Sampai Pampatei Mamisah Itah

Alem te sasar gantung aku manunggu iye je masih kicuh mintih baju pakaian hapa mananjung dengangkuh.
Metuh katika te tege pesta ulang tahun kawal ikey sakula, oloh bakas je tatau bahanyi manyewa ije kafe akan ulang tahun anak kesayanga je haru umur uju belas nyelo.
Kebetulan alem te pas dengan alem minggu, jadi dia masalah andau jewu dia sakula kea.

Iye masih deruh bahias mangat cantik tampayah, dasar iye rajin baaksi bahias hayak tampan bau mata dia lalau papa kea, kasai ingosok minyak harum inyamprot.
Alem te iye hapa baju warna bahenda basalawar panjang warna babilem, amun dia sala salawar te je miliku melai Banjar akae metuh jalananku maja kula jalahan melai lewu kanih.
Aku puna sayang uras dengan kare pacarku, pasti ketun kute kea kuangkuh amun dia sayang angat tentu ketun dia maku pacaran, ye dia?

"Nampi bahalaplah ampi kilau kutuh aku?" Kua misek dangangku je manunggu iye nyewutku ih ara te Bawi Busu.

"Kurang isut ampi ndi" kuangku denga.

"kurang narai ka, kurang sexy?" Kua mureh aku.

Aku puna dia tau manilai oloh je kare papa bagiku uras bahalap ih akan tampayah.

"Coba mutar ngalikut ndi" kuangku gau-gau masalah denga, iye mampahayak ih kuangku.

"Ohh... bahalap ih jadi. Cantik" kuangkuh mamuji iye metuh te.

"Bujur-bujur ka?" Kua misek je labih yakin hindai.

"Tutu te puna cantik gitangku" kuangku jujur menilai penampilan bara hong ateiku.

"Yo ih ara kue tulak ih amun kute" kua dengangku.

"Yo" kuangku tumbah kua sambil manalih motor meticku je miliku seken kea tapi masih bahalap masin akan hapa sur-ser ngaju-ngawa.
Mutuh katika te sambil sakula aku duan upah mamantat helat libur kadang tau umba kare mandup Bawui, Bajang umba tunda kula akan parak kayu kanih.
Tau kea umba duan upah jaga parkir amun tege acara hamalem melai kota toh, jatunti gawi je mahian hong kalunen toh amun jatunti kare kahias itah manggawi kutelah kameangku.
Maharap oloh bakas je belom susah dia olih kare mili hape, pulsa, motor tuntang bensin, jadi aku dia kea manyala ewen je mimbit aku dumah akan kalunen toh, gawi hong keluarga, suku, tuntang bangsa kueh bewei itah dumah hong kalunen jatunti itah mahandak jite baya je tau itah matur iye te jalan pambelom itah je naharep ih.

"Jadi nah ndi" kuangku misek je munduk melai likut motor.

"Jadi ka" kua tumbah balalu pateiku masin motorkuh.

"Muhun ih hindai" kuangku mawi iye bingung.

"Buhen ka?" Kua misek aku.

"Jadi lo kuam endau dengangku" kuangku denga hindai.

"Tau ikau ka lh marapus aku, yu jeleng ih jatun panan hureh toh nah" kua mawi sambil mangutip aku.

"Buhen nah handak kinam aku ndi?" Kuangku mawi iye je mangutip aku te sambil mambelum masin motorku hindai.

"Ancap ih, lambat kue kareh" kua mawi aku.

"Jadi nah?" Kuangku misek iye hindai.

"Ancap ih" rise dengangku iye jadi.

"Kareh helo mampelom roko helu" kuangku maulur waktu denga.

"Jadi kau kana kawu aku likut toh kareh"

"Buah haream mahakan ikau mamangkut aku" kuangku denga.

Balalu ikey due tulak akan tujuan undangan ulang tahun kawal ikey sakula ije kafe jadi inyewa, melai baun batunggang tege plang 'khusus tamu undangan' tege ije biti bawi manunggu batunggang te balaku undangan je imbagi tempun acara te andau helo te.

"Sip, silahkan masuk mas, mba" kua dengan ikey due pacarku marak je bakas iye bara ikey due, tapi ikey kue pacar benyem ih anggap riwut nagkalau ih jite ikey due tame akan huang sambil himbing lenge.

"Hayolah ewen due?" Kuan Rudi maningak ikey.

"buhen Rud?" Kuangku denga.

"Romantis tutu ampi ketun due alem toh" kuan Isna kawal ikey ije kelas kea.

"Dia kea tawam dia limbas rahas aku dengan komandan toh endau" kuan Bawi Busu umba iye.

"Nanjaru bawi busu ih ikau" kuangku mawi ewen due.

"Mahi dengan komandan jituh endau kicuh tutu aku gawi dia handak imbit aku handak kuehkah iye kua alem minggu?" Kuan Isna je sama ngomel kea dengan Rudi.

"Diakah ewen due toh tege rencana jadi" kuan Bawi busu hindai rami ewen due nahiu angat karahas atei masing-masing.

"Rud?" Kuangkuh.

"narai?" Kua tumbah.

"Jatunti ih" kuangku mawi iye hindai.

"Mander ih narai je handak mander ketun due" kuan Isna dengan ikey due.

"Senin kareh ih aku sanan akam Rud melai sakula" kuangku mawi ewen penasaran mahining.

"Paham ih aku" kuan Rudi marak je sama dia jelas taluh je mander.

"Jadi tabe ketun dengan Amel nah?" Kuangkuh misek ewen due hindai.

"Hindai masih toh, nampi itah hayak ih kah?" Kuan Rudi hindai mamakat.

"Dia ati sala" kuangkuh sambil manarik lenge bawi busu je masih bagandengan dengangku.

Musik tuntang lagu puna jadi mahiau band melai kafe te puna bahalap memain lagu "till death do us part" je populer gawi White Lion alu lagu toh cukup tahi jadi tapi mantap masih ewen imbit mawi kuluk gulak-gulak mahining marak je dia katawan narai arti lagu jite.
Tapi aku puna rajin kea hining lagu rock barat gawi hebat auh hining komposisi musik dengan lagu te terutama melodi gitar te je hanyut tutu auh, terkesan tutu angat lagu jite sampai wayah toh akangkuh.
Ikey balalu manalih Amel je munduk melai kursi manenga kado tuntang salamat ulang tahun akae, aku helu tabe denga.

"Salamat ulang tahun ndi" kuangku denga sambil tabe limbah te nuntut gawi Rudi tabe kea limbah bawi busu tabe dengan manyium iye bahiri ateiku nanture limbah te dengan Isna kute kea maklum sama bawi dia masalah ih jite.

"Ela helu bulilah" kuan Amelia je puna ara dengan ikey.

"En tege kea jadi cap bue pahimung esu jadi nyadiam nah Mel" kuan Rudi misek iye.

"Ela ikau manenga Rudi" kuan Isna.

"Sama ih komandan jite ela manenga iye" kuan bawi busu mawi aku.

"Buhen mawi ketun?" Kuan Amelia misek ikey hindai.

"Ikey due lagi rahas dengan ewen due je tege rahasia dia maku masana ikey" kuan bawi busu.

"Iyoh, ewen due kau nah tege rencana narai hindaikah je mikir ewen" kuan Isna mampakuat posisi ewen due.

"Jatunti kare rahasia, ye lo ndan?" Kua Rudi mawi aku.

"Jatun" kuangku pandak ih.

"Bujur, narai je handak mandermuh akan Rudi andau senin kuam endau?" Kua misek aku hindai mawi aku tatawe ih nampayah ampin bawi je ngabehu dia jelas.

"Masalah pe-er nah je ayungku masih hindai jadi andau senin kareh ih aku manyontek dengan Rudi" kuangku nenga alasan marak je Rudi sama rancak supa lime kea bahut.

"Awas ikau nanjaru aku sana senin kareh nanture ayungkuh" kuan bawi busu umba aku.

"Yo bey" kuangku sambil mangutil Rudi mangat mangejau bara hete.

"Te akan kueh hindai ewen due?" Kuan Isna dengan ikey due.

"Handak gau eka munduk helo" kuangkuh balalu manggau eka meja je puang hong kafe te.

"Carewet tutu dengan oloh bawi toh" kuan Rudi pas jadi munduk ikey due.

"Puna ih gawi nah ewen je kute nah Rud" kuangku mawi iye mangat bapikir positif ih naharep keadaan je kute masih.

"Narai je bisnis ketun due?" Kuan Anto kawal ikey ije jite je manalih ikey due.

"Nampi jadi pe-er ayum?" Kuangku asal-asalan bapander denga je sama kurang labih kapintar hong palajaran.

"Haha... sampet ih ikau bingat kare pe-er melai hetoh jewu-jewu ih mikir jite jitoh helo" sambil mandak ije kasa cap oloh bakas.

"Dia lalau olih aku, takkan ikau Rud" kuangkuh je lagi dia belai angat mihup masih.

"Puna komandan toh nah To dia belai amun je ije kasa kutuh" kuan Rudi sambil manakar aka kabuat.

"Jamen ih dijamin babusau amun mihup umba aku alem toh" kuan Anto dengangkuh.

Musik je nyaring ganti bagilir kalunen manyanyi tege belah manyumbang lagu manyalur bakat melai hete tege tengah belah ije grup band tampil mahibur ije due lagu mamparami pesta te.
Bawi busu dumah manalih aku denga Isna gawi gita ikey kanjera naharep ije kasa melai meja te.

"Yu kuman helu kareh mihup ka" kuan Bawi busu mawi aku sambil mimbing lenge sambilku, haru aku sadar wayah toh pacarkuh ije jituh puna dia maku nanjung hila gantauku tarus manduan hila sambil hal jite dia aku perhati katika jite.

"Yu itah kuman hayak ih ara" kuangkuh dengan ewen hindai balalu hingkat manguang eka bari balut melai beken eka meja.

Hong pesta te kalune puna dia lalau are undang baya ikey ije kelas telo puluh telo biti te gin tege je dia dumah limbah te ewen bara kelas beken tuntang bara sakula beken tege kea.
Amelia te murid pindahan Jakarta bara kakurik melai ibukota kanih jadi dia lalau tau kutak padahal bapa oloh itah indu oloh sunda blasteran istilah te kuangku madu.
Pacaran sambil sakula puna gawi kabangang anak tabela dia tapa kahana jite gawi je kanjera sadang pangina kuangkuh je rajin kuman bua enyuh toh nyamah kabuat mandi bahut gawi belai handak kuman je sadang.

"Nampi aku bahalap ih lah ka?" Kua misek aku hindai limbah jadi kuman lanjut dengan mihup hindai iye tukang takar akangku metuh te.

Takaran perang awi akangkuh untung baya bir ih jadi dia lalau bahali teguk.

"Cantik tutu ikau ndi" kuangku masih barendeng denga.

"Ela lalau daras mihup ka pahawen amun dia olih buli kareh" katawa amun aku jadi mihup bahut dia maku bali amun dia sampai mangkawang jite kalayau kabangangkuh metuh bujang maksudku metuh katabelangku.

"Yoh bey jamen ih" kuangku sambil palepah danum bara galaskuh sampai lepah.

Ikey due munduk hatukep sambil bapander nahiu jituh jite kare pelajaran, mawi aku tertarik tutu aku denga gawi iye rengking due hong kelas ikey hayak aku je humung toh rancak manyotek ih denga.
Nampi dia humung are mikir kare gawi pea panan balajar bujur buah sehingga tabagi konsentrasi gawi are je nekap tuntang je gawi, puna bahalai impercaya sampai puji tehau kepala sakula gawi aku jatun lembut ije minggu pertama limbah liburan.
Aku kanjera deruh gawi amas melai ngaju pas kanjera eka are sinde te sampai aku manahan dia sakula gawi amas je kute dia genep bagawi tau dinun eka je bahalap.

"ka kue umba oloh dansa yu" kua dengangku gawi kawalan beken muhun mambuka ruang eka ewen babigal.

"Aku dia tau nah ndi" kuangkuh puna katutu beken parusikan arep je kute.

"Kareh aku majar ikau rangkah-rangkah ih kue" kua sambil manunda lengekuh.

"Yo ih" kuangkuh mampahayak iye.

"Sambil umba payah oloh kue" kua tukep tutu hatarep ikey due ternyata kagantung biti tikas pindingkuh ih mawi aku harus nanture penda bapander denga.

"Iyo ndi" kuangkuh denga aku je dia puji kare manari manasai mahi kare dansa je adat oloh luar puna dia karewangkuh ih.

"Sambil malangkah ka" sambil mamander aku kilau balajar kuntao angatku gawi rangkah-rangkah aku malangkah masang kuda-kuda mahakan ikey due balihang kilau oloh je handak mampalua main.

"Ela lalau kaku" kua hindai mawi aku mahapan tenaga je balemu mangat gulung tau manumun.

Melai dunia toh puna are oloh bawi je bahalap bau mata baya je tau dengan arep, sama kilau maneser manggau pilus melai bentuk batang danum, ela je bahalap je dia lalau sapire gin duan oloh, kutelah kawalkuh puji hamauh.
Tapi Hatalla puna adil akangku jadi iye manyundau aku dengan Bawi busu hapa manutup kare kakurangan ayungku je are dia aku tawa palus sampai alem toh gawi lalau kakare kekurangankuh kameangkuh hong kalunen toh.
Gawi te lah aku maanggap uras kare gawi je tege hong kalunen toh balajar gawi jatun ati je langsung tau amun dia balajar tapi amun masih hindai lalau mengerti bangang ih tikas kutelah kameangkuh mangat tau serius tapi santai dengan masalah je naharep.
Gawi amun lalau serius masalah melai pikiran sasar batambah tapi amun lalau santai masalah balalu terbengkalai, tikas imbit bangang ih sama metuh kurik jatunti beban pikiran hong kabangang tapi jatunti je tarbengkalai kea hong usik.

"Hanjulu ih kaka tau jadi" kua sambil mangkut uyatkuh sambil nanture baukuh je babilem warna kupakkuh.

"Taulah angat ndi?" Kuangkuh sembarangan misek denga iye baya harinyum ih dia tumbah hindai, paksa aku ture bau kea je baputi bahenda gawi kasai tuntang sampaga puna tamam kea kuangkuh marima.

"Kue munduk hindai yu ka" kua makat aku munduk.

"Yu, itah guang kursi kanih" kuangkuh mimbit iye akan eka munduk sulak.

Haluli hindai aku mihup sambil ngobrol denga misek kare pengalaman ayue melai dunia hamalem.

"Dia puji aku ka amun ewen Indri, Lina, Santi, Dewi je gawi nongkrong lay laka diskotik" kua mamander kawalan ikey jite.

"Baya aku racak umba manari mawi je tege kataungku isut dansa te" kua hindai mamander arep.
Grop penari ewen te rancak kea tampil melai acara resmi jadi dia iye iragu hindai soal seni tari te akae.

"Kutekah, badayi ih ikau tau kea dansa" kuangku asal-asalan bapander gawi jadi nampara manda'i busau gawi jadi lime kasa jadi puang iye baya due galas ih mangawal aku mihup baya akan hapa manganan teah belai ih ayu dia kilau ayungkuh je akan manggau busau.

"Jadi ih ka ikau mihup" kua gita aku mambuka ije kasa hindai.

"Ije kasa ih hindai ndi" kuangkuh mawi.

"Ije maka ije bara endau oloh nah ngurang mihuo nah ka" kua manenga nasehat akangkuh.

"Ngurangkuh tarus ih dia puji aku manambah" kuangkuh denga.

"Ngurang narai je nambah tarus" kua mawi aku.

"Gitam bara kotak toh sasar bakurang jadi" kuangkuh sambil maninjuk kotak Bir je sasar kurang kare.

"Oloh mansanan akam bujur-bujur ayum urehmuh aku" kua hindai.

"Hureh nah ndi tatamba akan awet muda, mahakan jelang ngalilu" kuangkuh marak je sama dia katawan katutu jite.

"Jadi babusau hindai ikau toh" kua dengangkuh.

"Iyoh puna babusau kea ih aku baya dia kare gawi busau mihup busau gawim" kuangkuh sambil mangutil lenge.

"Ela gutil-gutil handak biru saran matam" kua sambil harinyum nyarenan tawe dengangkuh gawi aku je bahut hamauh denga kute amun baduean jakit virus kahumung iye gawikuh mawi aku tatawe ih denga.

"Dia lalau terus je kuam te narai" kuangkuh pura-pura badengen balalu manukep baukuh dengan bau kilau kesah handak habis.

"Ela ka gitan oloh" kua mambisik aku.

"Adu bey ndan" kuan Lita je munduk dia lalau kejau bara meja ikey due te dengan pacar Anto.

"Haha... dia kea baya gawi suara musik lalau kanyaring mawi heka kea angatku bapander nyaring" kuangkuh manenga alasan setengah tutu setengah sala.

"Dusah ikau nanjaru aku" kua mureh ikey due.

"Tutu kuan komandan nah Ta" kuan Bawi busu mandukung aku.

"Tutukah bujur Su?" Kua misek hindai.

"Bujur nah Ta mapai dia ikau mahining musik je nyaring te" kua dengan Lita.

"Haha... amun je bujur te sama tumun Lunju nah banda" kuan Lita denga sambil hetang tatawe.

"Percaya ih aku komandan je mandup Bawui Bajang kau panjang tantahan lunju gitangku" kuan Anto umba bapander.

"Dia ngerti aku je kuan ketun due kau" kuan bawi busu kesal kea hababaka ewen due bara silan meja.

"Ela lalau hatumba kalayau ewen due kau, gawi bahiri ih te nah" kuangkuh agak nyaring mangat ewen due mahining kea.

"Kahiri-kahiri pire kasa jadi palepahmuh?" Gita taheta hindai kasa hong meja metuh kanjera laya aku mukei ije hindai akan mihup.

"Teah belaikuh nah ndi ije tarus ih bara huran" kuangkuh denga.

"Jadi ih kue lepah ije kasa jituh buli ih hindai" kua balalu iye hindai manakar akangkuh tuntang akae kea.

"Ela helo buli masih hindai lepah kesah itah nah" kuan Anto je jadi nampara babusau kea gitangkuh metuh te.

Tapi ikey due dia tumbah hindai mikeh sala panyeneh gawi sama nampara babusau angat kameangkuh.
Sinde te iye umba mihup kea mandohop aku mangat jeleng lepah danum te bara kasa mangat jeleng buli.
Alem te aku puna bujur babusau kea babehat angat takuluk ruyang angat tanjungku mawi iye mangandeng aku balua kafe te, amun dia sala jalatien kasa pihupkuh te puna besuh kanai gawi danum ih.
Kunci motorkuh julukkuh aka manduan iye je barendeng mimbit ikey due buli, andau jadi bentuk alem alu aku masih kontrol tapi dia olih mimbit motor.

"Bamalem ekakuh ih ka" kutelah je hiningkuh pas ikey due tende melai barak aku benyem ih dia tumbah gawi kulukkuh sasar pehe hayak babehat angat.
Iye mangandeng aku tame jn huang kamar menter melai ranjang limbah iye balua namean motor mahakan nakau oloh busaukuh puna daras tutu baya je tege pingatku iye mampei lampu listrik je matei je pasti aku hanyut batiruh dia katawan ije-ije hindai.

"Ka, misik handau jadi" kua mampisik aku.

"Ancap mandui helu haru kuman mangat dia haban" kua dengangkuh.

"Hong kueh aku" kuangkuh tarewen kea angat gawi harum ewau bantal guling uluh bawi te.

"Melai barakkuh buhen ka?" Kua misek aku.

"Kilen ikau bahanyi maname aku akan hetuh?" Kuangkuh misek iye hindai.

"Aku dia bahanyi magah ikau buli gawi ekam kanih are preman amun jadi gantung alem nah ka" kua manenga alasan akangku memang tutu kea je kua te gawi komplek ekakuh hete dia lalau beres kalune.

"Tapi aku jatun manderuh ikau lo?" Kuangkuh misek iye hindai.

"Tawa ikau masa ikau dia tawa?" Kua sambil harinyum dengangkuh.

"Mandui ih helu bakulas aku hining tanjarum" kuangkuh balalu hingkat malih wc limbah te haru mandui.

Bara jitelah aku sasar akrab denga sasar mangejau dengan kawalanku pamihup pambusau aku sama supa ije dunia je taheta denga terutama masalah sakula aku labih rancak mambahas batukar pendapat denga mahi metuh katika jite ikey sasar tukep dengan ujian sakula kelas due belas ikey due labih are balajar melai barakku atau melai barak eka.
Sampai akhir ikey sama lulus aku dia manyangka nilai ujianku jadi peringkat kadue hong sakula gantung bara ayu je baya supa peringkat katelo jite aku maanggap keberuntungan ih gawi melai jawaban je pilihan ganda tentu diantara epat jawaban baya ije ih je bujur.
Metuh hong ulangan biasa baya supa rengking due atau telo bara terakhir aku je nampayah hasil nilaiku gin dia percaya tau tambalik kalute gawi keberuntungan.

"Ka aku handak buli lewukuh helo pandehan pendaftaran kuliah buka" kua hong ije kalemei melai barakkuh.

"Yekah aku gin handak murik gau modal helo hapa kuliah" kuangkuh denga.

"Ka ikau cintalah angatmuh dengangkuh?" Kua haru misek serius mungkin iye sasar dewasa jadi kuangku marima.

"Buhen ndi?" Kuangkuh misek denga.

"Aku dia rela amun kaka baya handak mempermain aku ih" kua sambil ria-ria mata nampayah aku.

"Aku cinta tutu dengam ndi" kuangkuh

"Kaka harus janji harus setia amun cinta dengangku" kua balaku janji dengangku.

"Kaka janji setia kecuali matei je mamisah itah kue jeha" kuangkuh sambil mamangkut ngatau iye entah hambuen sabab iye sana tau kalute andau te misek kepastianku, benyem suni iye mangkutkuh.

"Kak, ingatmuhlah melai ulang tahun Amelia bihin?" Kua misek.

"Narai te ndi?" Kuangkuh dia paham je kueh je ingat.

"Metuh ikau babusau batiruh ekakuh nah?"

"Metuh te?" Kuangkuh denga.

"Iyoh" kua tumbah pandak ih.

"Aku dia bingat ndi gawi karas busaukuh metuh te" kuangku jujur denga.

"Dia mungkin sampai dia bingat, tapi dia narai ih jite jadi mahalau kea nah ka asal kaka cinta tuntang setia dengangku sukup ih akangkuh" kua dia maku mamander narai sabujur je maksud te sampai aku je tempun biti bertanya-tanya hong ateikuh.

"iyoh ih amun ikau dia hakun sana akangkuh dia narai ih" kuangkuh bakulas mamaksa iye manyarita.

"Ka aku handak buli gawi jewu aku handak akan ngaju" kua malapas arep bara pangkutkuh.

"Buah-buah ih ndi melai jalan" kuangkuh denga

"Kaka je buah-buah melai huma ingat janji nah ka" kua sambil manyium pipikuh balalu balua bara barak te aku magah sampai baun huma ih iye balalu lumpat motor metic tulak.
Aku melai barak kabuat munduk mamikir narai sabujur je terjadi dengan ikey due alem te semakin aku mancoba mingat semakin dia bingat puna tahapus bara ingatanku taluh je terjadi alem te.
Kesimpulan te aku manyewut puna batiruh ih jatunti gawi kare sala gawi puna bujur-bujur babusau aku metuh te.
Laka jam jalatien hamalem hapeku mahiau nampayahkuh aran Isna mamangil.

"Narai kua toh" kuangkuh hamauh kabuat balalu angkatkuh akae.

"Komandan busu tabrakan" kua langsung hamauh.

"Hau babuah auh ela hureh" kuangkuh denga.

"Akan rumah sakit umum ikau toh kea ikey tege hetoh jadi intu UGD" kua serius tuntang panik kea auh nada.

"Pea kejadia? Kalampi keadaan?" Kuangkuh misek tarus.

"Ikau ih akan hetoh jam uju endau kejadian ewen keluarga haru sampai kea melai hetuh indu bapa uras tege jadi kare kawalan gin uras dumah tikas ikau ih hindai" kuan Isna dengangkuh.

"Iyoh aku akan hekau kea toh" kuangkuh.

"Capat ih ela lalau are aksi" kua balalu patei telpon te.

Aku balalu ancap mangganti baju pakaianku dia tapelai kea aku bado'a balaku petunjuk dengan Hatalla je kuasa mangat Bawi busu selamat bara bahaya je menimpa te.
Meski aku laju bagarak tapi aneh ateiku tenang pikiran jernih mungkin kutelah angat je ikhlas jadi meski aku balaku dengan Hatalla tapi Hatalla katawa maka nenga keikhlasan akangku katika te.
Gawi puna laju aku manjalan motorku dia tahi sampai akan rumah sakit aku, nanture Isna dengan Anto tege melai baun UGD te dengan oloh je beken je dia aku kasene mata bau metuh te.

"Sabar ih ndan" kuan Isna manalih aku.

"Buhen ampi busu nah?" Kuangkuh denga.

"Mungkin iye baya manunggu ikau ih hindai" kuan oloh bakas ije umba hamauh kea dengan nada je sedih, haru aku tawa rahian hindai bahwa iye te bapa bawi busu te limbah jadi kare kenalan dengan keluarga je manunggu hete.

"Yu ken ikau ture hindai" kua mamakat aku tame akan UGD te.

"Yu" kuangkuh manuntut bapa bawi busu te.

Nanturekuh takuluk bawi busu lepah badaha tahaseng leteng lembut tapi angatku ateiku puna jadi siap naharep kenyataan je kilen ampi bewei.

"Keadaan ayu toh parah takuluk tege je pusit jadi pire-pire tulang biti pulek" kuan bapa hamauh melai balikatkuh, aku kagum oloh kute kuat tutu mental naharep kenyataan kute malahan tenang iye manjelas penderitaan anak ayue.

"Taulah aku manukep iye ma?" Kuangkuh misek hindai.

"Takkan ken gawi katahin toh mantehau ikau tarus" kuan bapa bawi busu te.

Balalu nalihku manukep iye turekuh ampi limbah te aku laku do'a bara balikat gawi tikas jite ih je katawangkuh cara je mungkin tau mandohop iye.

"Ka..." nanture aku balaku do'a aku benyem ih hindai lepah do'a kuh masih.

"Ka... aku dia olihkuh mangawal ikau hindai" kua suara je sasar balemu.

"Jamen ih ndi" kuangkuh mahibur.

"Ka... aku are ampun maaf dengam gawi are kasalaku dengam" kua sambil manarik tahaseng hindai.

"Iyoh, ikau maafkuh tuntang jatun kasalam kea dangangku tuntang aku balaku maaf kea amun tege kare kasala ku dengam" kuangku denga.

"iyoh, ka ingatmulah pakain je hapaku toh" kua sampet mingat aku.

"Iyoh" kuangkuh sambil manungak kuluk pakaian je hapa te ye te pakaian je hapa manalih ulang tahun Amelia dengangkuh bihin.

"Aku handak bapander dengan umai bapaku hindai ka" kua dengangku

"Iyoh ndi kareh aku tehau ewen akan hetuh" balalu manukep aku manyium bau je sangen kameangku nampara.

"Ndi aku cinta dengam" kuangkuh pas manyium.

"Aku.." tikas jite ih je hining.

Aku balalu bundur likut balu bara ruang eka iye ture-ture payah gawiku kute.
Babehat je angat atei malihi iye tapi kutelah janji itah belom hong kalunen toh jadi tatau sanang pintar harati jadi pejabat jite dia pasti uras tapi amun matei jite uras pasti mangkeme jatunti ije biti kalunen je tau lapas bara jite.
Balalu manderku akan bapa iye handak pander denga ewen.

"Taukah iye bapander jadi ken?" Kuan bapa misek aku.

"tau ih ma" kuangkuh balalu bapa manukep anak te.

Limbah te indu balalu manderku kea mangat mahining peteh terakhir bara bawi busu akan indu dengan bapa.
Kutelah singkat alem te kea bawi busu malihi itah buli akan Hatalla je kuasa.
Sesuai dengan peteh bawi busu te kea andau jewu iye balaku ingubur bajeleng aku umba magah tuntang metun pati kea sampai akan eka istirahat je terakhir.
Metuh mangubur ujan rihe-rihe andau bahenda tanda Langit umba berduka, limbah jadi ngalian masan kare mesan matan andau lembut melai langit barat pelangi lampang melai timur mudahan Hatalla mambuka akae jalan jadi bidadari je melai surga je are kebahgiaan.
Bawi busu cinta ayungku je pertama sampai matei dia aku ngalapea.

Sama kilau itah mananjung hong wayah je bahalap.

Tende into pulau ije bahalap

Tuntang katawan bahwa ikau ayungkuh.

Jatun atun hindai hong dunia toh.

Je kueh je kataungkuh diya aku manolak manggawi.

Iyete tatap tege into balikatmuh tiap andau.

Tiap jam tiap menit

Nekap ih lengekuh tuntang nantalua ih aku mimbit.

Uras je tege hong pambelom ayum.

Aku tarus tege into balikatmuh.

Sampai pampatei je mamisah itah due.

Sayang, aku baya jadi kawal

Sinta ayungkuh diya atie hapus.

Sampai pampatei je mamisah itah due

Metoh aku takisik hong tiap andau.

Dengam bitim je tege mangkutkuh.

Aku dia pecaya taloh toh sama kilau angat aku hong nupi.

Metuh aku nanture bawak matam.

Aku diya pacaya amun taluh awang toh bujur.

Bahwa ateikuh jadi ikau tempu.

Sayang tau keakah itah supa taluh awang toh?

Sayang nekap lengekuh tuntang nauh ih aku mimbit ikau haguet.

Tege katika je bahalap.Tege katika je papa.

Baya aku tarus mendeng into balikatmuh oloh bawi ayungkuh.

Sakalepah.

Main Nyelo Je Nangkalao.

Sama Kilau Pambelom Toh Je Mameteng Itah.

Metoh Salju Katika Muhun Into Wayah Sadingen.

Aku Tarus Ngalasu Ikau.

Yoh Yang Aku Je Manggawi.

Yoh Yang Aku Tarus Tege Into Kanih.

Tuntang Aku Katawangkuh Kea Ikau Je Tege Into Kanih.

Sampai jeha.

TILL DEATH DO US PART
(Sampai Pampatei Je Mamisah Itah)

Inyarita Awie: S.S