Karungut Bawi Kariau

Palus mahiau kacapi bulau
Atun asi natau je linga jagau
Iring karungut je riwut andau
Karungut saritan bawin kariau

Riwut ngambeleng tanjung mahalau
Riwut karungut bawin kariau
Karungut saritan panatau jagau
Nupi nuah bawin kariau

Batiruh hamalem nupi hasundau
Nupi nuah bawin kariau
Mangalung itung je anak jagau
Bilak laya-layau hambaruan kejau

Nupi mangumbang je bahu lakau
Marukat bukit nyahewu luaw
Palus dumah uluh bawi manyundau
Nanggareku ara bawin kariau

Metup merau daha tahesau
Bilak olih nyuang je cangkir bulau
Hagarak usuk je anak jagau
Mite kahalap bawin kariau

Bawin kariau dumah nyalenga
Huang tampayah je into mata
Hayak kilat je hajan-jala
Manyingah baun hatue bakena

Ije garing palus sambewa
Sana tau turung je uhat mata
Jalan mambuka pander sarita
Kilau takalong ilmu patua

Bawin kariau manjuluk lenge
Palus hakutak hayak tatawe
Kakueh jalanam ikau tuh aka
Sayang huang je padang himba

Tanjung layau jajalan sala
Palus dengam aku hasupa
Sarai garing kue sambewa
Narai je lakum aku manenga

Kuan kutak bawin kariau
Hakutak dengan panatau jagau
Tuh aku handak misek ikau
Manenga akam karuhei tatau

Jalan sala je tanjung layau
Pahayak aka panatau jagau
Manuntut andi bawin kariau
Ganan pukung je bahu lakau

Tanjung kejau kan pulau himba
Metuh sulak aku hasupa
Karuhei tatau je aku dia
Balaku ikau ngaragan lawang bakota

Kilau antang layang tarawang
Tantihu layang tujuan jalanangku
Tau leteng tarung saritaku
Balaku ikau ngaraga je karung lawang

Auh kutak panatau jagau
Kutak mambujuk bawin kariau
Biar saribu beken bara ikau
Je patut eka tahasengkuh nihau

Aku aka tumbah bajeleng
Mansanan jatun palaku bereng
Baya uluh bawi dia sabanding
Pea tau garing habambai mendeng

Taluh je aku bawin kariau
Ganan pukung je bahu lakau
Pea tau sanang ije kapulau
Ampun maaf pangkalima jagau

Lehan katulas kutak muh andi
Dengan aku kakam belum pangasi
Maka ikau ganan lunuk hai
Kilau kambang magar kawat baduhi

Nupi rami batiruh tujah
Tarewen misik je andau sawah
Kariau lilap bara tampayah
Pisik ku belum balang batuah

Andau hamalem bintang bahambur
Baju rok jengki je air mancur
Biar hapisah sapanjang umur
Tisa bayangam jadi panghibur

Kain halus bahalap lipat
Nampayah kuh bitim mambulat sifat
Jete puna eka kaheret angat
Tutu hapisah ateikuh leket

Amun taingat bayangan nupi
Air mancur panarik hati
Randah gampal potongan biti
Tatap ku ingat sampai ku matei

Mamasut usuk uluh hatue
Mahining pander kariau kalute
Kutak manis hayak tatawe
Kilau patuh helu puji hagite

Bimbang atei je anak jagau
Mite kahalap bawin kariau
Hakendut balau je saran lingkau
Jete pantas eka tahasengkuh nihau

Tantihu jalanangku je atun aku
Dia hatingkes riwut kalingu
Sarai metuh aku pasuru
Atun je mili atawa laku

Kutak ma'arif uluh hatue
Bahimang jantung atei kapehe
Uluh bawi manggatang mate
Palus mambuka je intu hete

Auh kutak bawin kariau
Kutak dengan panatau jagau
Dia puji helu itah hasundau
Rajaki hai manumah ikau

Bawin kariau mendeng nyalenga
Iye muhun je bara huma
Dumah kilat je hajanjala
Kariau lilap bara huang huma

Hakarang indang aduh hakayah
Kariau lilap bara tampayah
Atei bawi bahimang lepah
Pisik ku belum balang batuah

Tikas tuh helu sarita kariau
Sarita dengan panatau jagau
Iye hapisah sama hakangkejau
Mudahan tau nupi hasundau

Inyalin Awie: S.S
Bara Buku Karungut Ayun: Semiati