Sansana Sarita Sintakuh.

Bagian Kaije.

SINTA JE DIYA SAMPAI.

Sahindai aku mambuka sarita.
Tabe manyapa je tunda kula.
Je tege bahambur to ngaju-ngawa.
Je umba mambasa jituh sarita.

Are terima kasih kea akan tunda kula.
Je jadi nenga jempol akan halaman jituh mudahan baguna.
Akan hiburan itah je rajin mambasa.
Biar dia hakasene je bau mata.

Hetuh aku handak bakesah.
Ampin pambelom je masih susah.
Mahalau tulisan toh je akan itah.
Karami hong dunia toh jatun kalepah.

Amun aku taingat hindai kukau.
Pangalaman belomkuh je jadi halau.
Metuh sakula dia kanarai kaburau.
Karami kabangang je laya-layau.

Bawi Hatue je kawal sakula.
Tege je bara ngaju- tege je bara ngawa.
Manuntut ilmu je puna penting baguna.
Mahakan sasat belom hong dunia.

Metuh jadi nampara dewasa.
Atun tiruk handak pacaran kea.
Dengan kawal sama sakula.
Aku mangkeme je jatuh cinta.

Aku hatue je dia bakena.
Hayak susah jatunti harta.
Dengan andi bawi Palangka.
Ateiku puna tutu-tutu cinta.

Bawi Palangka baputi bahenda.
Malisen bau mata sama putri raja.
Mungkinkah aku tau supa cinta.
Atau baya pehe ateiku semata.

Hatue kueh je dia mippen.
Nanture bawi je baputi malisen.
Tuntang bajenta hayak Dayak tulen.
Eka karajin kare kalunen.

Bawi Dayak puna bahalap ampi.
Bajenta kutak bijaksana gawi.
Puna kute eka karami.
Hayak iye puna are kaharati.

Aku sampai mandam marima.
Mungkinkah aku tau pacaran denga.
Gawi uras rata ampi perhatia.
Bahali ngangkira je eweh je suka.

Aku balaku do'a dengan Hatalla.
Gawi jituh cintaku je pertama denga.
Dia sala aku mancoba.
Mamander aka aku sayang denga.

Bawi Dayak puna bijaksana.
Iye tumbah dia ngampehe kea.
Aku gin sayang dengam nah kaka.
Gawi jitelah ikau nyuhuku manyonto pelajaran sakula.

Puna tame akal kea taluh je kua.
Baya aku je sala mansana.
Maksud ayungku je handak pacaran denga.
Baya bakawal kutelah je kajaria.

Gawi lalau kahai kikeh kana tolak denga.
Mawi aku dia sampai ateiku manyampai aka.
Cinta je tege hong ateiku benyemku helo nyahuka.
Manunggu waktu tuntang katika.

Bawi Palangka nanggareku ara.
Barambut babilem ngaliker bahalap ampi tampa.
Urung mancung jatunti cacat bau mata.
Kurik ih biti puna dia aku ngalapea.

Kare katau tuntang jasa.
Mandohop aku hong manggau jawaba.
Hong pelajaran sakula are dia olihku marima.
Manampa pehe kulukku amun dia olihku mikira.

Jite mawi aku jadi segan denga.
Handak mimbit iye pacaran angatku dia pantas aka.
Sampai ikey lulus SMA palus jatun aku masana.
Bahwa aku je cinta denga.

Metuh jadi lulus ikey hapisah.
Iye anak oloh je mampu manyambung kuliah.
Melai hong Bandung kutelah kesah.
Sakula Dokter jurusan bedah.

Pusang tutu angatku hapisah.
Sampai mangkutku iye metuh lulus nah.
Sanang tutu angatku lulus gawi dohop ah.
Nyangku sangit tapi iye malah ramah.

"Jadi ih"kua manyuhu aku malapas lengeku je mamangkut iye.

"Maaf, aku dia sadar sanang tutu angatku lulus nah" kuangku balalu malapas lengeku bara biti.

"Dia narai ih jatun oloh payah" kua sambil bilik-balingau mikeh tege oloh ture gawi ikey kue sambil marapi pakaia hindai.

"Kejau jalananmuh ikau kuliah" kuangku hindai denga.

"Tau ih aku sms atau nelpon ikau" kua dengangku sambil suntup.

Ikey due metuh te melai likut sakula.
Mendeng habambai nampayah bunga.
Metuh te kanjera makar warna bahenda.
Handak angatku mamutik aka tanda aku cinta.

Ikei due benyem hindai hong pikiran kabuat.
Sama benyem jatun auh hong pikiran sama babehat.
Gawi sama dia handak hapisah kutelah angat.
Metuh te aku nihau semangat.

Ujan muhun je manyalenga.
Labat masinde maka tame mandang kea.
Mambisa uru tuntang kare bunga.
Je tege tumbu melai likut sakula.

Jatun atie je mander ikei due.
Baya hatampayah tuntang hature.
Aku manduan roko bara kantong salawar metuh te.
Manganan angat kadingal angat sala buah kute.

"Rukum kau ngurang mangat tau terai" kua maningak aku metuh te.

"Iyoh ngurangkuh kea ih" kuangku.

"Ngurang tarus bara bungkus" kua manyambung panderku gawi kute kuangku bahut denga. Aku kumi-kumi ih mahining kua iye gin sama kea. Senyum untuk mencairkan suasana yang kaku dan candaan untuk menghangatkan suasana kembali.

Haluli benyem ikei due hindai.
Masalah je naharep jatunti selesai.
Handak aku mansanan akae rahasia atei.
Tapi aku mikeh tutu iye basingi.

"Kue buli ih ka" kua sana ture andau terai ujan.

"Yu kue" kuangku denga kea jatun alasan hapaku manahan iye hindai.

"Ikau narai gawim buli toh?" Kua misek hindai sambil mananjung akan selasar sakula.

"Jatunti ih, buhen?" Kuangkuh denga.

"Ikau hakunlah ngawal aku nanjung akan pasar tege je gau kuh" kua dengangku untung aku metuh te tege bahata duit je cukup are kea.

"Tau kue" kuangku denga mungkin iye handak balaku pili naraikah hong pikiranku, dia masalah ih iye rancak mandohop aku jadi kutelah pikiranku metuh te.

Ije nyelo jadi nangkalau ikey due masih rancak samsan atau telponan sambil nahiu ampin keadaan masing-masing jatunti puji kare nahiu masalah kare pacar sama sinde. Aku je manetep melai lewu malan tuntang mampelom sayur tuntang ternak kare bawui manuk, sambil mimbul kare kabun bua kea. Aku dinu petak pembagian ije kapeng tapi oloh silan handak bajual ayue miliku kea jadi due kapeng petakku je panjang due ratus kali lime puluh ije kapeng hetelah ekaku mimbul kare gita, dahuyan tuntang kare bua je beken hindai.

Hong nyelo jite aku magah ije tathuku tame SMA ekaku huran, aku magah iye mandaftar hong hete, aku supa dengan guruku huran.

"Narai gawi wayah toh?" Kuan guru olahragaku huran misek.

"Mandohop oloh bakas ih gawi pa" kuangkuh denga.

"Eweh toh pacarmuh kah?" Kua hindai misek aku je magah ije tathuku je bawi.

"Beken pa ije tathuku" kuangku denga.

"Nyangkaku ih pacarmuh endau" kuan guru jite sambil mananjung malihi aku.

Sakula puna masih libur aku ture-ture nampayah ampin sakula ikey je masih jatunti hubah ampi. Aku nanture akan kelas telo IPS ikey aku jadi taingat dengan bawi Palangka te huran lembut atun tirukku handak nampayah kelas ikey huran. Aku mnanjung malalih kelas ikey bihin te kebetulan ampi ruangan te babuka ih mawi mangat aku tame akan huang kelas te. Aku nampayah puna jatunti hubah kare posisi kursi meja te, aku balalu manalih mejaku huran munduk melai kursiku bihin mingat ampin karami metuh hong kelas te. Aku nampayah bangku ayun bawi Palangka te masih tege hong baun mejaku mangat aku mnyonto denga, lembut pikiranku handak munduk melai kursi ayue te je puna dia puji aku munduk manderuh bara huran. Aku munduk melai hete sambil ture-ture kilenkah sana bajtu rukukuh akan hila dinding te, paksa aku mandua mikeh mangehu. Palikirku meja te sana tege aran ikey due melai balikat meja te hong gambar lingkaran atei je nulis hapa tipex.
"Bujurkah iye puji nampa jituh huran?" Kuangku sambil nampayah.

Hong penda tege tulisan ayue hapa pulpen tinta babilem rangkah-rangkah aku mambasa.

"kau tak mengerti betapa aku sangat mencintaimu, berulang kali aku ingin menunggu kau mengatakan cinta padaku namun entah sampai kapan" 

Tikas kute ih auh tulisan melai sambil gambar atei te hila gantau tege kea hindai.

"Aku sangat mencintaimu dengan segenap jiwa dan ragaku" kua je hapa tinta babilem, je penda hindai hapa tintah biru.

"Cinta bukanlah untuk mendapatkan segalanya namun cinta adalah untuk memberikan segalanya"

Tapi aku je warna biru te beken tulisan ayue pasti tulisan anak olohan je harian je supa tulisan jite kea, metuh kanjera aku lagi laya hong bapikir te ije tathuku mantehau aku.

"Melai kueh ikau ka?" Kua mangau aku te.

"Tege hetuh aku" kuangku ancap manduan rokokuh je melai laseh te je jadi belep kea ampi, balalu aku balua manalih iye.

"Narai gawim hekau?" Kua dengangkuh.

"Nampayah kelas sakula ikey huran, nampi jadi selesai nah. Kue buli ih amun jadi" kuangkuh denga hindai.

"Jadi selesai nunggu pengumuman ih hindai" kua dengangku sambil mananjung melai selasar te.

Iye dumah bara ngaju rencana melai umba huma ikey ih mangat sakula tuntang tege je mangawas iye kea bahali amun melai kos atau tege maksud beken gawi oloh bakas, je pasti metuh te aku manggap iye andiku ih hayak aku puna jatunti andiku kea. Ikey due balalu buli bamotor metic akan huma ikey je cukup kejau bara sakula te. Sampai huma aku balalu tame kamarku menter melai ranjang sambil mamikir kilen ampi kelanjutan tulisan jite aku umba.

"Apakah aku harus misek denga? Dia pantas angatku misek jite, tapi dia sala kea aku misek jite denga" kuangku bapikir hindai balalu manduan hapeku handak masms iye narai gawi.

"Narai gawi toh?" smskuh aka ngirimkuh jadi limbah te menter hindai aku.

"Jam kutuh pasti iye deruh" kuangku mamikir hindai gawi jam masih bentuk andau aku matur arepku batiruh helu gawi mataku mangatuk kea.

Riwut je kancang halemei te mampisik aku bara tiruhku gawi mebu-mebus tame akan kamarku jalan basengok je babuka te. Aku misik langsung manekap hapeku mikeh tege sms balasan ayue tapi jatun ampi nanture jam 15:30 melai hapeku te balalu balua kamar aku manyaup bau mata akan dapur.

"Kayah haru misik ka Dony mina" kuan ije tathuku mansanan akan induku.

"Buhen?" Kuangku misek.

"Kuman ikau kareh haban" kuan induku je puna perhatian dengangku.

"Iyohlah sampai dia aku bingat je hindai kuman" kuangku balalu manalih eka bari panginan te.

"Balut mangat ikau dia kuman balut dia mangat ikau kuman" kuan induku sambil nanture aku kuman.

"Dia aku bingat gawi kauyuhan angatku" kuangkuh barangai tumbah ih.

"Ka hapemuh mahiau" kuan ije tathu hindai.

"nauh ih iye hete helu palingan sms operator ih" kuangkuh denga.

"Aku turelah ka" kua misek dengangku hindai.

"Duan bey" kuangkuh je sambil kuman te iye balalu mananjung manalih kamarku manduan hapeku te.

"Kawalmuh ampi je sms nah ka" kua sambil mimbit hape te akan dapur.

"Eweh ampi ara?" Kuangku misek iye hindai.

"Bawi palangka ampie ara,bukaku ih ka lah?" kua misek aku hindai.

"Basa akan itah" kuangkuh handak katawan kea sma te sambil kuman.

"Ka Don aku haru sampai melai lewu" kua mambasa sms te" eweh nah ka?" Kua misek hindai.

"Kawalku sakula bihin" kuangku denga te dia tahi aku malayan kea kuman jadi, ije tahu ku te puna rajin minjam hapeku gawi are game symbian melai hong downloadkuh jadi.

Limbah malayan kuman aku minjam hapeku je usik te handak balas sms ayue.

"Liburkah ikau je buli nah?" kuangku sms iye te.

"Yoh, kue sundaukah ka?" Kua sms aku balas smskuh te.

"Yo, melai kueh?" Kuangku mambaleh sma ayue te je tahi kea benyem.

"Melai tukep eka kue kuman bihin nah ingatmu ih lah?" kua balas sms aku te.

"Iyoh, jam pire?" Kuangkuh denga hindai.

"Jam uju alem toh taulah?" Kua dengangkuh mahalau sms.

"Iyoh bey aku handak mandui ara helu" kuangku balas sms te.

"Yoh aku gin handak mandui kea" kua sampet ih balas smsku te.

Andau jadi kaput aku basiap-siap.
Babaju pakaian je halap-halap.
Hasupa dengan bawi palangka ancap-ancap.
Gawi angatku taharu kea handak hasupa angat.

Aku haguet bamotor bara huma hamalem te kabuat.
Manalih eka janji kutelah kahimat.
Manyundau bawi palangka je taru inganang je ingat.
Pas metuh te alem Jumahat.

Aku manalih eka je injanji.
Keleh aku je manunggu mahakan balihi.
Are pisek hong ateiku jadi.
Balasu sadingen angat hapus biti.

Bintang bahambur melai Langit.
Bayangan bawi Palangka jadi lembut.
Baputi bahalap ampi dumah alem te.
Sampai handak dia kau sene.

"Dony" kua maningak aku mawi aku sampet mandam kea nanture iye je sasar bahalap ampie.

"Lia" kuangkuh rangkah ih mikeh beken iye.

"Narai kabar?" Kua sambil senyum misek aku balalu manjuluk lenge.

"Kabar bahalap ih en ikau narai kabar?" Kuangku sambil tabe denga.

"Bahalap kea ih, eh ngenal toh helu tunanganku" kua mawi ateiku tarewen tapi hong bau tersenyum ih manyambut lenge tunanga je balemu malisen tanda oloh te dia patuh bagawi je babehat kuan oloh bakas helu je kute.

"Hendra" kua memperkenal ara akangku.

"Dony" kuangkuh pandak ih.

"Dia tau kuatak itah iye nah ka, oloh Bandung kanih" kuan Lia dengangku te.

"Yekah, pea rencana kawin kau ndi" kuangkuh misek hindai.

"Hindai lagi ka tunangan ih helu ikey due, ikau kilen ampie pea?" Ije pisek je bahali akangku tumbah jite sabujur.

"Hindai masih jatunti rima ampi" kuangku barangai tumbah.

"Ela lalau tahi ka kareh jake bakas bewei" kua mureh aku te kilau bahut, aku dia tawa kea apakah iye te jadi dia atie cinta dengangku hindai aku je lalau humung.

"Masih tege je hindai tercapai angat tujuanku, kareh ih aku mikir jite" kuangku denga.

"Itah kuman helo yu ka, eka itah huran hete nah?" Kua dengangku hindai.

"Makasih ih aku jadi besuh hayak aku hanjulu kea ih gawi tege kawal jadi manunggu melai huma endau" kuangku nenga alasan tanjaru akae.

"Narai gawim wayah toh?" Kua misek hindai tetarik auh handak katawa kea.

"Barangai ih gawi kadang umba uluh kangaju kangawa ih aku" kuangkuh denga mansanan jatunti gawian je tetep.

"Yekah, yu itah kuman ih helu" kua masih mamakat aku.

"Takkan ih aku handak mules helu mikeh tahi kawalku manunggu melai huma" kuangkuh denga balalu mampelum masin motorku.

"Yoh ih amun je kukau kuam harian andau ih kue kuman ka ara, andau Jumahat rahian aku buli akan Bandung hindai" kua mansanan akangkuh.

"Iyoh,.kilau je sala ih aku toh handak buli helu mikeh kawalku lalau tahi manunggu melai huma" kuangku sambil tabe dengan ewen due hindai.

Limbah jadi tabe aku balalu buli rangkah-rangkah ih manajalan motorku mahuru karatak je agak benyem te mimbit perasaan je dia karuan angat. Sampai huma aku balalu tame kamarku mimbit pikiran je dia karuan hayak are rintangan aku coba batiruh pasrah uras masalah te akan Hatalla.

====================0000000000====================

Bagian Kadue

KAMBANG CINTA

Cinta lembut gawi perhatian.
Batahan gawi kesetiaan.
Mangambang gawi kasih sayang.
Bahagia amun sama tege perasaan.
Cinta ite sama kilau bawak bua.
Intu kue hong bawak bua tege jadi kare uhat, batang, dawe tuntang bua hindai tege bawak.
Ije rantai pambelom je jatunti bagetu melai dunia toh ye te je bagare ara cinta.
Memang tutu kea je kuan oloh cinta te lumbah arti, tapi jatunti ije biti itah je puji nampayah banda kutelah cinta je sejati.
Mencintai oloh dengan tulus jite manenga kahanyi akan arep kute kea amun tege oloh mencintai arep dengan tulus jite manenga kekuatan akan arep, eweh je mencintai itah dengan tulus? Je pertama je mencintai itah dengan Tulus iye te Hatalla je kadue je mencintai itah hindai indu dan bapa katelo keluarga kaepat kawal kalime musuh.
Jitelah sabab aku dia sependapat dengan pepatah oloh je 'hidup tanpa cinta bagai taman tanpa bunga' tapi aku dia mancala kea gawi tikas sampai hete ih je katawan gawi jadi tuntang sukur kea tege akan bahan timbangan akangku bapikir.
Oloh je tau basukur oloh je tau bapikir gawi nampayah taluh je bahalap bara kakare taluh je papa.
Aku yakin itah toh uras tau basukur dengan narai bewei masalah je naharep hong kalunen, baya kadang itah kurang biasa basukur te jitelah je jadi beban hong pikiran itah kabuat.
Amun hong pikiran jadi tege beban kare gawi uras bahali tutu angat pajadi balalu dumah kare kadian kakulas ih hindai are macam panyakit je lembut amun itah dia tau basukur te, akhir je rugi itah kea.
Cinta je majar itah mangat tau basukur amun jadi tau basukur maka akan manganan je beken maintih je ije akan pasanga sampai pampatei je mamisah ewen due.

Puna dia tau itah ngangkira.
Soal jodoh itah hong dunia.
Baya tau itah marancang aka.
Bausahalah manggau rima.

Hetuhlah aku nampara sarita.
Manyambung kesah je jadi palua.
Intu kesah itah aku manampa.
Akan imbasa seluruh pemirsa.

Hong status je helu aku mansana.
Cintaku gagal jatun bara mana.
Denga bawi Palangka kutelah sarita.
Cinta je dia sampai judul aku manampa.

Melai hetuh aku manyambung sarita.
Hubungan cinta kasih dengan kula.
Dengan ije tathu je umba sakula eka.
Cinta te lembut gawi tukep tarus denga.

Kuan oloh huran je manyarita.
Haduan ije tathu dia iye kasala.
Marapat hubungan keluarga kutelah guna.
Mangat dia nihau utus hong daha.

Amun hong haduan ije tathu.
Tege aturan dia barangai tutu.
Jite akan kahalap ewen te helu.
Mahakan tulah amun sala jalur je huru.

Hal jite puna dia nanjaru.
Hong wayah toh je jadi maju.
Tau nampa cacat anak amun sala jalur je huru.
Gawi hong daha je sama tutu.

Kutelah ampin aturan oloh helu.
Sesuai dengan jaman je jadi maju.
Baya aku heran tutu.
Buhenkah aku cinta dengan andiku ije tathu.

Genep andau alem tarus hasundau.
Lembut pikiran handak malayau.
Marayu andi je tukep kukau.
Hayak buah kea hurui atau puna maksud oloh tege kahekau.

Iye puna rajin tuntang hormat.
Sopan satun tuntang bahalap hadat.
Mawi aku tatarik nampayah sifat.
Hayak mata bau cantik jatunti cacat.

Cinta te lembut gawi tege perhatian.
Bara pikiran je dia karuan.
Kadang tau tapahalau je kabaikan.
Gawi ampi batawah dia manarik pikiran.

Limbah bawi palangka iye hindai manduan ateiku.
Bamasak bapukan tuntang marasih huma induku.
Mawi aku masi kea nanture andiku ije tahthu.
Amun tege duit nengaku balanja akan kaperlu.

Mamaku melai ngaju baduit bara ikei.
Tege kabun pambula sedot dengan hekca.
Narai je laku anak pasti inenga.
Sepeda motor ije hapa sakula.

Jite mawi aku je kagum denga.
Hakun bagawi mandohop mina.
Padahal amun iye melai kos santai dengan pelajara.
Dia deruh bagawi je mampaheka.

Iye puna anak tambakas mama.
Mama te haduan ije tathu kea.
Dia iye oloh ewen due te rima.
Hayak buah ih hurui ije injala.

Ije nyelo jadi iye umba ikei.
Sasar rakat hubungan ikei.
Ngaju-ngawa ikei due bewei.
Iye gin sanang dia aku bewei.

Helat gawi ikei melai huma.
Bapander bakesah nahiu manta mana.
Kadang hureh sambil habaka.
Sadang-sadang ih kabangang ketun kuan indu bapa.

Oloh bakas je puna paham.
Ampin bahaya je tau mancam.
Anak tabela tau gawi macam-macam.
Manampa kacau sama kilau hong pikiram.

Mina-mama dia ngahana.
Mimbit aku akan ngaju metuh libur sakula.
Dengan andiku ije tathu kea.
Nampayah ampin pambelom ewen ja kaya raya.

Mungkin jite jadi hong rencana.
Ewen handak manjodoh ikey dengan cara je dia mamaksa.
Mangat tau sama-sama cinta.
Paksa andak ije tathuku sakula melai ngawa.

Due nyelo ije tathuku melai huma.
Ike due akrab tuntang bahagia.
Alu jatun basanan cinta.
Gawi mahamen angatkuh kea.

Puna ngampehe kuluk je soal cinta.
Mahi kilau je naharepku toh kea.
Labih bahali bara bawi Palangka.
Angat mamander cinta dengan andi je pahias bajenta.

Handak angatku mamander mikeh iye sangit buhau bara huma.
Handak benyemku mikeh sama nasib kilau bawi palangka.
Mawi aku puna saraba sala.
Atun pikiranku mangejau bara huma sementara.

Sambil bahitung tuntang marima.
Keleh sanan mangat iye katawa.
Amun iye dia maku mangat aku buhau bara huma.
Mahakan jadi masalah hong keluarga.

Kilau bahut helat balajar iye bangang akan kamarku.
Bapander bakesah je dia penting tutu.
Bawa akan manggau tatawe ikei hanjulu.
Sambil hakarahas hatekap sambil gantau.

Asal aku dia kea je maku.
Tapi iye je bahanyi tutu.
Aku baya mambaleh sapire je katau.
Gawi puna sengaja ngarahas aku.

Maku dia maku harus maku.
Kutelah ka harati ngaras aku.
Handak aku sangit denga mikeh iye manyalu.
Mungkin iye naksir kea jadi dengangku.

Hong ije andau aku mananjungan denga.
Munduk santai sambil manggau pangina.
Metuh te lah aku mansanan aka.
Bahwa aku cinta denga.

Iye malah nantawe aku je serius tutu.
Lalau kakare pertimbangan je inahiu.
Kareh jewu ih aku tumbah nenga akangku waktu.
Gawi kue ije kahuma dia akan kue kea aku.

Kutelah ije tathuku manenga jawaban.
Sambil mureh aku je are pertimbangan.
Dia narai ih nah ka amun jite puna perasaan.
Aku dia baka buhau je bara humam.

Salawah kea ateiku mahining kalute.
Iye mengerti narai je manderku te.
Maksud ayungku puna kalute.
Mangat ela buhau bara huma ikei te.

Kuan oloh helu baya sampai puser hubungan.
Hurui jalahan je tege tau ihapan.
Jitelah mawi ikei due jadi pacaran.
Gawi iye ije tathuku je puna pas eka hurui haduan.

Pacaran dengan oloh ije kahuma.
Puna bahagia tuntang gembira.
Genep andau tarus hasupa.
Tau pacaran laka kamar kea.

Limbah jadian ikei due labih akrab.
Tau hureh bangang sampai hakarab.
Mampisik ganan iblis je hong kitab.
Manenga jalan akan taluh je dia bahalap.

Pusa je kueh je dia mippen.
Nampayah lauk je balinek malisen.
Puna eka belai kare kalunen.
Gawi tanda normal nihau kahawen.

Amun jadi bahanyi manggawi kalute.
Biar langit baduruh taharep sinde.
Puna pikiran ayungku jadi kalute.
Manduan iye akan sawangkuh limbah lulus te.

Iye dia kea pehe atei.
Kecuali amun aku je matei.
Haru janji te dia jadi tatetei.
Gawi aku dia mungkin pindah atei.

Jahawen bulan jadi jadian.
Iye jadi kare umba ujian.
Hong kanai jadi basuang ije kungan.
Anak ikei due di luar pernikahan.

Mander helo akan indu bapa.
Iye handak kawin dengangku kaka.
Indu bapa balalu masuh je akan ngawa.
Menyalurui keseriusan je bara ikei huma.

Aku puna mangaku bagawi sala.
Taharep mina mama indu dan bapa.
Mana kuan ketun handak mahukum aku je badosa.
Je manampa noda hong keluarga.

Aku basanan tuntang terbuka.
Aku puna cinta dia main-main kea.
Makanya aku sampai bahanyi manampa.
Anak je hong andi toh anak kue je jadi nampa.

Ikei dumah je akan ngawa.
Dia kare handak mahukum atau manyala.
Gawi puna hurui itah pas kea.
Haduan ih itah kutelah kuan mama tumbah kea.

Baya ikei dumah mansana.
Mangat itah uras katawa.
Segala acara tuntang pesta.
Hong ngaju kanih itah marima.

Kuan mama manyambung pander.
Dia kea je mambeban biaya akan ikei.
Itah toh puna keluarga ela bahali.
Gawi keadaan toh jadi terjadi.

Mahining kutuh sala buah.
Are ampun maaf dengan keluarga palepah.
Kejadian jituh balua bara tampayah.
Ikei je oloh bakas dia olih mangawas.

Kuan kutak induku dengan mamakuh te.
Merasa sala gawi kejadia je kalute.
Tapi mama baya tatawe.
Sambil hamauh menjelas akan indukuh te.

Jituh jodoh dia tau itah ngahana.
Gawi ewen due sama-sama suka.
Dusah itah kare manyala.
Dia kare hong kueh bewei tau kea.
(Maksud te je batihi te)

Ije bulan limbah jite aku kawin denga.
Eka mamaku melai ngaju nampa acara.
Acara rami dana gawi mina mama.
Sampai bupati hadir kea.

Alem pertama ikei due limbah hapisah.
Hureh tatawe murak kado nampayah.
Rami-rami sambil bakesah.
Gawi uras jadi ilalus uras salawah.

Tihin sawangku jadi lime bulan.
Puna jadi nampara gitan.
Kanai hai je mangembang.
Gawi tege kalunen je melai huang.

"Ka nampara haguet anakmuh toh jadi?" Kua dengangku.

"Bujurkah? Naraikah gawi melai huang toh?" Kuangkuh denga.

"Iye taharu dengan bapa kua nah ka" kua marapus aku.

"Katau kute hindai lagi tau supa bapa je bakena toh" kuangkuh.

"Ka.."

"Tiruh ih jewu hindai bakesah" kuangkuh tumbah denga.

"Ah... ikau toh" kua sambil mangirut aku.

"narai kirut-kirut ikau nah kuman aku" kuangkuh.

"Haha... biar nenga oloh gin dia handak aku" kua nantawe aku.

"Eweh je nenga ikau biar oloh handak mili gin dia aku jual" sambil kuman wadai je tege melai meja te mangejau bara iye je menter.

Metuh te wayah musim mandang kabut sadingen mambisa dawen melai luar huma mimbit riwut je sadingen akan ngaju ngawa.
Hong langit bulan purnama bacahaya mampalawa alam semesta.
Metuh atei bahagia waktu puna barega capat nangkalau hamalem baganti dengan hanjewu pahayak suara manuk je manandu.

"Tiruh ih jadi ih bangang dumah kare kalilu ih kareh" kuangkuh mambisik aka mawi iye rahas mangutip bitiku hapa silu je panjang haru batiruh.

Sampai wayah toh sampai nampaku sarita jituh ikei jadi mingkes ije anak je umur ije nyelo. Wayah toh ikey belom melai ngaju Takaras eka lewu jadi olih mampendeng huma kabuat.
Tikas toh helu sarita je nyampaiku mahalau halaman kesah itah toh titip salam uras akan tunda kula je mambasa sarita jituh bara aku je melai ngaju.

Nyarita Awie:S.S

=LEPAH=