Hakabeken Sarita Bagian Kadue

Bagian kadue

Hoang kutak pander je bahalap auh te jatunti kajujur, tapi tanjaru te lah je mawi oloh are je penasaran, eweh je purah penasaran iye purah kana tipu.
Tapi dia tau nyewut tanjaru amun jatunti bukti, ye dia?
Jitelah sabab harus kana tanjaru helu haru katawan jite tanjaru.

"Badosa nanjaru nah ka, mahi amun je nanjarum aku hai dosam" kuan pacaraku mangarendeng aku, bahali kameangku gau bawi je harati kute tau manenga pandangan je bahalap akan pasanga.
Entah pander te balua bara atei atau baya tipu-tipuan je pasti aku harus barendeng helu.

Gawi pujian tuntang hinaan jite ije tanda peringatan akan oloh je bapikir, lapas bara jite tatap kea hong peringatan kea.
Eweh je beken menanga paringatan akan are amun beken bara Hatalla.
Gawi katau tuntang asi dengan arep mawi je nyampai mahalau nyama oloh kalunen, diya mungkin iye manyampai manyuhu metu tau geger ije kalewu gawi tege metu je tau hamauh kutak kalunen.

"Iyoh aku dia nanjaru ikau aku baya hureh dengam tau ih lo?" Kuangku denga limbah supa gelagatku je handak tipu-tipuan hindai denga tapi iye dia setuju kabangang je kalute.

"Tau ih hureh asal ela lenge umba tekap-tekap ih" kua mawi aku.

"Dia adil! ikau ara te maka ikau rancak mangutip aku leha je ngahanam aku manggutil ikau" kuangku mamprotes denga.

"Jite gawi ikau badungil gitangku nah ka je ngutipku bahut" kua sambil harinyum dengangku mansanan bahwa iye manang pander jadi.

Susung hanjewu bapander jadi kalah mawi aku benyem tunis dia olih tumbah, awi aku puna badungil kea wajar ih kana kutip kilau kua.
Ancap aku mampelum roko mangat sibuk kesah jatun panan tumbah je kua te manenga jeda laka ije menit.

"Pea ewen mina mama kua masuh ndi?" Kuangku denga keleh mubah pander bara mangaku kalah.
Pantang manyarah kutelah samboyan itah.

"Hong Minggu jituh kea tege ewen masuh akan lewu toh, ikau handak maja misek aku lo?" Kua hindai.

"Iyoh! Handak maja misek rencanaku en narima ewen dia yu?" Kuangku denga.

"Tentu narima ewen ih ka, tapi aku dia narima ikau amun ikau jajuan mimbit ayum" kua maancam hindai mawi pehe kuluk aku amun jadi naharep bawi bahalap toh.

"Jamen jite aku pasti umba ikau ndi" kuangku sambil nampayah bau je barasih jatunti kare kepus ampi.

"Andau jadi balawa ampi toh aku handak haguet akan kampus helo" kua hindai musir aku hapa kutak je halus.
Harus aku jeleng buli mangat ela balua kutak kalute.
Haru bingat jurus tapi jadi buah pukulan jatun guna hindai.

"Aku gin handak buli kea manyambung tiruh melai huma hindai, sms aku ndi amun tege ewen mina bara ngaju masuh" kuangku balalu hingkat bara eka munduk.

"Tapi amun aku jatun pulsa tege aku mangirim inbok atawa dinding akam" kua sambil harinyum.

"Jatunti kare fbku aku nah ndi?" Kuangku denga.

"Tege ayum dusah ikau nanjaru aku hindai ka" kua.

"Ngirim bey amun ampi iye je kuam kau ara" balalu aku balua manalih motor Ninja ku je warna babilem hasil bagawi maamas melai ngaju.

"Rangkah-rangkah ih ka ela lalau laju bamotor hanjewu" peteh dengangku je haru masih hindai lalau tau hapa motor kute.
Maklum je patuh umba mobil taksi ngaju ngawa mangguang eka usaha.

"Iyoh! Yu buli aku eh haguet aku" kuangku ngambuah pander gawi amun buli arti te tulak akan lewu liau kuan oloh helu, jadi tege tengah belah mamali manyewut jite gawi tau salajur mawi.

Sampai humaku balalu mambuka kunci humaku je miliku nyelo male dengan bara oloh habasa, lumayan kea kahai huma sederhana kilau oloh kea.
Amun kare perabotan hoang puna poang ih baya tege due kabawak salon ije ranjang eka batiruh ije kipas angin tuntang tege ije gitar angin melai huma te hapaku kreceng-kreceng.
Gawi humaku rancak lihiku bakulas aku maisi mawi mippen maling bigal hindai nampa masalah akangkuh.
Sampai huang huma aku balalu akan kamar pelum kipas pahiau lagu melai salon balalu menter melai ranjang jadi Palui gawi.

Dia lalau tahi aku ngambutep tiruh-tiruh manuk sana tege ewau harum melai kamar.

"Pasti tege kambe toh" kuangku mamikir eweu harum te.

"Nauh ih aku dia mangaraen ewen aku baya umba batiruh melai hetuh" kuangku sambil kambutep marima ewau harum te sampai aku tatiruh hanyut dia tawan ije-ije hindai.

Kuan oloh bakas batiruh hanjewu dia bahalap akan kesehatan purah kana panyakit tapi aku puna kurang tiruh gawi jadi 'satpam' ije alem endau.
Dia jadi masalah amun je sekali-kali asal ela nyait batiruh hanjewu kuangku madu.

"ka misik" kuan oloh marak tiruhkuh je mangat tege je purun mampisik aku balalu aku mambuka mata rangkah-rangkah.

"Kilen ikau nah dia kuliah ndi?" Kuangku misek denga.

"Dosen jatun muhun ka jadi aku tende akan hetuh nampayah ikau" kua hindai.

"Dosen je kadian tikas kuman gaji buta ih" kuangku ngomel asal-asalan gawi nihau tiruhku gawi pisik.

"Ela kicuh ka puna ih jite, jadi kare kuman mandui kea ikau nah ka?" Kua sambil nantuani aku je masih mangampuh arepku gawi andau kameanku masih sadingen.

"Hindai, buhen ikau handak pandui aku?" Kuangku.

"Narai jaka je tege penyang bue nah panduikuh ikau mangat labih harati hindai" kua sambil nantawe aku.

"Usang jadi matei jaman liau lendek huran jaka dengan amun nah ndi" kuangku mureh iye.

"kuam amun kuangku masih belom ih" kua hindai.

"Tapi..." kuangku

"Ancap mandui ih ikau gawi sasar ngalilu gitangku ikau nah ka amun hindai mandui" kua hindai je sama belom kabuat melai kota kute kea dengan je belom kabuat.

"Yoh bey" kuang balalu hingkat bara penterku.

"Ikau hakunlah ndi manggau bari balut akan kue ndi?" Kuang misek iye hindai.

"Tau ih" kua dengangku.

"Nunggu helu" kuangku sambil manduan epuk bara kantong salawarku duit lime puluh ribu akae.

"Amun kurang ikau manambah hindai" kuangku ihat ngarahas akae, tapi iye dia tumbah capat ingkes duit melai kantong baju limbah te manjuju lukap hindai akangku aku pura-pura ancap mubah tampayah kilau dia ture ih gawi.

"Assalamualaikum" kua sambil manggutil penangku mawi aku nangkakak gawi mingat tukang sadakah je kalute bahut, iye gin umba tatawe kea dengan gawi je mias-mias.

"Tege-tege ih ayum kuangkuh" sambil tatawe denga.

"Jite nah nengam endau jituh aku balaku hindai" kua sambil tatawe tapi mingkes maksud je nyata.
Tapi dia sala kea gawi akan ikey due kuma.

"Jatun duit kurik ndi" kuangku marapus iye sambil mukey epukku.

"Duit hai barangai ka" kua hindai.

"tawamlah angsul kareh?" Kuangku sambil nantawe iye.

"Jamen ih dia oloh nanjaru aku kea palingan kaka ih je rajin nanjaru aku" kua hindai mawi aku.

"Ela lalau tahi ndi babasi kareh bari balut je milim". kuangku mameteh iye je haguet.

Balalu iye mampelum motor metic ayu warna bahenda tuntang mamasang helm warna bahenda kea mawi aku tatawe hong ateiku nanture andi je baju bahenda sama kilau handak badewa.
Mawi aku bingat dengan Hatalla mangat tau basukur tuntang ela gawi sala, gawi hong dunia toh baya sementara kea uka itah baamal tuntang manggau pahala.
Itah dumah akan kalunen jatun mimbit harta panatau je tege baya injam Hatalla uka itah mangat baibadah tuntang badoa segala ujian hoang dunia toh pasti tege jalan balua.
Dia lalau tahi andiku baju bahenda balua, aku jadi mandui baganti baju pakaian melai kamar mangat bakena, dengan bawi je baju bahenda aku puna cinta handak jeleng maja misek mangat gawi dia sala tuntang badosa.

"Ulah karami oloh melai ngiwa nah ka" kuan bawi baju bahenda dumah mimbit kantong plastik melai lenge.

"Narai ampi gawi oloh melai ngiwa nah ndi?" Kuangkuh denga.

"Tege oloh tabrakan nah kuan oloh ka" kua hindai.

"En auh matei belom?" Kuangku sambil mambuka plastik je imbit.

"Dia katawa kea bakulas aku misek hindai mikeh kaka tahi nunggu aku melai huma" kua manduan petehkuh akan alasan hapa mahila.

"Tugas ewen Polisi murus jite tugas kue kuman ih helo" sambil aku mimbit panginan akan dapur maggau piring plastik je biasa, amun je halap-halap tau nakau oloh gawi kalunen are sama kilau taluh amun nanture barang je bahalap.

"Helo aku manggau dawen pisang akan lapik kue kuman" kuangkuh balalu mambuka batunggang dapur manggau dawen pisang akan lapik kuman melai piring palastik te.

"Aku nyangka kuman melai hunjun plastik endau" kua dengangku je mimbit dawen pisang.

"Diya belaikuh kea kuman melai piring palastik,  jituh nah guna pisang bakei je imbulkuh hetoh" kuangku hindai mawi iye sambil menyau dawen pisang melai leding.

"Salut aku dengam ka" kua dengangku.

"Ela lalau mambung aku aku mikeh tutu lalau gantung bara petak" kuangku mahakan pujian bara iye je balang handak mucuk aku hindai.
Tentu harus hapa cara je labih mamutar untek handak mucuk aku je talanjur humung jadi.

"Yoh bei, dia kea aku mambung ikau nah ka" kua hindai sambil nyadia eka kue kuman.

Puna rami metuh pacaran mahi amun pacar je rasuk jalan pikiran sama pengertian masalah narai bewey je nahiu uras rasuk sampai kalahi pander rasuk asal ela marasuk je lapenda bara puser gawi jite nampa dosa amun hindai nikah helo.
Gawi je barumah dia eleh rasuk huang hete bewei gawi jalan pikiran gin harus sama hong naharep pambelom berumah tangga.

"Takkan ndi ikau mimpin doa akan kue" kuangkuh denga hindai.

"Yoh, ikau mampahayak auhku ka lah" kua manjar balaku doa sahelo bara kuman.

"yoh bey" kuangku denga.

Limbah jadi kuman aku matur tiruh hindai bakulas angat mamikir marima ngaju ngawa.
Meter melai ranjang aku diya tahu-tahu hindai dengan bawi baju bahenda.

"Ka, alem kareh kue maja kawalku tege tame rumah sakit" kua mambuka suara.

"Kareh hindai ture ndi" kuangku sambil mangampuh biti.

"Amun ikau dia nauh aku ih kareh ara nanjung maja akan rumah sakit" kua mawi aku hindai.

"Iyoh barangai kea aku ngawal ikau kareh, aku handak tiruh helo dusah buli ikau" kuangku sambil ngambutep mata.

"Tiruh bey ikau ka, aku dia buli kea, aku handak parasih huma helo" kua gawi are dabu due bulan lihiku bagawi akan ngaju.

Puna gawi rajin parasih huma te.
Gawi amun huma barasih taluh rajin dumah manukep, rajaki mandai tame kutelah kuan oloh rajin mansana.
Entah jite bujur atau dia je pasti amun je barasih te bahalap akan karigas biti bereng kea.
Sampai hetoh helo sarita je nampa harian andau hindai aku mambuka sarita je beken akan basa.
Amun kutak ku are je sala ampun maaf dia ati sengaja jituh sarita akan hiburan samata jatunti maksud handak kare mancala, puna tikas kaharati ku jadi je nenga Hatalla.

Inyarita awie: S.S