuam kau, amun kukau ara ikau toh anak kuh kutuh" kuan bawi kuwu te balalu manjuju ie.
"Induku serap ikau, amun je indukuh nah bakas, tau nampara ngalilu reke wayah toh" kuan Kiling dengan bawi kuwu.
"Ikau dia tawa aku toh nah puna bakas,baya gawi aku bahasil meyakinkan ije ilmu mawi aku je tatap tabela sampai wayah toh" kuan bawi kuwu.
"Tanjarum kau puna kakulas ayum kau ih manggau guti akangkuh" kuan Kiling puna tutu kea taluh je kua dia tame akal penjelasan ayun bawi kuwu hong ontek.
"Yo kue maja bakas lewu toh je masih belom je katawan kesa jitoh" kuan bawi kuwu te mamakat ie.
"Haw.. yo ih kue maja" kuan Kiling gawi gita puna serius ampin bau bawi kuwu denga.
Sampai huma oloh je gau te balalu isek gawi bawi kuwu oloh bakas te.
"Tutu ih bawi kuwu toh puna bakas umur baya tabela ampi biti bereng" kuan oloh bakas te mamander.
"Buhen te nah ken?"
"ye kuangkuh harungkuh katawa sakalinya Kiling toh anakuh huran nah je nyakula bapa akan kerajaan Tiongkok bihin nah" kuan bawi kuwu manjelas.
"Kilen je tau kalutuh?" Kuan oloh bakas te.
"Kalampie ih je sama dia haru aku tawa metuh aku manggau guti akae endau ih" kuan bawi kuwu.
"Amun je kukau auh ketun inyaki mamalas lewu itah hapa daha seluruh metu je tege hong penda andau toh" kuan oloh bakas te. Mahining je kute Kiling umba bapander kea.
"Kilen ampi ikei dinu amun je hapus penda andau toh manggau metu" kuan Kiling.
"Epat puluh macam ih je hapan te, jite kareh hapa manyaki tuntang mapas lewu toh" kuan bakas.
"Iyoh ih" kuan Kiling dengan angat atei je labih are dia percaya amun je jadi sawa te ie te indu.
Puna bahali impercaya hal je ganjil kute tapi kuasa Hatalla puna lapas bara pikiran kalunen, kutelah bawi kuwu te ampi tabela tapi ie puna indu Kiling je bujur kea.
Singkat kesah kare metu uras supa gawi Kiling bajumbah epat puluh kilau kuan bakas lewu toh tuntang marawei ewen ije kalewu hindai gawi, pesta hindai nampa. Metuh kanjera ewen je rami-rami kute langit nyalenga mangaput mambilem riwut teneng, Kiling je puji balajar ilmu perbintangan hong kerajaan Tang dia puji mahining keadaan Langit je tau kalute.
"Narai rima toh" kua hamauh kabuat hong padang pesta te.
Kanjera je bapikir kute riwut barat nampara dumah sasar tahi sasar kancang sampai balihang belah batang kayu saran jalan. Masih hindai lepah kasangit alam ampi dengan ewen te. Nyaho kilat manyambar laka petak je mawi gerek petak sasar tahi gerek petak te sasar bahimat. Bawi kuwu metuh te metuh riwut barat sulak ie jadi tame akan banama mikeh junyu nata ujan amun buli akan huma, kutelah bawi kuwu barima metuh ie akan banama dia manyangka andau je murka kilau te kea.
Entah bara kueh pandumah danum je ware sana tege manambalang banama te mawi bawi kuwu je hong melai kapal tahampas kanih kate balalu tujah melai hong banama te.
Matuh bawi kuwu jadi sadar ie baya nampayah tege ije cahaya tarang bara luar. Bawi kuwu manalih akan hete marak ruyung-rayang nampayah akan luar are batuan. Bawi kuwu mantehau balaku dohop dengan oloh tapi jatunti je manumbah auh, sampai hong ije andau tege ije biti oloh dumah akan hete.
"Dohop aku" kuan bawi kuwu.
"Tege oloh auh" kua
"Aku melai banama toh" kuan bawi kuwu te.
"Basaluh lepah ketun toh ampi" kuan oloh je manalih eka bawi kuwu je mantehau.
"Dohop aku balua bara hetoh yo" kuan bawi kuwu balaku asi denga.
"Nampi aku handak mandohop ikau?" Kuan oloh te.
"Catok akae mangat bakiwak manampa jalan akangkuh balua" kuan bawi kuwu te denga.
"Nunggu helu aku mantehau oloh lewu kanih" kuan oloh te balalu hadari bara hete.
"Jatun kea uras dia tau mandohop" kuan bawi kuwu ngarunum nanture jite je buhau.
Dia lalau tahi dumah oloh are akan hete mimbit macam-macam alat tege kea je mimbit panginan. Nanture oloh are kute bawi kuwu jadi semangat kea pasti olih balua ie gawi oloh are te.
"Kuman helo ikau bawi kuwu, eweh dengam hekau?" Kuan ije biti je manukep akan hete.
"Kabuatkuh ih dohop aku yo balua bara hetuh" kuan sambil narima bari balut je neng oloh akae te.
"Iyoh ikei dumah toh nah handak mandohop palua ikau bara hekau kea" kuan ije biti ewen te.
"Kejau ikau bara rumbak hekau ikei handak mancatok tumbang hetoh" kuan ije hindai je mimbing palu hai hong lenge.
"Iyoh" kuan bawi kuwu sambil mimbit pangina te.
Balalu ewen dir dar mancatok batu te bakiwak kea ampi gawin ewen te, baya dia maku bahai gawi sama kilau belom batu te limbah bakiwak lembut hindai, hante ih ampi kahain rumbak te.
"Dia maku ampi bawi kuwu batu toh bakiwak santar haluli tarus" kuan ije biti oloh je hamauh melai luar te.
"Kayah puna nasib kea aku toh" kuan bawi kuwu je nanture gawi ewen te jatunti hasil.
"Buli ih ikei toh je kalutoh ampi batu" kuan ije hindai.
"Iyoh bei" kuan bawi kuwu balemu dia basemangat angat.
"Tege ih ikei magah bari balut jewu hindai akan hetuh" kuan ije hindai.
"Iyoh, amun ketun handak manampa kain agah bei benang akan hetuh aku nampa kain akan ketun" kua hindai.
Nampara bara te rami oloh magah kare banang, kain, manbal kare pakai belah. Singkat sarita bawi kuwu melai hete terkenal hindai sampai akan pinding ije biti hatue je gagah bara hila Barito toh dumah akan tangkiling te kea.
"Oh bawi kuwu" kua mantehau bawi bara baun rumbak te.
"Oi aku, tege narai?" Kuan bawi kuwu denga tumbah bara hoang.
"Nampi amun aku olihkuh palua ikau bara batu toh hakulah ikau akan sawangkuh" kua mamander bawi kuwu je laya manyulam melai hong banama te.
"Hakun tutu amun ikau olih mampalua aku" kuan bawi kuwu denga.
"Iyoh ih amun kute" kua ie manduan baliung mamukul tumbang rumbak te sama kilau je jadi2 pire oloh je mancoba kea batu te lembut tiap ie bakiwak te.
Nanture je kute ie dia maku manyarah, balalu ie balampah melai hunjun batu banama te balaku petunjuk mangat olih mampalua bawi kuwu bara rumbak batu te. Gawi puna ie balaku bujur buah maka dumah pansanan akae.
"Amun ikau handak mampalua bawi kuwu bara hong batu banama toh ikau harus nyadia uju kakabat bamban into kueh ije kabat te kahain pangkut due lengem kau. Ikau manggau tuntang balalu lepah mamukul te lepah hong ije sahelo bara andau kaput" kutelah pansanan akae je balampah te.
Hanjewu andau ie balalu manggu bamban te. Ie je pangaji kapuntung andau ie manggau bamban te sana jadi etu tukep robak kayu te balalu mik-muk ih ie mamukul tumbang rumbak te hapa bamban. Ije kapeteng jadi lepah tege hasil je gitan jadi. Sampai jahawen kapeteng andau jadi halemei, rumbak te puna sasar hai kea bara helo.
"Kayah tisa ije kapeteng hindai" balalu catok kajeng kisu tapi metuh jadi saparu balalu mihau metu parak kayu te mansanan bahwa jadi jam jahawen amun ie hakun mahiau te (aku dia bingat arae metu te).
"Oh bawi kuwu taulah ikau balua jadi" kua dengan bawi kuwu te. Bawi kuwu mancoba baya olih balua kuluk ih dia olih nangkalau bahai. Nanture je kute hasil oloh jite kacewa.
"Kueh lukap ayum bawi kuwu" kua. Bawi kuwu je dia curiga nah balalu ie manjuluk lukap limbah ture-ture ie lenge bawi kuwu te balalu nejeb akae tepas lenge balalu badaha mambisa batu te je mawi palus tatutup batu te sampai andau alem toh.
(Lepah)
Panjang sabujur sarita toh pahari baya jituh ringkasan kesah ih je nuliskuh.
Dinasty Tang amun dia sala mendeng metuh abad jahawen sampai abad jalatien masehi.
Jadi sekitar abad jitelah kejadian te amun auh sarita toh.
