Bagian kaije
Manumun auh sarita huran.
Kare metu tuntang kalunen.
Dia hamusuh tuntang hakinan.
Ewen tau belom hong ije babuhan.
Metuh jaman jite kalunen masih isut.
Tikas kuman kare sayur akan bari balut.
Dia tau kuman daging akan balut.
Gawi ewen kawal dengan kalunen je isut.
Kute kea dengan kare metu.
Ewen te dia hakaridu.
Taratur rapi bahalap tutu.
Ewen hapakat bagawi numun katau.
Atun katika hong ije andau.
Keleb Bakey ewen due hasundau.
Tahi ewen hapisah marantau.
Taharu tutu angat atei amun jadi kukau.
Balalu ewen due munduk bakesah.
Ampin panyundau tuntang tampayah.
Narai kabar nger tahi dia nampayah.
Kuan Keleb dengan Bakey je munduk gelisah.
Masih hindai bahalap kabar aku toh nger.
Masih hindai mingkes panatau karuhei.
Kuan Bakey sambil muhun akan saran sungei
Manalih Kelep je kanjera bakekei.
Sukur jadi itah baumur panjang.
Sampai tau supa hetoh limbah mangumbang.
Karuhei tatau jite sama kilau kambang.
Asal rajin bausaha dia baka puang.
Kuan Keleb hamauh dengan kawal.
Mangat Bakey bujur buah dia ma akal.
Gawi amun dia jujur dengan kare kawal.
Nampi oloh percaya dengan arep amun je ma'akal.
Sadang kea angatku je ngaju-ngawa.
Handak hapus alam dunia.
Baya rajaki masih hindai nenga Hatalla.
Manampa kapusang atei jatunti supa.
Kutelah kuan Bakey mambela.
Dia maku nyindir Kelep iye je maakal kea.
Iye mansanan arep jadi ngaju-ngawa.
Marak tanjaru je menter batiruh melai huma.
Kutelah auh ewen due bakesah.
Sambil hasindir tuntang hatumbah.
Peda belai bakey angat jadi kalah.
Keleh mubah pander mangat dia kana salah.
Metuh ewen due bapander bakesah.
Hong upun kayu sambil manggau tampayah.
Sana tege ije batang pisang bahantung akan tumbang arahah.
Lembut pikiran Bakey sana nampayah.
"Nger, kue busik batang pisang te ih yu?" Kua mamakat Keleb te.
"Hau tau nger kue mimbit batang pisang te akan hetuh" kuan Kelep je tege pikira kea nanture batang pisang je bahantung te.
Batang pisang te baya ije kabatang.
Je dia lalau hai tuntang dia lalau panjang.
Pahayak danum teah je akan tumbang.
Hambuenkah bahantung sama dia katawan.
Ewen due balalu sewu akan sungei.
Manambang batang pisang mahakan nangkalau bewei.
Sambil hanangui Keleb dengan Bakei.
Mimbit pisang te je akan saran sungei.
Sana jadi sampai saran ewen due nanture.
Ampin batang pisang je imbit ewen due te.
Dia lalau hai tapi behat masinde.
Dia olih bakey metu amun kabuat batang pisang kalute.
"En kue mambagi batang pisang toh nger" kuan Bakey dengan kelep lembut pikira nanture te.
"Takkan akam ih nger" kuan Keleb santai ih hamauh.
"Dia adil amun je akangkuh uras gawi kue je supa toh maka harus bagi due kea pisang toh haru adil" kuan Bakey mancoba bijaksana dengan kawal te, padahal gawi dia olih metu kabuat tuntang jatun akal marima cara je beken.
"Amun je kute kuam barangai ih nger" kuan Keleb denga hindai.
"Nunggu helu nger aku manduan pisau hapa manetek" kuan Bakey je mules nangkeru akan taruk kayu hindai.
"Ela lalau tahi nger" kuan Keleb denga mameteh.
"Iyoh" kuan Bakei je jadi kejau kea.
Kelep puna hapal jadi dengan Bakei.
Je maksud handak maakal hong saran sungei.
Dia katawa Keleb jadi nyakula watak Bakei.
Je kadang hapangkut kadang kalahi kutelah kalahi Bakei.
Dia tahi Bakei te dumah.
Imbit pisau je nyamah-nyamah.
Puna adil amun nampayah.
Tapi dia tulus hong ateiah.
"en beteng hila kueh ayum nger?" Kuan Bakei misek Keleb.
"Amun tau beteng hila lawi ih ayungku nger, tapi mana kuam ih amun ikau handak lawi kea" kuan Keleb tumbah denga, gawi olih mamasa pikiran bakei te pasti handak manduan hila je mahian aka etue buli.
"Dia tau tumbu amun je lawi nah nger hayak ikau je puna tempun sungei jadi aku nenga bagian upu ih akam, kilen ampi kuam nger?" Kuan Bakei te apik iye ngatau keleb te.
"Uras tau ih nger" kuan Keleb sambil manunggu narai parusikan Bakei denga hindai.
Batang pisang te balalu netek gawi Bakei jadi due.
Kilau kuan pander ewen due.
Akan Bakei je hila lawi te.
Tuntang akae hila upu je babehat te.
Kutelah Bakei mimbit ayu buli.
Sampai huma iye jadi.
Balalu imbul batang pisang ayu tukep eka barapi.
Tau aku manjuhu amun aku bakulas manggau balut bari.
Kutelah pikiran Bakei dengan lawin batang pisang te.
Handak mamikir akan lauk balut ayu te.
Puna tutu kea amun je marima kalute.
Dia tau mahasil bua mahasil batang gin jadi are.
Beken hindai dengan ayun keleb te.
Iye mimbul ayu melai saran sungei te.
Gawi huma puna melai saran hete.
Pas melai likut huma eka melai marene.
Kelep mahimat bua pisang te jeha.
Mangat iye kuma dengan ewen hanak melai huma.
Sambil menter muduk kelep marima.
Kilen ampi aku mamutik bua je masak te jeha.
Genep andau kelep marima helat gawi laka sungei.
Nanture batang pisang je sasar gantung hai.
Dia baka olih aku toh mandai.
Batang Pisang je balemu hayak malisen jadi.
Kutelah Keleb manggau rima hapa mandai.
Tikas nampa tangga panjang ih jalan mandai.
Nunggu jadi masak mamua haruku mawi.
Gawi jatun je tau dohop aku je tau mandai.
Beken hindai dengan Bakei.
Batang pisang ayue jadi juhu dengan bari.
Kina lepah baya akan jandau jadi.
Narai je mikir akan kapanjang gawi puna dia tau belom je hila lawi.
Tahi benyem kesah ewen due jatun hasundau.
Bakei bakulas maja keleb kesah marantau.
Iye mubah jalana mahakan hasundau.
Dengan Keleb je dia babulu hayak babalau.
Jadi main bulan ewen due dia hatingak.
Biar rancak kelep nampayah bakei je balecak.
Tapi kilau dia iye nampayah mangat kawal dia rusak.
Sukup ih aka jadi katawan sifat bakei dia bahap.
Kilenkah hong ije andau.
Bakei maja taharu hasundau.
Dengan kelep je saran sungei hekau.
Manggau ampin narai gawi kawal jikau.
Sampai saran sungei bakei tende.
Nanture bua pisang kawal jadibatue.
Nanture ampin bua bahalap masinde.
Sampai bakei hiweh babure-bure.
"Narai kabar itah nger?" Kuan Keleb je haru lumpat bara danum maningak iye.
"Kilau bahut ih nger kabar toh masih hindai lagi je bahalap" kuan Bakei denga.
"Akan kueh ikau tahi benyem nger?" Kuan Kelep misek hindai denga.
"Kanih kate ih aku nger jarang ati tege melai lewu toh" kuan Bakei sambil munduk manukep Kelep.
"Mangat kea ikau nger tau kanih kate dia kilau aku toh je netep melai hetuh ih gawi kuh" kuan Kelep manyanjung atei kawal te dengan nada suara je santai.
"Heka kea je ngaju-ngawa nah nger, gawi haranan kasusah ih je mawi aku kanih-kate. Narai jaka je tau nah puna dia ih nger" kuan Bakei apik auh tumbah te.
"Sama ih aku gin sama susah kea ih nger baya aku hagarak lambat tuntang kataungku tikas melai danum ih. Dia olihku kea manumun ikau je ringkas tanjung tayun ayum ngaju-ngawa" kuan Kelep sambil marandah arep sambil manyanjung Bakei te.
"Beken panderku nger, dia batue ampi bua pisang ayum jadi nah nger?" Kuan Bakei.
"Iyoh nger, baya aku manunggu sampai masak ih kuangku haru mutik" kuan Kelep basanan helu-helu akan Bakei te.
"Pas ih te nger puna mangat bua pisang toh amun masak melai taruk nger,tawa tongkol te nger duam kea lah?" Kuan Bakei denga hindai je handak balaku tongkol pisang te.
"Dia nger, takkan bei amun ikau handak manduan tongkol te nger" kuan Kelep manenga akan Bakei te.
"Iyoh nger, are terima kasih ih helu nger" kuan Bakei balalu mandai batang pisang te manduan tongkol akan juhu melai huma
"Iye pas ih duan bey tongkol kau akam" kuan Kelep bara penda upun pisang te denga, sambil gutil-gutil bakei bua pisang je masih batue te.
"Nger amun masak bua pisang toh kareh aku mandai akam nger" kuan Bakei bara taruk pisang kanih manawaran jasa akan kawal te.
"Yoh, tau ih kareh nunggu masak nger aku tehau ikau mandai hindai akan kue" kuan Kelep hamauh bara penda manenga harapan akan Bakei te.
"Jamen ih nger soal kare dai-mandai toh nyarahan akangkuh ih ikau" kuan Bakei sambil bahayung akan edan kayu je tukep batang pisang te balalu muhun akan petak hindai mimbit tongkol je laku endau.
"Percaya ih aku dengam nger soal mandai toh jatunti masalah ih akam" kuan Kelep mambung kawal jite.
"Yoh nger, laka ije minggu hindai nger masak ih bua pisang toh aku nampayah" kuan Bakei denga je tege maksud tertentu uras.
Tiap kare taluh je bahalap pasti mampalembut kanahuang oloh handak tempu, gawi handak tempu nah lembut pikiran je jahat, gawi tege pikiran je jahat jadi maka lembut kea kebenaran hapa malalus kanahuang handak tempun je bahalap te, hal jite masih hindai tau nyewut penjahat gawi masih hindai manggawi baya tege jadi rencana je jahat. Kutelah pikiran Bakei metuh nanture bua pisang ayun kelep te.
"Pas ih te nger laka ije minggu kareh ikau ih akan hetuh tege ih aku manunggu hetuh" kuan Kelep je dia maku badebat te gawi tau marugi iye ih je kute.
"Jamen ih nger, aku handak buli helu nger handak pakasak tongkol toh helu melai huma" kuan Bakei denga hindai.
"Takkan bey nger, ela sampai dia bingat ije minggu kareh ikau akan hetuh" kuan Kelep ihat mampaingat Bakei hindai.
"Yo nger, salamat halemei" kuan Bakei balalu malihi Kelep hindai.
"Halemei kea" kuan Kelep te tumbah.
Kelep mangerti ih dengan bakei te je jadi mippen dengan bua pisang ayue te, baya gawi masih hindai masak mawi Bakei dia kea masih lalau baminat. Kelep bapikir kilen ampi mangat adil nahrep Bakei je lihai mandai te amun iye mimbit hadari bua te tentu dia olih iye keme anis bua pisang ayue te, kutelah kelep sambil barima manggau cara gawi kurang percaya dengan Bakei kawal tau jadi musuh kea. Sana supa ije karung melai huma Kelep balalu supa ije rencana manelak karung mangat bua balua sambil mambayang jurus Bakei je hapa mandai pisang kareh kea. kea.
Mangat dia tapahawen dengan Bakei tege alasan Kelep tumbah hindai mungki balawau je mametuk karung te, amun Bakei sampai katawan kareh je jadi bapetuk penda karung gabang te awi.
Kutelah pikiran Kelep sambil marabit karung je bahalap, meski harus manuduh Balawau je dia tawan ije-ije urusan ewen due tapi jitelah ayun Kelep hapabmambela arep.
Itah manalih Bakei je mippen jadi dengan bua pisang matur rencana je masak kea akan mangaraut bua pisang ayun Kelep te.
Iye jadi tege mancoba tuntang mahitung metuh mandai endate dia olih kea amun munda ije katundun bua pisang te atun kea rencana handak hapa karung bara huma tapi lalau nampak hindai amun kute jadi iye manggau akal mangat olih tempu bua pisang jite.
Karas kea Bakei manggau akal tikas olih kuma hong taruk ih are-are kareh jatunti ih je beken gawi tugas ayue baya mandai bewei ih, tikas kute ih je olih Bakei marima te masalah jite.
Sampai uju andau jadi Bakei mise pas maka iye haguet ih mimbit kanai je balau manalih keleb te. Hanjewu te Bakei akan saran sungei hindai maja akan eka kelep malalus janji je jadi dengan Kelep te pire-pire andau je mahalau. Sampai akan hete Bakei nanture bua pisang te puna jadi masak bahenda mippen tutu angat Bakei handak kuma sampai maneguk iweh je bala'o kanai te.
"Nampi ampi nger?" Kuan Kelep denga te je jadi helu manduk manunggu Bakei te.
"Sadang ih ampi kau, nampi kuam nger?".kua Bakei umba iye hindai.
"Ikau je mandai kau nampi kuam nger?" Kuan Kelep hindai.
"Tau ih nger" kuan Bakei siap-siap handak mandai jadi.
"Nunggu helu nger mahakan bahambur melai petak kareh bahali aku nampuna akan kue keleh ikau mimbit karung ih nger akan hunjun" kuan Keleb mawi Bakei mandam kea gawi tege kesempatan ampi akae je hakalurui dengan pikiran ayu sulak.
"Tau kea nger amun je kute kuam" kuan Bakei te dinu kesempatan hapa malalus rencana je balang, paksa iye mubah rencana je beken hindai, dia tawa iye hong rencana ayue tege rencana keleb hindai.
"Kareh kue bagi bua melai penda hetuh nger" kuan Kelep sambil manjuluk karung je jadi bapetuk te akan Bakei.
"Iyoh! Nunggu ih ikau nger aku mandai akan kue helu" kuan Bakei sambil mimbit karung te balalu mandai batang pisang te.
Bakei je puna gawi mandai te dia lalau bahali iye jadi sampai akan lawin pisang te. Sampai lawin pisang te Bakei dia langsung manyuang akan karung te bua pisang je utik jadi te mawi kelep gugup kea nanture te.
"Nger aku minjuk bua pisang toh helu lah" kuan Bakei denga je melai penda.
"Takkan bei nger" kuan Kelep tumbah bara penda upun pisang te.
Limbah jadi hamauh kute Bakei kuman bua pisang te helu sambil bapikir manggau jalan aka nangkeru bara batang pisang te. Sambil bapikir iye mutik ije hindai tapi sinde te nyuang akan karung te je batelak, gawi asik sambil marancang pikiran je papa te maka dia iye perhati karung je imbit je batelak te. Sementara te Keleb je melai penda te nampunan bua pisang je bajatu sambil mise tuntang mingkes belah, sementara Bakei je melai hunjun te kadang sambil kuman bua te sambil manggau hila jalan hadari.
"Keleh amun dia Bakei toh katawa gawi toh" kuan Keleb bapikir sambil nampunan duruh bua je baduruh te gawi.
"Nampi angat nger" kuan Keleb misek iye bara penda.
"Manis menyak nger" kuan Bakei sambil kuman ije bawak bua pisang te hindai.
"Hasil itah kue kea nger pisang toh" kuan Keleb sambil mambung Bakei te.
Bakei je jadi pikira beken mahining kute beken tanggapa.
"Tenang ih nger kareh kue mambagi melai penda kau" kuan Bakei denga mikeh Keleb curiga denga je jadi barencana handak mimbit karung te hadari.
"Iyoh nger percaya ih aku dengam" kuan Kelep sambil nampunan bua pisang je bajatu melai petak te.
Dia lalau tahi limbah te bua pisang bara tundu te jadi lepah utik bakei. Mangkeme je jadi lepah te Bakei balalu akan rencana ayue nangkeru manalih edan kayu je tukep hete limbah te nangkeru hindai akan edan kayu je beken.
"Hau... nger akan kueh ikau kue bagi bua nah hetuh" kuan Keleb maksud mangat mambagi bua je jadi nampuna melai petak te tapi Bakei jadi sala pikira maka balalu uras sala ih je maksud kawal je bahalap te. Bakei tarus nangkeru mangejau mimbit karung je puang te buli akan huma hong parak kayu kanih.
"Pasi kawal sala paham handak mangakat malah iye rugi kabuat" kuan Keleb mimbit buli bua pisang te akan panginan ewen hanak melai huma.
Bakei je jadi sampai huma jadi marak ngih-ngeh tahaseng hadari mimbit karung je puang te handak kuman bua pisang hindai. Iye mukei karung te balalu tarewen iye ture karung je imbit te bapetuk ije kabawak bua pisang gin jatunti tisa hete.
"Itah handak manipu iye malah iye je manipu aku sakalinya, kirang kea Keleb jite kana aku gawi sinde toh" kuan Bakei ngarunum kabuat gawi rencana uras baya ije ih je sampai kuman bua pisang melai taruk.
Padahal amun itah marima hindai dia olih bakei metun ije katundun bua pisang kecuali amun sejenis Kahiu, Beruk atau je beken ih, kutelah amun aku nantuani kahain metu tuntang ehat ije katundung bua pisang mahi amun je subur tentu labih babehat hindai.
Kutelah amun atei jadi serakah.
Handak manduan palepah-lepah.
Sampai dia atie nampayah.
Karung je batelak je hatandipah.
Sampai helo keleb dengan Bakei.
Mudahan itah uras manduan kahalap bara sarita je jituh akan pangingat hong pambelom itah uras.
Iyarita Haluli Awie: S.S
