Sabaru Dengan Bakei

Atunlah ije sarita bara oloh bakas helu kea.
Melai ije sungei je lumbah maname padang himba.
Tege ije kungan Sabaru je jadi manampa.
Lanting Tewu je handak hapa dimpah akan Jawa.

Hong sungei te Sabaru mancuba.
Lanting Tewu je jadi inampa.
Akan ngaju akan ngawa ie umba.
Melai Lanting Tewu je nahap jadi te kea.

Balalu ie tulak masuh akan ngawa.
Handak akan pulau Jawa kutelah rencana.
Sabaru balayar melai sungei te nampara.
Manalih tasik akan hila ngawa.

Metuh hong mahalau ije himba.
Tege kawan bakei je nanture gawi balalu handak umba.
Sabaru je puna bajenta balalu tende kea.
Mimbit kawan bakei ewen hanak akan kapal tewu je nampa.

Limbah jadi ewen bakei uras lumpat.
Kapal tewu balalu tulak berangkat.
Pahayak riwut je mimbit kapal te akan laut.
Dengan galombang tasik je hai mawi kapal ewen kunjang-kenjut.

Kapal jadi kejau tame bentuk laut.
Kawan bakei nampara rise nampara habut.
Rami bangang melai kapal tewu hakarabut.
Nakian kabangang sama bahut.

Sasar tahi ewen bakei te mangkeme balau.
Maka jatun bahata panginan jadi melai laut.
Baya tege tewu je akan lanting jite ih je tau ngatatup.
Baya mahamen misek balaku dengan Sabaru.
Balalu ngutip anak mangat manangis gawi tutu.

Narai mawi ikau kuan sabaru.
Gawi balau kanai handak kuman tewu.
Tau keakah ikei balaku tewu.
Takkan bei kuan sabaru baya duan je hila ngambu.

Mahining kute ewen bakei rami balaku.
Manduan tewu je hila ngambu.
Gawi jite dia lalau penting tutu.
Balalu rami ewen kuma tewu.

Bakei jite puna belum babungu.
Nahapas belai mangkeme kamanis tewu.
Ngutip hindai anak balalu rami ewen ridu.
Gawi ewen haus tutu nah sabaru.

Laku bei hindai baya ela lalau are.
Pulau Jawa masih kejau hindai bara hete.
Sabaru mameteh ewen mangat dia babungu sinde.
Kuman kapal ewen je ije-ije.

Bakei jite puna dia olih nyarenan belai.
Nanture tewu je are bahantai.
Dia akan due ampi nasehat Sabaru je santai.
Bahwa ewen tau matei kahem hong tasik te.

Bakei tarus kuman kapal tewu te.
Laseh jadi kinan kea gawi ewen hanak te.
Nampara hindai danum te tame.
Tapi ewen bakei dia paduli jite.

Di lalau tahi dumah galombang je hai.
Kapal tewu je jadi rusak balalu kahem.
Sabaru balalu tarawang nampayah je kalute.
Ewen bakei balalu tangui-tangui melai tasik te.

Tasik je galombang hai te.
Dia sapire atie ewen bakei te leteng hete.
Sabaru tarawang dia olih mandohop ewen kute.
Gawi kabungu kea je mampatei ewen te.

Pehe ih angat atei Sabaru nanture nasib bakei te.
Jatunti je angat rencana je handak mancalaka ewen te.
Tapi puna ewen kea je babungu kalute.
Haranan dia percaya dengan kuan Sabaru jite.

Kute kea itah belom hong kalunen toh.
Tingak ajar oloh beken harus nonoh.
Mata itah puna tau nampayah bintang bulan je kejau.
Tapi dia tau nampayah bulu mata itah kabua.

Kutelah kesah akhir bakei jite.
Jaka je nyalurui ie te kawal kelep.
Tege hong penda sarita ewen due je nakian pisang jite.
Akan je hindai mambasa tau tege melai kesah itah toh kelep dengan bakei te.

Inyarita Awie: S. S