Balut Lauk Mata Saribu

Atun ije kesah oloh te tatau tutu hong lewu te. Oloh je tatau te baya tege due anak uras hatue indu ewen te jadi malihi helo. Due kungan anak te tege kapatuh je hakabeken.

Kebiasan je tambakas te rajin umba oloh busik, babusau tuntang mambawi ngaju-ngawa hapakat dengan anak oloh je tatau kea.

Amun andi te rajin umba bapae bausaha, badagang, mandup, mangan hayak hakawal are hakawal dengan oloh je belom susah tuntang bakas. Kare kawal bisnis bapae are patuh kasene denga awi iye rancak nangkiri bapa hong bisnis.

Oloh je bakas je tatau te hong ije andau malihi gawi bakas kea. Sahelo bara malihi kare panatau te bagi due jadi akan anak due biti je jadi bujang te. Tuntang iye mameteh kea hong lawin umur dengan anak badue te.

"Nak panatau toh uras lepah jadi bagikuh akan ketun due. Panatau je bagikuh toh tau lepah amun ketun diya tau mahapa, tau batambah amun ketun apik mangguna" kua dengan anak te.

"Kilen ampi cara mangguna mangat iye tau batambah pa?" Kuan je tambakas misek dengan bapae te.

"Cara ketun mangguna bagawi. Amun hong gawi ketun harus basapau Kajang. Amun hong kuman ketun harus manggau lauk mata saribu. Amun hong pambelom ketun harus sama kilau oloh tukang sadakah. Kute cara mangat panatau je bagikuh toh tau batambah are" kuan bapa malelei akan ewen due te.

"Iyoh pa" kuan ewen due te.

Diya lalau tahi limbah te bapae malihi. Balalu ngubur kilau adat budaya agama biasa. Limbah jadi lepah andau duka ewen nampara matur gawi hindai tumun lelei bapae dengan ewen te kea.

Akan anak je tambakas iye manumun auh lelei bapa te. Hong malan hapus tana uras nyapau hapa Kajang. Amun kuman hapus pasar iye manyuhu oloh nampunan kare matan lauk jelas rega hai. Kadang iye tau sambil nyadakah laka lewu aluh jatun oloh manenga akae. Kute-kute gawi genep andau te.

Kajaria tana je imbul parei te bahenda gawi jatun kana cahayan matan andau. Duit je are nampara lepah. Oloh are mayewut iye kurang waras gawi iye nyadakah pakaia bahalap still tamean buah-buah hong kajaria iye susah kea.

Beken dengan andi te, iye tulak susung kaput balawa bagawi akan tana sadang lasut andau iye buli akan huma. Melai huma diya tau melai balut balasan. Hong penampilan baju pakaia iye sederhana ih je penting barasih tuntang mangat hapa.

Kajaria andi te mahasil kare parei bakuyan-kuyan belek supa awi parei kana cahaya matan andau kilau bahut. Tuntang iye are tabunga gawi iye kuman diya lalau baintih sampai balut balasan gawi sesuai paname andau-andau. Amun jatun lalau pandinu hong jandau iye kuman balut balasan amun tege supa je labih haru balut je beken. Kute kea kare baju pakaia amun hong huma baya basalawar diya habaju, amun mananjung laka lewu hapa baju kaos biasa amun supa dengan oloh penting atawa apel maja pacar haru pakaian je taheta bahalap kea, amun akan bahu himba tana hapa pakaian je maram iye. Kutelah kajaria andi te tatau tutu gawi pas iye marima lelei bapae te.

Kutelah akhir kaka te manjatu akan kasusah kajaria jadi kuli umba andi. Padahal asal sama kare panatau bagi bapae baya iye mangkinan manta-manta auh lelei bapae te. Jaka je nenga bapae bua akae kina dengan bawak upak ayue te jelas jite sala hong gawi aluh bujur cara kuma.

Amun andi te je mahining auh bapae kute baya dua akan perbandingan ih awi bapae diya puji gawi manyapau hapus tana hapa kajang. Diya puji kea bapae nampunan kare mata lauk hapus pasar. Diya puji kea bapa nyadakah hapus lewu. Hetelah iye sadar taluh je kuan bapae te baya akan badingan uras.

Handak kaka manyala auh bapae je hamauh huran tapi oloh are manyaksi hambuen andi je tau labih tatau hindai marima je kuan bapae akan ewen te. Gawi te tanding itah tege. Ela je dos Dahuyan dos karap kana duhi sama kilau kaka je balalu kana duhi jadi. Awi iye sala marima auh bapae balalu sala hong manggawi.

Sabujur sarita jituh panjang baya duan inti sarita akan hetoh. Gawi lalau panjang kesah diya mangat kea lalau pandak kesah diya tame hindai hong pikiran.

Inyarita Awie: Sansana Sarita