Kelep Dengan Bakei Bagian Kadue

Bagian Kadue

Metuh hong status je helo puji kea aku nyarita jadi hong hetuh KELEP DENGAN BAKEI je Bakei tarakhir mandai bua Pisang ayun kelep.
Mimbit karung akan lawin Pisang kanih dia ie katawa karung je imbit te jadi batelak penda gawi Kelep.
Tiap Bakei maname bua pisang te akan karung tarus bajatu akan petak tuntang langsung nampunan gawi Kelep je manunggu melai upun pisang te.
Bakei dia katawa taluh jite, sana lepah bua pisang bara tundu te ie balalu nangkeru akan edan kayu balalu hadari manamput karung je puang te.
Sampai huma haru ie katawa karung je imbit te jadi batelak penda, kejadian jite mawi Bakei rahas hayak mahamen angat hasupa dengan Kelep hindai.
Sampai hete sarita hong bagian je kaije.

Batang pisang manak bara bongkong nyalundik belom nangkiri indu.
Kute kea pisang ayun Kelep te manak kea gawi puna subur petak eka mimbul bua te.
Jadi sadang katahi sadang kea kaha'i pisang jite manungkol mamua kea hindai.
Batang pisang je gantung hayak kelep dia tau mandai tuntang puna beken panginan ayue kea je bua pisang te.
Baya gawi ie handak kuman bua ih je sampai pelom bihin hete, mahimat oloh beken je tau manda'i tuntang hakun manenga ie perse.

Kelep puna je tempun upun pisang bakei tempun bua pisang. Puna bujur Kelep je mimbul pisang baya iye dia tau manada'i manduan bua, Bakei puna jatun mimbul pisang baya ie puna apik manda'i hayak puna panginan ayue bua pisang.
Tanding tampenga te KELEP TEMPUN BATANG PISANG BAKEI TEMPUN BUA PISANG, itah baya tempun petak danum oloh je tempun panatau.
Handak angat Kelep kakutuh-kaka'i umba pisang te ie puna dia tau manda'i, handak ie mangirut maneweng batang pisang isut-isut dia ie harati maneweng mawi tau matei kana enyet batang pisang, paksa mana ampin asie oloh je mutik bua manenga akan Kelep.

Hong kueh eka tege kanahoang hong hete kea eka tege masalah.
Hong kueh eka tege kanahoang hong hete kea eka kelemahan tege.
Masalah te tege awi tege kelemahan arep tuntang tiap biti pasti tege kelemahan.
Mimbul batang pisang je dia tau ie mutik bua padahal ie handak tutu kuman bua pisang te, hetelah eka kelemahan Kelep jadi.

Jadi are bulan Bakei jatun maja Kelep hindai limbah kejadian bua pisang huran.
Kilenkah hong andau te je balawa hayak barasih Bakei dumah akan saran sungei te hindai.
Matuh katika te Kelep kanjera munduk melai sarang sungei nampayah ampin danum sungei je mahasur mimbit kare rutik tuntang batang akan tumbang te.
Nampayah Bakei je dumah bara taruk kayu te Kelep balalu maningak kawal je jadi tahi dia hasupa te.

"Oh... nger narai kabar?" Kuan Kelep denga.

"Kabar bahalap ih nger kilen ampi dengam nger?" Kuan Bakei sambil manalih ie.

"Kutuh-kutuh ih ampi aku toh nger" kuan Kelep.

"Haw... masak ampi bua pisang itah toh nger" kuan Bakei manyewut 'pisang itah' gawi mipen dengan bua pisang je masak malendang ayun Kelep te.

Kelep mengerti ih maksud bawak pander Bakei te, baya iye puna dia tau mandai sama kilau oloh dia tawa ih mawi arep.

"Iyekah nger... masakkah jadi ampi?" Kuan Kelep denga.

"Iyoh nger, kilen je dia ikau mutik?" Kuan Bakei pura-pura dia katawan Kelep je dia tau manda'i batang bua te.

"Lagih jatun panankuh nger mutik gawi aku laya ngaruhi katahin toh tau hayal sampai kaput" kuan Kelep manenga alasan akan Bakei te.

"Haw... ela ikau laya-laya nger tau lepah kinan kare burung Pandan ih bua pisang je jadi masak kukau" kuan Bakei je sama ha'i belai nanture bua pisang je masak malendang ayun Kelep te.

"Amun je kute takkan ikau mandai akan kue nger, kareh kue mambagi melai upu. Gawi biti berengkuh masih heka angat limbah ngaruhi endau" kuan Kelep denga.

"Sabujur aku toh bakulas je pisang toh nah nger gawi malisen batang tapi ayoih aku mandohop mandai akam nger." Kuan Bakei bele-bele mawi auh dengan bua pisang te.

"Takkan nger, babuah mandai nger" kuan Kelep.

"Ah... nger ela ikau pikeh aku. Tege karungkah nger je kilau huran nah?" Kuan Bakei denga manyindir Kelep te.

"Jatun nger... panjatu-panjatu ih nger kare bua te kareh aku nampuna akan kue" kuan Kelep denga.

"iyoh ih, nunggu melai penda ih ikau nger nanture duruhah" kuan Bakei balalu mandai batang pisang te.

Sana sampai jadi melai lawi Bakei balalu hamauh hindai.

"Helo aku keme ije ngerlah?" Kuan Bakei denga.

"Takkan bei nger" kuan Kelep te denga.

Balalu ije kabawak kinan gawi Bakei te jadi melai taruk, lepah ije kabawak ije hindai kabawak hindai kina.
Nanture gawi Bekei je kute Kelep balalu hamauh denga bara penda.

"En nger kalampi nah?" Kuan Kelep bara upun pisang te.

"Dia lalau terus angat jite endau nah nger helo aku keme ije hindai" kuan Bakei sambil mutik bua pisang ije hindai.

"Boh leha je keme maka keme nah nger?" Kuan Kelep denga.

"Isut ih aku keme nah nger ije ih gitam toh ije ih haru" kuan Bakei sambil mantajuk ije kabawak bua pisang je imbing hong lenge te.

"Laku akangkuh nger ije" kuan Kelep balaku dengan Bakei.

"Kareh helo nger lagih heka angatkuh" kuan Bakei sambil manyipa bua pisang te hong nyama.

"Te akam keme eweh manyuhu ikau mimbul upun pisang bihin amun beken bara aku toh" kuan Bakei hong atei tapi hong bau serius ih ampi dengan Kelep te dia maku ie mampalua kutak je papa.

"Laku ije nger akangkuh" kuan Kelep balaku asie dengan Bakei te.

"Kareh helo nger, nunggu bei ikau penda hekau tege ih aku panjatu akam nger" kuan Bakei balalu mandukang para mamani Kelep te.

"Toh ie nger nyambut" kuan Bakei balalu.

"Plub"

Bajatu tai Bakei te untung lapas bara biti Kelep te.

"Haw... leha nger sana mamani ikau bara taruk pisang hekau" kuan Kelep denga.

"Ela kute nger manuduh aku je heka-heka jadi mandai toh, maka bua pisang jadi panjatukuh akam akan kueh ikau nyahuka?" Kuan Bakei sambil mangkilik akan penda.

"Leha katulas muh nger te dia tai gitam?" Kuan Kelep sambil maninjuk akae.

"Gitangkuh ih jite je ta'i en nah baya aku ih kuam je tau mamani hong penda andau toh nah nger? Diya nger amun ikau dia pecaya tau ikau manyingut parakuh toh sama dia eweu dengan ta'i te" kuan Bakei sangit-sangit bara taruk pisang gawi manutup kasala handak manang.

"Iyoh bei beken ta'im jite, laku ije hindai bua piasang akangkuh" kuan Kelep denga.

"Diya aku nger manenga ikau gawi ikau jadi manuduh aku mamani ikau kuam endau"

"Aku ngangkira ih nah nger"

"Tambuhus pa'i tau nunda tambuhus kutak pander dia tau nunda hindai. Pehe ateikuh jadi gawi nuduhmuh aku endau" kuan Bakei manahan kamanang ayue je jadi supa te.

"Leha je kute nah nger maka aku je tempun batang pisang toh kilen je dia ikau manenga aku" kua dengan Bakei.

"Eweh je handak manduan batang pisang ayum tatap ayum ih batang pisang jituh sampai iye basetuk balihang" kuan Bakei sambil kuman bua pisang hindai.

"Amun batang ayungkuh nger bua kau ayungkuh kea"

"Puna ayum baya gawi ikau manuduh aku je mamani te bua pisang toh akan danda aku balaku" kuan Bakei manjelas akan Kelep hindai sambil kuman bua pisang te.

"Laku upak barangai nger" kuan Kelep denga.

"Mmhhh... diya tau upak gin mahi kamangat, ikau je manuduh aku barangai jadi" kuan Bakei je supa kelemahan ayun Kelep te.

"Ka'i katulas muh ikau nger dengangkuh" kuan Kelep balalu balua tangis .

"Ngui... ngui... ngui... ngui.." tangis Kelep te sambil mananjung malihi upun pisang te. Sambil tungui-tungui manangis Kelep mananjung manukep ije batang je jadi balihang hayak rebuk. Melai hong rumbak kayu rebuk te tege ije kungan Kala je kanjera batiruh gawi hamalem iye satiar manggau pangina. Mahining auh tangis tatum Kelep te Kala te takisik balalu balua bara saranga.

"Narai mawi ikau sampai manatum kukau nger, eweh je matei?" Kuan Kala marak randang-randang mata gawi nahapas angat tiruh.

"Ye Bakei kuman bua pisangkuh maka nuduh macam-macam aku hindai balalu aku kana danda gawi bua pisangkuh akan ganti" kuan Kelep manyarita akan Kala te.

"Narai kagila auh Bakei jikau, helo aku manyuntik akae ie te" kuan Kala manggayar balua manda'i akan likut Kelep te.

"Yo ancap agah aku nalih iye akan kanih" kuan Kala marentah iye.

"En taulah bahasil gawim toh nger?" Kuan Kelep balalu mangayar mules hindai.

"Jamen ih nger kareh ikau ture ih lewu liau Bakei jikau andau toh" kuan Kala denga.

Melai taruk Pisang Bakei kanjera mangat-mangat kuman bua pisang sambil nyanyi-nyanyi iye kuman bua te.

"puna mangat kea bua pisang je ayun oloh toh manis menyak tutu angat" kua hamauh kabuat.

Bakei te sambil santah-santah laka palapah pisang nanture akan langit je barasih ampi sambil kea nyama kuman bua pisang te.
Metuh kanjera ie je laya-laya kute sana haminyit batu bawak kana katip tuntang buntut Kala je jadi mandai akan hunjun te kea.

"Wakaaii..."

Kuan tambawai Bakei te palus bajatu akan petak, hong petak Kelep je jadi mamasang biding bangkong je batekang hayak banyihi te palus pas kana takuluk Bakei te mampacapat pampatei Bakei te kea.
Bakei te jatun auh balalu matei tindas hete kea gawi ewen due Kala te.

"Te lewu liau kanih jadi ie" kuan Kala dengan Kelep te.

"Tutu kea kuam te nger" kuan Kelep denga.

"Itah maraga akae ih Bakei toh sara'i hindai oloh katawa" kuan Kala dengan Kelep te.

"Iyoh tutu kuam jadi masalah hindai akan kue amun kalutu" kuan Kelep.

Balalu ewen due maraga biti Bakei te manganan awan gawi ewen due te.
Metuh ewen due maraga te Kelep balaku ije tulang Bakei te balalu luntuh helu palua kare sum-sum limbah te nampa akan suling bahalang.
Metuh jadi tampa suling bahalang te balalu Kelep mahimu bahalap auh pahiu.

"Apik tutu ikau manampa ngerlah" kuan Kala te denga.

"Ihatkuh mancuba ih nah nger mahasil akae tulang Bakei je jadi matei" kuan Kelep te denga.

Te maka te ih auh lagu Kelep te ije andau-andau alem-alem iye pahiau suling bahalang ayue.
Rami tutu kamea pahiau suling te sampai baminggu-minggu ie gawi te.

Kilenkah sana tahining gawi ije kungan Beruk bara taruk kayu auh pahiau suling Kelep.

"Kahalap auh pahiu suling ayun Kelep toh, helo ah aku manakau akae" kuan Beruk te sambil nantuani Kelep te bara edan.

Metuh jadi peda belai mahimun suling te Kelep mandak hong penda uru balalu iye sewu akan sungei hindai mangaruhi sungei mangga pangina.
Metuh kanjera lihi te Beruk manakau suling ayun Kelep te balalu namput akan taruk edan kayu kanih sambil iye mahimun suling bahalang je bara tulang bakei te.

"Ngut... ngut... ngut.. suling ringut-ringut bakei matei ahang bajatu bara taruk pisang kana buntut gawi Kala bajatu akan petak tahampas biding bangkong kelep. Nguut... ngut... ngut..." kuan Beruk malagu akae hanjak atei Beruk je tau main suling te kea, te-te kea Beruk te mawi lagu suling lulang luli.

"Ngut... ngut... ngut.. suling ringut-ringut bakei matei ahang bajatu bara taruk pisang kana buntut gawi Kala bajatu akan petak tahampas biding bangkong kelep. Nguut... ngut... ngut..."

"Haw leha je kilau sulingkuh auh je mahiau te kilen je dengan Beruk lawin edan kanih" kuan Kelep balalu nanture ampin suling ayue je nyahuka melai parak uru hete.
Narai je gau hete hindai je jadi jatun nakau awi Beruk akae.

"Diya sala hindai puna ayungkuh kea ih je dengan Beruk kanih ampi toh" kua hamauh kabuat balalu manalih akan upun kayu eka Beruk je mahimun suling te.

"Oh... nger bahalap auh pahiau suling jikau lo?" Kuan Kelep denga.

"Puna bahalap tutu nger suling toh bahalap bara ayum hindai ayungkuh toh" kuan Beruk denga.

"Bara kueh ikau supa ayum nger?" Kuan Kelep denga.

"Jatun kare supa ayungkuh toh nah nampakuh" kuan Beruk denga.

"Oh... yekah bara narai ikau nampa ayum kau nger?" Kuan Kelep.

"Bara tulang nger" kuan Beruk denga.

"Tulang narai nger?" Kuan Kelep hindai.

"Tulang yoh, je pasti diya ie bara tulang Kelep sulingkuh toh nger" kuan Beruk denga.

"Tau aku ture suling ayum kau nger?" Kuan Kelep denga.

"He' ture nger" kuan Beruk sambil mantajuk akae suling te.

"Dia terus nger coba tukep-tukep hindai" kuan Kelep denga.

"Akan naraimuh kea ture mawi ikau mipen dengan sulingkuh kareh" kuan Beruk denga.

"Tege barang itah je bahalap santar ipen oloh tarus deruh kea kutuh" kuan Kelep hong atei.

"Diya je aku kare mipen ayum kau nah nger baya suling jikau nah ayungkuh je nakaumuh bara parak uru hete andakuh endau" kuan Kelep hindai je jadi lepah kasabar.

"Barangai sewut ikau dengangku akan duekuh manakau ayum suling je matekiyapi ayum te" kuan Beruk denga.

"Amun je ikau diya manakau ayungkuh buhen ikau je dia maku parahan suling ayum akangkuh?" Kuan Kelep dia maku kalah.

"Mana aku ih handak diya aku parahan akam handak naraikah ayungkuh kea jatunti kare hubunga dengan suling ayum" kua Beruk beteng edan kayu te.

"Diya iye sala hindai puna ikau ih je manakau sulingkuh jadi. Diya hadat maka endau metuh aku manyuling ikau jatun ati mimbit kare suling gitangkuh sana lihikuh hanjulu ngaruhi sana tege ikau musik suling. Maka nampam hindai kuam dia baka kanjulu te manampa kare suling tikas manakau ayungkuh ih ikau ara jadi" kuan Kelep dengan Beruk te.

"Mana kuam ih Lep manyapa Langit je jatun batihang awan je jatun batali ikau hekau" kuan Beruk denga balalu pahiau suling hindai.

Tungui-tungui hindai Kelep manangis sambil mananjung akan saran sungei hindai.
Hong saran sungei te tege ije kungan Katam je lagih kanjera masa katip.
Mahining tangis tatum Kelep te Katam te balalu maningak Kelep te.

"Narai mawi ikau nger je tangis tatum sinde ampim" kuan Katam maningak iye.

"Beruk te manakau sulingkuh namput akan lawin katu kanih nger" kuan Kelep sambil manangis.

"Suling je usikmuh bahut nah kah nger?" Kuan Katam denga hindai.

"Iyoh nger maka jite suling kasayangankuh" kua dengan Katam te.

"Leha kapuru Beruk kalute dengan itah je belom hong danum toh. Helo akae aku manda'i mangutip bawak Beruk te hapa Katipkuh toh mangat iye katawa kanyihi katip Katam toh" kuan Katam te rahas jadi mahining taluh gawi Beruk te je barangai mawi Kelep.

"Nampi nah tau ikau manda'i batang kayu nah nger?" Kuan Kelep dia lalau yakin.

"Jamen ih nger amun sual manda'i masih olihkuh ih manalih Beruk je benteng edan te" kua dengan Kelep.

"Tuntang ikau nutup bitikuh helo hapa dawen kayu nger" kua hindai.

"Buhen je kute nah nger?" Kuan Kelep misek hindai.

"Amun aku diya manutup bitikuh hapa dawen nger sana gitan awi Beruk aku gayur-guyur mananjung melai edan kayu tau hingkat ie bahali aku mangatip bawak" kuan Katam denga manjelas.

"Iyoh bujur kea kuam te nger gawi itah toh metu je melai petak danum eka diya puji kare mandai kayu gantung" kuan Kelep denga.

"katawam auh jadi ancap nutup bitikuh hapa dawen ih nger" kua manyuhu Kelep te.

Ancap ih Kelep manutup biti Katam te hapa dawen kayu sana jadi Katam ewen due te balalu manalih akan pun kayu te.
Sana sampai hete Katam balalu nampara manda'i batang kayu je eka Beruk manyuling te.
Metuh katika te Beruk hayal manyuling sambil daka-daka melai edan kayu te ngut-ngut iye manyuling te.
Rangkah-rangkah Katam manukep bawak manintu katip mangumpul sakalepah belai.

"Kap"

Katip Katam sakalepah belai mantakan bawak Beruk te.
Narai ie balalu nangkujung tarewen dia bingat ije-ije hindai je iye je lawin edan kayu kanih.
Narai ati balalu pirip-piring jatu bara lawin kayu pas duruh kana baner kayu diya mampelom iye je pusit takuluk te balalu mahutus hete ih Beruk je manakau suling te.

"Te akam keme ikau je manakau sulingkuh nah" kuan Kelep je nanture te.

"Te iye nger handak manawah itah nyewut dia tau manda'i kua gawi santar maneser hong danum" kuan Katam denga.

" itah mamapui akae ih nger Beruk toh" kuan Kelep denga.

"Haw kilen je kare mapui hindai nah nger?"

"Manganan awan itah nger mangat diya akan jadi masalah akan rahian andau hindai" kuan Kelep denga.

"tau kea nger amun je kuam kukau" kuan Katam denga.

Balalu Beruk te mapui ewen due ewen akae sampai jadi buring daging tuntang tulang jadi kapur simpa nampa Kelep.
Sana jadi tampa kapur te balalu imbit Kelep bajual akan lewu te.
Sana hong benteng jalan iye supa dengan kawan Beruk je rami ampi.

"Oh nger... en ketun diya handak mamili kapur sirih toh?" Kuan Kelep nawaran akan ewen te.

"Haw tau pas sinde toh tisa isut kapur sirih ikei. Pire ampi rega nger?" Kuan Beruk te muhun manalih iye akan petak.

"Mana ketun ih manenga aku rega nger" kuan Kelep te, ye borong ewen palepah kapur jite.

"Oh nger tege ikau mite kawal ikei melai saran sungei kanih nger?" Kuan ije misek sambil manyimpa sirih hapa kapur tulang beruk te.

"Tege nger aku ture male hayak jajuan iye muneh sulingkuh balalu nengakuh akae" kua.

"Limbah te akan kueh hindai ampi iye hindai nger?"

"manda'i akan taruk kayu hindai mimbit suling je nengakuh akae te, buhen?" Kuan Kelep hindai.

"ye ikei manggau iye gawi bara male jatun buli-buli akan huma" kuan ewen hindai.

"Jikau maka diya tawa hindai aku" kuan Kelep dengan ewen te je mangat ampi manyimpa te.

"Iyoh ara amun kute permisi ih ikei toh handak manggau iye hindai" kuan kawan Beruk te denga.

"Takkan bei aku gin handak buli kea, mudahan ketun jeleng supa ih denga nger" kuan Kelep denga.

Balalu kawan Beruk te manda'i akan taruk kayu hindai.
Ewen Beruk te dia katawa kapur je haoa ewen manyimpa te nampa Kelep bara tulang kawal je gau ewen te.
Kelep balalu mules buli akan huma hindai sambil nyanyi iye mananjung buli te.

"Kapasin-pasin kawan Beruk manyimpa hapa kapur tulang tathu hiang'ah" kuan lagu Kelep te sambil mananjung.

Seneh-seneh ewen kawan Beruk je simpa te lagu Kelep te.
Sana sadar balalu tarewen sabanen muta bara nyama uwek-uwek muta uras gawi haru katawa kapur je jual Kelep akan ewen te bara tulang kawal ewen je nihau matei jadi te.

"Lehan-lehan kea itah toh manyimpa hapa kare kapur bara tulang kula itah kabuat" kua sambil tarus muta gawi lalau kakaren muta tarus balalu kawan Beruk te matei uras balua kare gambuh kanai awi muta tarus.

Mahining je kute kawan Beruk dengan Bakei hapumpung pakat mambaleh dengan Kelep.
Gawi Kelep gawi jadi manampa suling bara tulang Bakei manampa kapur simpa bara tulang Beruk.
Metuh ewen kanjera kumpul are kute dumah ih Kelep bajual tisa kapur hindai.

"Kapur.. kapura.. kapur... kapura..." kuan Kelep manawara.

"En diya bahandanglah ampi warna?" kuan kawan Bakei Beruk je kumpul te.

"Bahandang" kuan Kelep dengan ewen.

"Tutu ampi" kuan ewen nanture te.

Rami ewen Beruk Bakei mamili kapur te sampai tege je hatakian barabut mili kapur te.
Diya bingat hindai je tujuan ewen kumpul hete mamutus tindakan akan Kelep te.
Lepah kapur mili ewen Kelep mules buli akan huma hindai, gawi kasanang angat atei kelep te balalu ie nyanyi-nyanyi jalana buli.

"Kapur... kapura... kuman tulang kula... kapur... kapura... kuman tulang kula..." kuan Kelep nyanyi-nyanyi hapus karatak te gawi.

"Haw.. haw.. rima puna tutu iye kau je jadi mampatei kawal itah toh" kuan kawan Beruk te.

"Ye auh kau itah manekap akae ie kau" kuan kawan Bakei hindai.

Ye nekap ewen Kelep je rangkah tanjung te balalu imbit ewen manyidang akae.

"Bujur ikau puji nampa suling bara tulang bakei je pateimuh melai upun pisang?" Kuan Bakei misek masalah ayun ewen.

"Bujur ih aku je nampa suling bara tulang Bakei baya bekwn aku je mampatei, iye bajatu kabuat bara taruk pisang helu takuluk metuh katika aku palikir arepkuh pas kana takuluk bidingkuh." kuan Kelep manjelas akan ewen Bakei.

"Tutu je kuam nah Lep?" Kuan Bakei misek iye hindai.

"Tutu akan duengkuh nanjaru ketun" kuan Kelep.

"Bujur kapur jualmuh akan ikei toh nampam bara tulang kawal ikei?" kuan Beruk hindai misek iye te.

"Tutu ih baya beken aku kea mampatei metuh te ie mimbit sulingkuh akan lawin edan kayu kanih sambil mahimun sulingkuh te. Kilenkah metuh iye laya pahiu sulingkuh te sana bajatu bara lawin edan te pas jatu kana baner balalu matei ih iye hete" kuan Kelep manjelas akan ewen uras.

"Ye balalu mapuimuh nampam kapur tuntang jualmuh akan ikei toh" kuan Beruk hindai denga te.

"Iyoh" kuan Kelep tumbah.

"Natal ih akae parutek Kelep toh" kuan ewen are hamauh sambil mimbing edan kayu belah jadi.

"Narai je natal ketun je aku tohnah. Puji aku natal nepe kijak Hadangan, Sapi, Badak jadi gitam baya maruak usukkuh ih nyarena mahi je kekuatan ketun je kukau mampaheka arep ketun ih dengamgkuh toh" kuan Kelep hamauh dengan ewen te.

"Amun kute auh tikas mapui akae ih hindai" kuan ewen handak manenga hukuman akan Kelep te.

"Mahi je mapui puji telo andau telo alem gitam baya sale likutkuh ih gawin Apui" kuan Kelep mananjaru.

"Gawi uras puji ie jadi narima hukuman te tikas jakah akae iye toh" kuan ewen

"Ela aku dia bahanyi" kuan Kelep.

"Jakah akan danum" kuan ewen belah.

"Iyoh jakah akan danum ih" kuan ewen hindai.

"ngui.. ngui.. leha.. leha katulas ketun dengangkuh aku jatunti kare kasalangkuh dengan ketun kawal ketun te je manakau pisangkuh manakau sulingkuh nguii... nguii..." Kelep balaku asie-asie tutu mawi arep.

"Ela ketun mahining auh ancap jakah akae iye akan sungei kau" kuan belah mawi.

Balalu pir! jakah ewen Kelep te bung! Kua kana danum balalu benyem.
Ture-ture ewen kawan Beruk Bakei dengan sungei te sambil hanjak-hanjak ewen jadi balalu lampang kelep te tuntang hamauh dengan kare ewen je manonton iye te.

" are terima kasih ketun je jadi manjakah aku akan danum. Are terima kasih ih kelep buli lewu... kelep buli lewu.." kuan Kelep mawi ewen te.

Kawan Beruk Bakei te balalu mandam hature bau kula tege je mugut tunjuk dia olih hamauh uras.

Inyarita Haluli Awie: S.S