Amuk Barasak

Sahindai aku mambuka sarita are ampun maaf dengan tunda kula je umba mambasa jituh baya ije sarita je jatun ati aku bahanyi manyewut kabujur kejadia toh bujur atau dia. Sungei Barasak Kapuas Murung eka lewu je bauntung jadi sarita hapus petak danum akan peteh oloh bakas helun mangat sampai ela manumun lewu Barasak je lepah kalahi sama arep jatunti ampun. Metuh jaman huran hong sungei te tege lewu je cukup hai eka kampul kare kalunen melai huma hai pire-pire kabali belum hinje damai hong huma panjang.

Hasil malan manan labih bara sukup bara panginan andak melai lusuk tahan main bulan balalu atun tiruk tuntang kanahuang manampa tiwah akan kare tathu hiang. Hong huma hai pikiran jite palus inyarita balaku pendapat dengan tunda kula kilen ampi amun itah manampa acara malalus tiwah uluh bakas itah kea. Mingat kare pandinu malan tuntang kabun pambulan je uras bahalap hayak kare Bawui, Sapi tuntang hadangan are tuntang sehat narai ati kasala amun je uras lengkap tau itah matur bara wayah toh mangat manggau kabulat. Kutelah pikiran oloh metuh huran nampa acara harus nyadia bahan tau sampai main nyelo bulan gawi jatunti oloh je bajualan. Tiwah te puna gawi hai are acara je inggawi tuntang bahan je merlu akan gawi tau kea pakat kumpul mangat jeleng jadi.

Metuh huran oloh labih rakat kare gawi hatantiring hapakat mangat gulung maju kutelah je angat ela sampai atie je belom sasat melai petak danum itah kabuat. Kutelah oloh lewu sungei Barasak manempe behas basak-sak akan pesta hai je inggawi nyadia behas kutelah je helo nggawi.

Atun ije pasang kabali masih manggetem mampalepah gawi sayang amun dia pajadi parey tau manyalu amun sampai lihi. Oloh lewu sama mangerti ewen due je haru belom hinje bulan madu mungkin ewen due mambenyem arep melai hila ngaju sungei te. Melai lewu rami-rami bakas tabela uras bagawi hatue bawi umba manguan gawi sampai jatun ati je balihi.

Manumun auh kesah sarita langit balawa andau te hong baun huma sana tege ije apui bajatu bara ngambu akan ngiwa uras tarewen oloh ije kalewu huma nanture banda je bajatu te kea. Bakas tabela uras ngarubung narai kea panenga taluh hunjun pamuhun handipe je baapui mamehun mawi geger ije kalewu nanture akan hunjun. Handipe jite manjatu akan petak melai lewu sungei Barasak metuh oloh are kanjera kumpul manatak marasih baun huma uka tiwah kahandak. Uras oloh tende nanture handipe je ganjil sama sinde baapui biti bahandang sinde bara langit pandumah ayue te. Nanture kalute oloh are mandam tanda narai jituh je nenga Tuhan mudahan uras akan kasanang handipe patei mahakan manusul lewu humam. Kutelah auh tamparan kesah je nyarita gawi oloh bakas itah taluh je ganjil tau dumah angat dia percaya kea angatku mangesah. Dumah ije bakas lewu hamauh dengan kakare biti itah toh harus manganan sial kawe mahakan bencana je tau terjadi.

"Iyoh bue" kuan ewen bawi hatue te tumbah.

"Hanjewu kareh itah uras nampung tawar mangat sadingen tuntang sial kawe itah tau nangkalau gawi taluh toh ganjil manumun pansanan ela itah manawah tau kejau hambaruan" kutelah oloh bakas te mansanan balalu ewen uras nyadia akan je mesan handipe te ngubur buah-buah gawi metu te ganjil tutu ampin tampa tuntang pandumah.

Andau hanjewu uras inggawi tapung tawar jadi inggawi mangat sial kawe uras hadari kutelah tujuan manggawi jadi. Malanjut hindai kare gawi nyadia akan tiwah je hai mangat jeleng tuntang jadi mangat dia mangganang hindai tau mambeken gawi. Pumpung kalunen je biti are dia lalau sapire-pire gawi je hai jeleng jadi hindai persiapan uras lengkap jadi. Jatunti je kurang tapelai akan acara tiwah je nyampai uras jadi tuntang sesuai malanjut akan acara pembukaan hindai.

Itah mangesah hindai ije kabali je belom ngabuat asi-asi melai ngaju sungei hong pasah jadi ewen due kabali limbah buli bagawi. Bagawi manggetem parey kutelah gawi pire-pire karung je supa jadi sampai balua pasah tuyuk parey hong hete haru saparu getem je ambu kute. Jaka je hitung amun palepah lime jahawen ratus belek tege amun jadi lepah tapi haru saparu je jadi ambu masih are hindai pandinu. Due nyelo te puna bahalap parey bua uras manjadi puna besuh angat kanai kuman bua je puna are. Metuh ewen due munduk istirahat nyarenan kaheka biti bereng angat marak kanai balau gawi je bahimat mangat jeleng mambu kare parey je tege kutelah niat.

"Sadang kea angat andau toh ndi?" Kuan bana dengan sawa sambil munduk melai baun pasah ewen te.

"Kareh hindai kue muhun ka, ugai-ugai ih kue mangua" kuan sawa sama uyuh kea kueh andau balasu hindai.

"Kuehkah benyem masih suara garantung ewen lewu itah ndi?" Kuan bana ihat misek gau pander ih.

"Tawa mungkin hindai tau ka, buhen ikau handak bulikah ka?" Kua misek bana hindai.

"Palepah getem kue toh helo haru buli hindai" kuan bana denga.

"Dia baka olih kue palepah toh nah mias kakare toh gin haru saparu je supa haru sapuluh andau kue mangua" kuan sawa denga hindai.

"Handak lihi sayang angat jadi handak dia umba kanih sala kea angatkuh" kuan kabali dengan perasaan je serba sala.

"Kuan bue nah dusah ih itah mikir kanih pajadi getem ih kue tau ih ewen kanih matur tuntang paham ih dengan itah kue mahi kue je haru kawin" kua sawa sambil mangutil bana.

"Baya angat ih je dia mangat dengan tunda kula beken gawi dia umba mandohop bagawi kanih" kuan kabali denga.

"Itah jadi basanan kea tuntang bue tau ih mamander akan ewen hindai, kue kuman ih ka" kuan sawa denga mimbit iye kuman gawi kanai ewen te puna balau kea.

"Yoh ih amun kute kue kuma ih ara helu, sadang kea angat lau kanai jadi nyarena" kua je sambil mukei kenceng ketel ewen due te mangkuman bari balut je tisa bentuk andau.

"Te ewen masih macuba garantung ih auh ka" kuan sawa sambil mangaut bari akan ewen due.

"Ye auh kau masih hindai kea mudahan kue sampet umba ndi, tapi ikau kilau bahut ih halemei toh melai pasah ih kareh aku mangetem akan kue" kuan bana denga je sayang denga maklum haru ije nyelo ewen due kawin te.

Melai lewu haru nampara mancoba kare garantung manyeneh pahiau je pas kea gawi je hapa mancatok haru nampa bara kayu. Garantung palua akan bentuk huma pire-pire balanga uka danum mihup palua kea anding, tuak baram jadi masak inampa kutelah ampin hong pesta bawui hadangan sapi nyambalih akan panginan oloh je kalewu huma. Gawi Tiwah dia jadi jandau tau sampai ije bulan kuman belom tatap sukup panginan kalunen bara ngaju ngawa umba dumah akan acara mawi are kumpul dengan tunda kula.

"Mias kea lewu hetuh rami nampa tiwah" kuan ije biti oloh je dumah maja lewu te.

"Palus pahari" kuan ije biti oloh lewu te je tukang manyambut tamu je handak maja ewen.

"Iyoh" kua sambil mananjung hapa ewah batutang handak hapus biti kea manangking mandau melai kahang.

"Bara kueh dumah nah pahari?" Kuan ije biti je bakas kea.

"Bara lewu ngaju hekau ih aku gawi hiningku pantu garantung ketun lewu toh mawi aku dumah akan hetoh" kua tumbah.

"Yekah jadi kuman nah pahari, amun je hindai itah kuman ih helu" kuan oloh lewu te mamakat tamu te kuman.

"Tau kea, are ampi bari panginan ketun toh handak minjuk kea angatkuh" kua balalu manalih eka bari juhu sambil mimbit piring ayu.

"Sampai pire andau rencana acara ketun toh pahari?" Kua misek hindai.

"Rencana toh akan lime belas andau" kua oloh lewu te sambil kuman.

"Yekah, jadi pire andau toh?" Kuan oloh te misek sambil kuman kea ewen due habambai.

"Jadi ka uju andau toh" kua mangesah je jadi mahalau.

"Rami pihup busau hetuh reke" kuan oloh te hindai.

"Rami pahari hong huma te amun handak mihup angat tege ih" kuan oloh lewu te mansanan aka.

"Tau kareh limbah kuman toh aku umba kahete hindai" kua oloh maja te denga

Hong pesta hai te puna biasa mihup babusau asal ela manampa soal tau kana danda amun gawi je nyalangking nampa ridu. Kutelah adat itah babusau puna tau tapi ela nampa karidu gawi jite tau mimbit sial harus danda mambayar. Kutelah ampin hong acara pantu garantung je rami kea busau pihup je dia laya hureh tatawe kanatek tege je muta. Hong kesah sungei barasak lewu tame akan ngambu ngabuat hetelah eka ja mangat kejau bara asang je rancak manyarang. Asang dumah bara laut kayau dumah bara gunung jitelah sabab lewu te tanggung dia melai saran batang danum. Kutelah auh tandak sarita lewu Barasak je puna eka tampara sulak eka kajadia gawi sala pahining kutelah harana. Anak olohan je rami bangang kariak kalaluk dari-daria laka petak danum hureh tatawe busik uru mawi oloh bakas je hakaridu. Hong huma rami babusau gawi tutu bakesah bapander are macam je nahiu sesuai dengan pengalaman je jadi huru nyampur isut dengan tanjaru. Tege belah maju sambil mamparaktek pengalama je pahuru panca-pancae mampalua silat dengan ilmu kadang rami tatawe amun tege je lucu kutelah ampin hiburan jaman helu. Mandau gantung hung dinding huma mahakan manderuh tunda kula gawi uras ije keluarga jatunti musuh je manyarang kea.

"Puna hebat hiningku bapa anu toh silat taukah kue coba ije due kajurus helu kula?" Kuan ije biti oloh maja makat main kuntao.

"Baya-baya hapa handari ih kataun pahari tapi tau kea amun handak mancuba" kua balalu hingkat bara punduk marak busau-busau angat.

"Ela je kalahi sama tunda kula ih itah" kuan ije biti oloh je ngarendeng ewen te.

"Ihat mancoba silat ih, ye lo pa anu?" Kuan oloh je maja te.

"Iyoh, tahi dia angat aku main jadi" kua balalu masang kuda-kuda kute kea dengan je maja te sama palua garaka kea.

"En jadi pahari?" Kuan je maja te misek kesiapan musuh te.

"Takan bey helu manyarang!" Kua oloh huma te manenga kesempatan helu.

"Yoh nanture toh" kua manenga aba-aba sambil manyarang akan olih huma te.

Lenge sambil hapa mambuka serangan manintu atei kute ampin tujuan gawi puna jarak masih kejau jite baya garak tipuan. Oloh huma sama bapangalaman dia maku tindar gawi perhitungan sama masak  manunggu perubahan jurus te metuh tukep kutelah kahandak ketenangan te lah kunci hong silat. Mundur nangkeru jite mahila cara je paling sederhana hong kuntao kea sambil manangkis mampatei serangan lawan kutelah garakan pembuka. Tapi oloh maja dia je puang kea katawa jurus jite baya hapa mambuka capat iye nangkeru manyasah oloh huma sambil malapas pukulan gantau akan bawak mata. Taluh je kute jadi imbayang gawi oloh huma cara mahila jadi mikir helu kea mangat ela sampai sala iye manggeser akan hila sambil mangat balua bara seranga te kea.Nanture kute ancap musuh manarik saranga kea dia maku sampai laya gawi tau nampa celaka gawi musuh tau mahila balua. Ije jurus jadi lapas dia baguna oloh huma puna hebat kuntao kea gawi dia maku lalau bahimat mamaksa bara tau dinu kapehe keleh sukup akan olahraga.

"Hebat atun oloh ih je tau mahila jurus jite pahari" kua mamuji oloh huma te.

"Ikau gin hebat kea tikas ikau je kalaju te haguet je jadi supakuh" kuan oloh huma te mamuji iye kea.

"Dia kea ah, jadi ih akan olahraga kue" kua sambil bundur munduk buli akan eka sulak.

Acara Tiwah je rami ngaju-ngawa oloh are kumpul dumah akan lewu te acara jadi manukep lawin puncak jadi oloh je kumpul rami. Pantu garantung sasar rami sampai akan ngaju sungei te hining jelas pantu garantung je karas. Huang ngaju lewu sungei Barasak te tege ije kabali je ngabuat manggetem parey je kanjera masak rata bahenda dia olih umba muhun akan acara je tege melai intu ngiwa.

"Rami auh ewen melai lewu kanih ndi"  kuan bana sambil manggetem bapander dengan sawa.

"Puncak acara andau toh te ka" kuan sawa tumbah sambil manggetem kea.

"Pasti rami oloh dumah akan lewu ndilah?" Kua sambil manggetem hindai.

"Tau te ka je pasti tunda kula je hong keju pasti dumah gawi acara penting tiwah toh, baya kue ih je dia olih umba" kuan sawa.

"Nampi amun kue masuh ndi?" Kuan bana mamakat sawa.

"Kareh kea ka sisa isut hindai getem kue halemei kareh gin sampet ih kue umba akan lewu" kuan sawa ewen due je puna sakalepah mangetem parey te mangat sampet umba acara tiwah melai lewu.
"Tapi kuan bue nah ngahana itah due umba akan acara nah ka, gawi tege pansanan je dia bahalap kua metuh te bue mansana" kuan sawa hindai mingat peteh bue denga.

"Mungkin bue tau ngalilu ih jadi ndi mapai kea je are pangkalima kumpul bahanyi oloh manderuh masih" kuan bana bapikir hapa akal je sehat.

"Tame akal kea je kuam kau ka, tapi bue te dia puji hamauh je serius kute dengangku nah ka, mungkin iye ngalilu ih jadi herah" kuan sawa je akrab belom dengan bue te jadi.

"Andau toh lepah ih getem kue limbah te balalu masuh ih hindai itah kue ndi" kuan bana denga.

"Iyoh, puna kute kea angat kanahuangku nah ka" kua sambil manggetem parei ewen te.

Kutelah ewen due te manggetem sambil nahiu jituh jite hapa mampalaya pikiriran mahakan jeleng heka tuntang bosan. Amun penulis manduan katika antara bulan Oktober sampai November te lah sekitar waktu kejadia gawi bingat metuh te wayah getem parey musim mandang melai eka itah toh uras bara hetelah olih penulis isut manyarita katika te. Pantu garantung je puna rami ging-gong sinde tanda pesta hai je inggawi ngaju-ngawa oloh rami kare pangkalima tuntang basir uras tege. Pihup busau dia kalayan tege je nyalantar laka saran batunggang gawi karean pihup sampai dia panan nanjung kabuat tau tajungkang.

Manumun auh kesah sarita.
Bara ije biti je saksi mata.
Anak olohan bangang laka penda huma.
Kumbak kikuk sama oloh gila.

Melai hong huma uras babusau.
Sambil bapander tuntang ngarucau.
Nahiu kare macam kalayau.
Uras pangkalima je patuh mangayau.

Gawi jadi marak babusau.
Pahining tuntang tampayah je tau layau.
Mahining anak matei gawi kabangang kaburau.
Manduan mandau je andak intu dinding huma kau.

Rami oloh are manekap manyabar ela tapa lalau
Mangat ela sala pangkalima mangayau.
Hetuh uras keluarga je sama babusau.
Mohon pangkalima mangumpang mandau.

Tapi pangkalima jite jadi babusau.
Nihau hindai kikeh gawi kalayau.
Nambah hindai mahining anak matei je hatang-hayau.
Balalu menejeb oloh je tege tukep hekau.

Amun Barasak nampara bugai.
Pangalima mahamuk dengan ije mandau.
Are oloh bahimang je pisah darai.
Pangkalima manjeb eweh bewei je nyundau.

Are pangkalima je kumpul intu hete.
Sama bingung nampayah kalute.
Balalu manjawut mandau je tege.
Hapa malindung biti marak musuh dia kasene.

Geger tutu melai lewu te.
Pantu garantung balalu benyem sinde.
Tejeb tasang kanih kate.
Bakas tabela uras hatejeb sinde te.

"Leha benyem auh ewen lewu ndi?" Kuan bana misek dengan sawa hindai.

"Tawa kea amun je jadi dia mungkin kea leha kajeleng" kuan sawa hindai.

"Terai kue buli ih nanture ewen lewu kanih mikeh asang tau manyarang ewen te" kuan bana je jadi lepah kea getem parei ewen te.

"Dia baka kea ah ka je kute herah" kuan sawa sambil umba nyadia kare paramu ewen due te kea.

"Leha je katahi jatunti kare pantu garantung hindai yu?" Kuan bana je masih santai nampunan paramu ewen due.

"Tawa kea aku je sama melai latuh kea, yu kue tulak nampayah akan ngiwa ih" kuan sawa gawi paramu ewen due jadi kumpul melai jukung te.

"Amun iye tege oloh manyarang pasti tege ewen mamantu garantung mansanan bahaya tapi jadi katahin toh benyem sinde" kuan bana je sambil barima keadaan te akan ewen due.

Ye balalu ewen due te tulak masuh akan ngiwa hapa jukung mahuru sungei barasak te rangkah-rangkah kea sambil nanture ngaju-ngawa narai mawi acara te je benyem tunis salenga.

"Leha ka, benyem sinde oloh lewu te?" Kuan sawa misek dengan bana rangkah-rangkah.

"Tau tege masalah te ndi" kuan bana tumbah bijaksana ewen due sasar tukep lewu te kea.

"Benyem oloh melai lewu ka" kuan sawa je melai benteng jukung te hamauh denga.

"Kayah tege asang manyarang ampi ndi coba ikau ture baun kanih tege hantu je masih haru badaha ampi" kuan bana je nampayah ije biti mayat melai batang sungei te.

"Rangkah-rangkah ih kue ka, tende hetuh ih kue" kuan sawa mikeh gawi nanture tege hantu jadi melai baun ewen.

"Iyoh kue lumpat bara hetuh ih ndi mananjung akan lewu" kuan bana balalu manekap lunju.

"Yo ih amun je kutuh ampi jadi tutu kea je kuan bue nah amun je kutuh ampi ka" kuan sawa lumpat akan batang te sambil mimbit mandau ayu hong lenge.

"Leha sampai tau kutuh yu maka are pangkalima kumpul melai lewu" kuan bana marima hindai sambil nanture kare hantu laka hapus karatak lewu te. Lembut angat kikeh kea kare pangkalima sampai matei hete tentu oloh je manyarang te mias kahebat kaji patua jadi.

"Ela lalau ridu mikeh tege masih musuh melai lewu" kuan bana te hamauh akan sawa.

"Yoh" kuan sawa tumbah rangkah ewen due mananjung sambil nyahukan mikeh masih tege oloh je manyarang, tahi kea ewen due mangumbang mahining tapi puna benyem jatunti tanda je belom.

"Ikau tatap nyahukan ih ndi aku coba mantehau manggau eweh je tisa belom, amun aku kalahi dengan oloh ampi ikau hadari ih mawat arep muh akan lewu beken" kuan bana je marak pusang nampayah kare hantu je purung-parang.

"Iyoh ka, babuah ih" kuan sawa denga andau metuh te jadi nampara halemei kea bana balalu balua akan bentuk karatak.

"Oo.. oloh lewu marai kea je mawi ketun hetuh?" Kuan bana nangkariak mantehau oloh lewu te manggau je belom uka misek narai sabab je kalute.

Kumbang kurah laka karatak iye mananjung tapi jatunti je tumbah haguet gin jatun. Tame huma ije sambil mantehau mikeh tege je belum tapi puna jatun, sampai hong ije huma hai eka sentral acara te sulak hete je are hantu hong huma te iye mantehau hindai.

"oloh huma buhen kea ketun je lepah kutuh, eweh je manyarang lewu itah toh... " are macam je kua te sana tege hining oloh tumbah.

"Hong kueh ikau?" Kua misek oloh je tumbah te.

"Aku melai lusuk parei toh dohop aku" kua suara oloh bawi je hamauh te.

"Buhen mawi oloh lewu je are matei nah ndi?" Kua misek bara luar lusuk te.

"Kareh aku nyarita akam dohop aku balua bara hong hetuh aku dia olih balua" kua je hapit hong helat kayu te, ye hatue te ruat-ruat mambuka akae jala balua bara hete.

"Buhen ikau sana tau tame hete ndi?" Kua misek hindai sana jite jadi balua.

"Tapanting aku akan hong hete metuh tamparan kakacau te" kua mamander arep je kana jakah entah eweh je gawi te.

"Ambuen mawi je sampai tau kilau kutuh mawi lewu itah ndi?" Kua misek hindai.

"Aku sama dia katawa kea asal baya metuh aku te ewen rami mihup babusau melai huma toh kare pangkalima are kumpul mihup hetuh".kua tende manunda tahaseng helu gawi ewau hanyer daha hong huma hete.

"Limbah te kalampi hindai?" Kuan hatue je mandohop iye te penasaran mahining kesah te.

"Kilenkah melai penda huma toh anak olohan busikan uru nampa manuk-manukan bara uru te. Kilenlah metuh te ewen rami nangkariak gawi kalah manuk usikan kula te mahining je kute mungkin bapa anak oloh te je munduk babusau melai hong huma te manyewut anak matei, balalu marawus hingkat manduan mandau manjawut tuntang manejeb oloh je tukep hete. Manture je kute kare pangkalima je beken hingkat manyabar iye, entah kilen ampi hindai balalu mahamuk iye intu huma te aku sampet mandam balemu nanture kare daha je bahambur kanih kate sana tege je manjakah aku balalu tatame akan lusuk te. Bara helat rumbak lusuk te aku nanture ngaju ngawa uras hatejeb sama arep mungkin gawi babusau mihup te sampai tau kalute" kuan bawi te manutup kesah je nanture te.

"Aneh kea tapi tutu kea amun je babusau te ndi, rima jatun kare oloh beken manyarang itah lewu toh ikau ture?" kua oloh je haru dumah te denga.

"Jatun sama itah uras ih je kalahi hetuh endau gitangku" kua tumbah mawi hatue te benyem sambil nantuani hantu je bahambur kanih kate. Kare panginan bari juhu uras tacampur dengan daha tusuh tumbak ngaju-ngawa hayak andau te jadi halemei kea.

"Amun je kute masuh sungei ih ara itah toh dia olih itah murus hantu je karen toh" kua hamauh hindai.

"Aku gin dia olih kea angatku melai hetuh kueh sawam nah?" Kua misek hatue te hindai.

"Tege ih, yu itah masuh ih" kua balalu mananjung akan karatak lewu te hindai.

"Ndi yu itah balua ih bara sungei toh" kuan bana mantehau sawa je nyahukan melai balikat ruwut uru dengan kayu.

"Buhen nah ka?" Kua balua bara eka nyahukan te kea.

"Kareh ih aku nyarita akam itah jeleng balua bara sungei toh ih helu manggau eka manguan pambelom je beken ih hindai" kuan bana sambil malaih jukung ewen due te endau.

Ewen telu tulak mambesei akan tumbang barasak te manggau eka melai pindah bara lewu te je are hantu je jatun tapa kubur tuntang gawi lalau kakare melai hete. Singkat kesah ewen te manguan pambelom kejau bara hete mingkes sarita je bapait masinde sampai matei jatunti ngalapean kalute.

Jadi main abad je nangkalau oloh are ngalapean hindai lewu Barasak je puji hakayau sama arep huran gawi haranan sala paham. Hong ije katika jaman Balanda tege due biti oloh je mandup manjarat manggau panginan bawui bajang mamasang dondang kutelah ampin manggau panginan. Ewen due tulak mangumbang manggau eka mamasang jarat dondang je rencana hapan. Sampai hong ije tumbang sungei je ampi haruwut are kayu belum bahijau tanda tege metu je melai hong pulau kayu je are batang kayu hindai. Ewen due balalu tame sungei te manggau eka mamasang dondang te nanture tanduhan eka metu nangkalau mangat jeleng supa je matu je gau. Metuh ewen due selek-seleka nanture tege awan pai metu kea puna dia sala ampin mangira hong sungei te tege metu ngaju-ngawa. Ampi awan pai masih taheta hayak are metu ampin awan pai te hong petak te sakalinya balalu ewen due mamasang dondang mangat jeleng supa metu je kanahuang.

"Are metu ampi hetuh ih kue masang dondang kue ampi" kuan ije biti hamauh dengan kawal te.

"Iyoh pas ih kue masang hetoh eka" kua ije hindai sambil mandohop mamasang dondang te kea mangat jeleng jadi.

Sana jadi masang kare dondang ewen due munduk mandai taruk kayu sambil manunggu dondang te kana tumun kanahuang tapi jadi main jam jatunti kare metu je gitn tuntang buah kilau kanahuang te. Ewen due bapikir gelisah jadi ije puntung andau jatunti je buah sambil bapikir mangau rima mikeh tege atun kasala.

"Lehalah le sampai jatunti je kana dondang kue toh?" Kua bapander dengan kawal te.

"Tawa kea maka are ih ampi endau awan pain metu te lo?" Kua misek kawal hindai.

"Ye te naraikah mawi sampai jatun je buah masih" kuan kawal denga.

"Kue nunggu ih helo gawi hetuh eka masih mamuga kue" kuan kawal te denga hindai.

Ewen due manunggu hindai sambil bakesah mantap manyau gawi kapusang jatun panyundau kanai balao jatun panan kuman. Jadi sampai balihang andau sana tege auh metu mahiau balalu ewen due hature tuntang tampaliau akan eka dondang ewen due hetelah eka auh pandumah pahiau.

"Bajang auh te le" kuan kawal hamauh denga.

"Yoh kue ture ih kana biasa te jadi" kuan kawal balalu muhun manangking mandau bara hujun kayu eka ewen due melai.

Ewen due manalih hete nanture bajang je hai kana dondang ewen due te.

"Te ye dinu kea ampi le" kuan je helo muhun endau te.

"Kue mimbit akan jukung ih le" kuan ije hindai.

Bajang je hai te muat ewen due akan jukang mawi sarat nambah ehat ewen due hindai jukung te, sana jadi ewen due babuat balalu tulak balua sungei barasak mambesei akan ngawa eka pandumah sulak. Melai sungei kapuas murung ewen due mambesei marak andau jadi halemei Bajang nutup apa dawen kajang mangat ela sampai gitan gawi oloh are je kadian baya handak balaku amun tege dinu. Amun jadi kute saraba sala handak dia manenga nyewut oloh bukih kea keleh nutup hapa kajang mangat jatun minat gawi arep sama heka-heka kea angat. Andau halemei puna bariwut mahi melai bentuk batang danum salenga metuh te suara oloh nyangehem melai penda kajang je hapa manutup bajang.

"Eheem!" Mawi je melai lahuan mules nanture akan kamburi sambil misek.

"Buhen le?" Kua misek kawal je ngamburi.

"Tawa kea melai penda kajang kau" kua mawi kawal je melai lahuan.

"Babuah auh" kua sambil nanture akan arah kajang te dia pire.

"Eheem!" Kua bara penda kajang te hindai mawi ewen due hature sambil mamperhati kajang te. Metuh te salenga riwut kancang dumah mawi kajang te tarawang tuntang babangah nanture ije biti kalunen je mahukup hapa ewah hapus biti uras batutang lepah ewen due tarewen sama sinde nanture bajang basaluh jadi kalunen kute, hindai sampet kare hamauh ewen due oloh mambuka sarita hong hete.

"jadi tahi angat aku benyem hong lewu barasak hete manunggu ulun kalunen je tau manyaluh aku haluli bara jadi kambe" kuan oloh te mambuka pander mawi ewen due siap mimbing pulang mandau mikeh oloh te salenga mawi.

"Hong lewu te busau karas naraikah campuran je hapa oloh lewu te manampa danum mihup te sampai tampayahku je sala buah menejeb manasang kare tudah jalahan je hadir hong tiwah. Pire-pire je ngarubut aku uras tindas hong mandauku uras baya ije biti aku dia manyangka oloh bakas sinde mamunu aku balalu tindas" kuan oloh bakesah danum metuh te kanjera teah jukung ewen bahantung masuh akan ngawa sambil manggau tuntang barima kilen ampi mangejau bara kalunen je sakti mandaraguna. Sambil mahining kesah je layau busau jatunti kasenan taluh je mander nahiu gawi taluh te lalau kakejau. Metuh ewen due nanture sambil gantau sana tege ije kapal dagang melai bentuk danum sambil marima jarak marima kutak pangkalima te dia mustahil tau sinde mahewes manganan tahaseng ewen due gawi nampayah ampin kenyataan je bahaya kute ewen due balalu sewu akan danum sambil nambalik jukung te balalu hanangui balaku dohop dengan oloh kapal. Sana ewen due jadi lumpat kapal oloh kapal misek ewen due.

"Narai mawi ketun je malihi jukung ketun due" kuan ije biti oloh kapal te misek ewen due.

"Tege oloh aneh hong jukung ikey due je asal bara bajang basaluh jadi kalunen" kuan ije mansana.

"Kilen auh pahurui je tau kute?" kuan jite misek hindai.

"Kutuh sulak ikey due nah"  kua tende manarik tahaseng haru nampara basarita akan ewen kapal te tampara kilau hong ngambu te sulak.

"bujur kuan ketun due puna tau mampatei amun je oloh kilau kute untung kute sampet nambalik jukung te jadi" kuan oloh kapal te dengan ewen due.

Hong kapal dagang je puna hai ewen due nenga oloh panginan tuntang baju pakaian sama ije tuntang batiruh hong kapal alem te pandehan manunggu andau balawa ewen due haru buli mimbit sarita je aneh ganjil te. Amun manduan ampin jalan sarita te helo bara Balanda amuk Barasak te jadi tege kejadian te mungkin tafsiran penulis sekitar abad 16 masehi lewu Barasak te tege gawi hong benteng abad 17 nampara tame akan kalimantan jadi kutelah amun dia sala te jaman lewu Barasak te huran. Sampai hetuh helu sarita inguan ampun maaf amun are je sala kutak pander tuntang sarita ije inampangku gawi jituh aku supa bara taliau bapaku je nyarita metuhku hapa magah tiruhku je badungil toh.

Inyarita Awie: S.S