Kelep dengan Balawao

Wayah pandang tahi mawi keang kare danau uka Kelep te melai. Jadi due telo bulan toh ujan jatun muhun hindai. Lasut andau je manyangit mawi kare petak lepah badarak. Marak kalasut andau je kalute ije kungan Kelep Rantep gayar-gayar rangkah tutu tanjung. Ie mananjung manggau eka melai je taheta hindai. Danau je katining bihin eka melai wayah keang sampai badarak jadi petak hete. Padang je dumah mawi danum uras teah, hayak kare uru uras mangaritip. Marak lasut je kalute ie sampai kea hong ije lewu eka kare metu rami bakumpul. Aluh wayah pandang kute lewu te tatap subur kare kayu masih bahijau. Angat teah belai hayak lao kanai je nampara kameang Kelep Rantep te, kajaria ie manduan kaputusan tende hong lewu hete.

"Amun nanture ampin karami metu into lewu toh pasti tege danum hong lewu toh atawa tau tege panginan akangkuh" kua bapikir sambil tame akan lewu te.

Metuh ie jadi tame hong lewu te sakalinya uras jatunti je manyanang atei. Isek ije handak laku danum mihup atawa isut panginan akae tapi uras metu lewu te pambukih denga jatun ati je hakun manenga ie atawa mansanan eka danum mihup te. Malahan ie akan hababaka metu beken gawi.

" coba ketun ture tege Kelep je sasat akan hetuh. Maka Kelep belom hong danum kilen je bangang hong petak? Buhen ie tau sampai akan hetuh" kuan metu lewu te denga.

" mungkin ie lagi bangang ih dia bingat tanduha buli hindai jadi. Amun nanture ampin kalaju tanjung je kukau tau bapuluh nyelo ie haru tau sampai akan huma hindai" kuan je beken hababaka ie.

"Hahaha..." hetang kare metu te nantawe kelep jite, matapmanyau auh kare metu umba Kelep te.

Akhir Kelep Rantep te malalus tanjung jalana hindai malihi kare metu je metu-metu te balua bara lewu je ameh-ameh te. Gawi ie mangkeme je teah belai hayak balao tuntang heka angat ie tende melai ije upun kayu nyarenan kare angat hong hete. Metuh ie munduk kute dumah ije kungan Balawao manalih ie.

"Oh nger... narai gawim melai latuh?" Kuan Balawao sambil singut-singut denga.

"Oi nger, aku toh lagi namuei bindah nger gawi danau je ekakuh nah jadi keang lepah badarak petak jadi" kuan Kelep te balemu ih.

"Pasti ikau kana tida gawi metu hong lewu hete endau nger lah?" Kuan Balawao misek denga hindai.

"Iyoh nger, bara kueh ikau katawa nger?" Kuan Kelep denga.

"Puna ampi hadat ewen hete nah nger je kute, ela je ikau aku gin nida ewen kea nah nger" kuan Balawao.

"Ohh... ye nah ikau dia maku tukep dengan ewen nah nger?" Kuan Kelep te.

"Iyoh nger, jite sabab aku dia maku tukep ewen. Handak akan kueh ikau jalanam toh hindai nger?" Kuan Balawao denga.

"Dia aku tawa kea nger, baya aku toh lagi balao haya teah belaikuh taukah ikau manenga danum atawa pangina akangkuh nger?" Kuan Kelep te.

"Tau bewei nger baya itah akan humakuh ih helo nger mandua" kuan Balawao te denga.

"Kilen kakejau bara hetuh ekam nger?" Kuan Kelep denga.

"Tukep ih nger tukep upun jawau jite" kuan Balawao denga.

"Yo ih ara itah akan hete" kuan Kelep.

Dia lalau tahi ewen due sampai akan huma Balawao te. Balalu Balawao manyarungan akae danum helo je balalu ihup gawi Kelep te. Limbah te ie haru nyarungan kare isin jawau, bua-bua tuntang kare rote keang tege kea. Balawao je sama isut kea pangina je nyadia dia jadi masalah mambagi akan Kelep je haru hakasene denga te, je penting olih mandohop oloh tatau ih jadi ara.

"Kayah nger besuh tutu kanaikuh kuman umba ikau toh" kuan Kelep denga.

"Kareh aku pahata akam hindai nger" kuan Balawao sambil mambungkus panginan akae.

"Are terima kasih ih nger. Hong kueh eka tege danum je tukep hetuh tege nger?" Kuan Kelep hindai.

"Haw iyohlah nger ikau dia tau keju bara danum. Dia lalau kejau nger tege sumur melai latuh je dia ati puji keang hete" kuan Balawao manyarita akae.

"Taukah itah ture akan hete nger?"

"Ela je ture melai hete mangat ih ikau nger dia hakejau kue amun ikau maku" kuan Balawao.

"Kareh ture helo nger cucuk atawa dia aku hete" kuan Kelep.

Balalu ewen due haguet hindai manalih sumur je kuan Balawao endau. Sampai hong hete Kelep ture-ture laka sumur te cucuk akan eka melai tukep hete, balalu ie melai into hete. Baminggu-minggu ie melai hete kanatek tau dumah Balawao maja ie akan saran sumur te sambil balaku danum sumur te gawi ewen pander-pander sasar rapat ewen due te hakawal jadi.

"Dia pire ampi amun manumun tanda je gitangkuh itah toh cagaran tame wayah ujan hindai" kuan Kelep dengan Balawao te.

"Sama ih ampi gitangkuh nger kute kea" kuan Balawao

"Dia pire andau ih hindai toh ampi" kuan Kelep.

" peda belai itah kea santar pandang tarus ujan kea hindai" kuan Balawao dengan Kelep ewen due sama munduk melai sare sumur te.

"Pasti rami lauk hetuh nger amun jadi wayah ujan kareh" kuan Kelep denga.

"Puna are hetuh nger gawi amun wayah ujan kareh hetuh jadi luaw ih" kua

"Bada'i ih ampi nger laka batang kayu kau watas kagantung danum sulak" kuan Kelep.

"Terai nger halemei jadi handak bulu ih aku helo" kuan Balao.

"Babuah nger melai jalan. Maja hindai nger" kuan Kelep denga.

"Iyoh nger" kua

Riwut dia ie tarus miar ije puntung andau, pandang dia ie tarus sampai ije nyelo ganti awi riwut je teneng. Kute kea wayah pandang nangkiri dengan wayah ujan, jitelah ampin kuasa Hatalla matur alam semesta. Ujan muhun je panyulak hayak nyaho riwut barat tuntang kilat. Danum ujan muhun sama nusuh bara ngambu kanih manata kare dawen kayu je balayu, manyuang kare akan kare darak petak tuntang mampelom sungei je kakeangan hindai.

"Terima Kasih Hatalla, kutuh ujan Ayum jadi muhun manata biti berengkuh sampai bisa" kuan Kelep hamauh kabuat sambil menda andau ujan je labat tutu te.

Ujan muhun jatun tende bara hanjewu sampai hamalem sambung hindai hanjewu merau-merau sinde sampai kadue katelo jatun tende. Hanjulu ih ujan mawi pandang je tahi te nihau nangkiri dengan banjir are metu je buseng matei. Metuh te Kelep lumbah eka hanangui ngaju-ngawa. Kilenkah ie sana tapikir dengan kawal Balawao te gawi gita danum te mias kagantung. Balalu ie hanangui manalih akan eka Balawao bahut melai. Sana sampai hete nanture lilap kana suhu te kea.

"Kuehkah kawal te?" Kuan kelep mamikir.

"Oh nger kueh ikau?" Kua mantehau.

"Oi aku tege intu hetuh nger" kuan Balawao te je tege hong ije tetek batang rigut-rigut kasadingenan kana nata ujan.

"Haw kilen je ikau hekau nger?" Kuan Kelep sambil hanangui tukep ie.

"Ye nger junyu aku gawi suhu te je nyalenga tutu baya sampet akan hetuh ih aku nger" kuan Balawao te denga.

"Oh... jamen ih nger kareh aku manjuju tetek batang toh akan saran petak kanih mangat ikau tau nampa sarangam je taheta hindai" kuan Kelep te balalu manjuju batang te.

"Kayah nger manderuh ikau aku toh" kuan Balawao denga.

"Dia narai ih nger ikau puji kea mandohop aku bihin, jaka jatun ikau mandohop aku bihin tau matei hindai aku jadi nger" kua Kelep sambil manjuju batang te akan saran petak je sadang kea kakejau kelep manjuju batang te.

"Are terima kasih nger ikau jadi mandohop aku, jaka jatun ikau nalih aku te tau matei kea aku nger" kuan Balawao je jadi lumpat akan petak.

"Itah harus baterima kasih dengan Hatalla je jadi mambuka atei itah kue nger" kuan Kelep denga.

"Iyoh nger. Permisi ih aku helo nger handak manggau ekakuh ngalasut bitikuh helo gawi sadingen angat jadi" kuan Balawao hindai.

"Takkan bei nger" kuan Kelep denga kea.

Kutelah Kelep dengan Balawao te hakadohop hong kare kasusah. Narai taluh je nawur jite kea taluh je ingetem. Amun itah manawur gawi je bahalap pasti itah supa baleh je bahalap kea dia ie hambet te tapi pasti hong ije katika. Beken amun itah manawur taluh je papa tau hambet te kea arep supa baleh je papa kea, gawi hong dasar taluh je papa te labih purah manampa bara je taluh bahap. Ela heran taluh je purah te labih are je manggawi bara bahali. Sama kilau metu melai lewu je hababaka tuntang babehat atei mandohop Kelep metuh te ewen are matei gawi suhu bara ngaju, gawi ewen dia olih hanangui malawan dehes je karas kute awi beken kapatuh.

Kutelah pahari itah je melai Betang toh uras dohop ih oloh je hong kasusah, biar baya ije galas danum baputi tanding je kataun arep mandohop oloh je puna tutu hong kasusah te, labih barega bara manenga ije kabawak mobil akan oloh je baduit. Ela kea barangai dohop gawi tege kea kalunen je pura-pura mawi arep susah padahal panjahat uras, harus hati-hati hayak pintar-pintar nampayah keadaan amun je dia lalau beres ampi nyuhu misek akan kantor Polisi gawi ewen te je labih bawenang naharep kare penjahat.

=LEPAH=

Iyarita Awie: Sansana Sarita