Aceh Tatau

Atun ije oloh tatau tege belom hong jaman huran. Iyete pambukih tutu sampai kuman santar balut balasan (acan). Maka hindai iyete belom jatun kare anak sawa sampai kabakas. Hong kabakas te baya ije akee hatue je duaa akan akan angkat tuntang haragu iye hong kabakas te. Akee je dua te gin jadi bakas kea nyewut ih aran akee te Uder.

Mama Aceh te oloh hatue je tatau huma seruk ha'i hayak segah gawi nampa kabuat acie buah-buah bahalap ampi. Limbah te Aceh te lumbah petak danum ayue gawi katika te sapire kagancang ayum ih mandirik maneweng petak danum akam. Hong hunjun petak danum je lumbah te Aceh bakabun karee macam bua, mungkin tau sampai baratus macam jenis bua hete. Hong danum tege kapal je ha'i tuntang Aceh te are kuli jipen bagawi umba iye te.

Sasar andau itah balom hong kalunen toh sasar bakas. Kute kea dengan Aceh te sasar bakas kea, hong kabakas iye are manetep hong huma hindai. Kare gawi nampara nyaraha akan akee nangkiri iye akan urusan je kejau hindai. Hong ije andau akee te buli tugas akan huma mama hindai. Ake Uder te are mimbit kare lauk je mangat-mangat tuntang pundang daging Sapi, Bajang (dendeng mungkin jituh). Sampai huma Uder balalu pakasak kare lauk je imbit te tuntang nyarunga kea akan mama te, metuh ewen due kuman ewen due bapander.

"Bara kueh ikau supa kare lauk toh ken?" Kuan Aceh misek.

"Milikuh melai saran tasik kanih dengan oloh, mangatlah ma?" kuan Uder denga.

"mmhh! Masih mangat lauk balasan sabujur ken bara jituh. Baya gawi ikau nyarungan akangkuh jituh barangai ih aku keme" kuan mama sambil cip-cap kuman.

Mahining je kuan mama kalute Uder benyem ih ancap kuman mangat gulung malayan. Aceh te puna oloh je tatau tutu are mahaga kare Sapi, Bajang, Hadangan, Bawui, Palanduk, Manuk, Kambing, Domba, Kuda sampai Onta gin tege pelom. Gawi metuh tabela iye te kejau namuei tasik sampai kare Cina, India, Arab, Inggris, Perancis, Balanda kanih eka tamuei dagang Aceh te.

Hong ije andau Aceh te haban darem-darem sulak diya lalau belai kuman. Ake Uder te dumah haragu iye je haban te manggau kare tabib ngaju-ngawa hapa natamba mama je haban te. Mama je haban te tapa are diya lalau maku batatamba, puna kute rata-rata oloh je haban te diya lalau maku baobat. Tapi gawi ucuk awi Uder iye hakun kea. Pire-pire oloh je mariksa natamba Aceh sama-sama pendapat bahwa penyakin Aceh te gawi pehe atei ih, barigas ih iye amun terai pehe atei jadi kuan kakare tabit je natamba. Puna jatun obat amun pehe atei te sampai wayah toh, tikas hapa kaikhlas ih tatamba penyakit te.

Uder sama bingung kea nampi natamba panyakit mama je kute. Ngatau mucuk bahali tutu, sukup macam katau Uder te dengan mama te sampai nyarungan oloh bawi mikeh tau pakeleh jatun kea hasil. Sasar andau Aceh haban sasar uyuh kea gawi iye sasar diya belai kuman, jitelah je mampatei oloh haban amun dia belai kuman. Biar haban amun lawan kuman masih jamen ha'i masih harapan tau keleh.

"Ma, kilen angatmuh diya handak kuman kare manuk ikau? Mangat aku nyambalih pakasak akam." Kuan Uder dengan mama te.

"Ela ken sayang" kuan mama.

"Sara'i mama masih olih kuman. Amun diya nyambalih kare sapi hadangan te ih" kuan Uder denga hindai.

"Ela ken jite akan jual ih" kua Aceh denga.

"Nampi ih je ikau diya belai kuman kutuh? Atawa ikau handak kuman dendengah, pundangah, mangat aku manyuhu oloh mamili akan saran tasik hindai?" Kuan ake denga.

"Diya ken, ikau handak pasusah aku je kukau auh" kuan mama je metuh te masih olih kuman baya bapait belai ih jadi unyi-unyi iye kuman bari te.

"Diya je kute nah ma, kare amas intan tuntang kare panatau ayum toh nah jatun atie kea je imbit akan lewu liau. Hayak biar ikau handak kuam kuman kare toh-te amun je jadi diya olihmuh maneguk akan oloh je barigas ih" kuan Uder manenga pandangan akan mama je pambukih te.

"Diya ken" kuan Aceh denga.

Panyakit Aceh diya je salenga kea, jalan andau jalan diya belai kuman. Kare obat je nenga uras diya jalan ampi. Kilenkah hong ije andau iye hamauh dengan ake je manjaga iye.

"Ken coba ikau nyambalih akangkuh kare Sapi Hadangan itah kau" kua, diya katawan bara kueh pikiran mama te sana hamauh kute hong keadaan je paham jadi.

"Iyoh bei ma" kuan Uder balalu manyambalih ije due kungan Sapi Hadangan te tuntang balalu nyuhu oloh pakasak akae mangat-mangat daging metu te.

Kuli Jipen je are te rami-rami pakasak daging te dia lalau atie katahi masak gawi ewen dengan bapuluh macam kare masakan je jadi. Limbah jadi balalu nyarungan Uder akan mama hindai.

"Toh ma! Jadi masak je kuam nah" kuan Uder sambil mampunduk mama je jadi diya olih hingkat te. Mama mangkeme puna mangat ewau masakan te minjuk isut, baya gawi iye je jadi haban paham hindai diya olih maneguk danum gin diya olih tame. Mangkeme je kute balalu manangis mama sambil hamauh.

"Tutu kuam ken. Jaka bihin aku nyambalih kuman kare daging toh tege aku keme angat. Kotoh aku diya olihkuh maneguk hindai jadi. Tikas akam ih aku manyarahan uras kare panataukuh toh ken. Aku katahin toh belom hong dunia sakalinya baya manyiksa arepkuh kabuat ih." Kuan Aceh sambil mahasur danum mata gawi kamea angat jadi handak tukep lepah umurah.

"Dusah itah manyasal ma, jituh puna jadi garis awi Hatalla. Amun itah hong naharep masalah marak atei je manyasal baya akan manambah ehat masalah itah ih" kuan Uder je katawa kea mama te puna uyuh.

"Tutu kuam ken, aku percaya dengan taluh je kuam kau. Handak menter ih aku hindai ken" kuan Aceh balaku penter hindai.

Uder balalu penter mama hindai limbah te iye nampunan kare piring panginan te andak akan dapur hindai. Hamalem te mama te malihi gawi sampai janji umur jadi.

=LEPAH=

Manumun auh kuan oloh bakaskuh je nyarita akangkuh Aceh Tatau toh oloh itah je belom hong batang danum Kahayan eka melai. Are ampun maaf amun aku nyarita toh dia lengkap gawi aku nyarita toh baya hapa pingat ih je jadi hong panyeneh je kapire hindai are hubah aku manyarita baya dasar sarita masih aku ingat jite.

Gawi amun aku taingat sarita jituh amun tege duit je labihan aku biasa mancoba mili panginan je larang kea atawa hong restoran, baya amun duit sama niha-niha sama ih balut Uyah Balasan kea.

Tujuan itah bagawi iyete awi handak kuman, itah kuman mangat hapa malalus gawi hindai.

Itah mampelom kare Bawui, Sapi, Hadangan, Manuk awi itah handak kuma.

Itah mimbul kare bua, sayur tuntang Parei awi itah handak kuma.

Itah mamili kare kendaraan awi itah handak mahapa.

Je kalabih te ih je akan jual hindai.

Kutelah inti ajaran je olihkuh manyewut bara sarita je hunjun te.

=Salam Tabe=

Iyarita Awie: Sansana Sarita