Atun ije sarita metuh huran tege ije oloh je belom malan manana je tiap andau tarus bagawi babehat hapa marubah ampin pambelom aie. Aluh jadi bagawi sakalepah kalute tuntang hati-hati kea hong balanja tatap kea je dia sukup akan tabunga kea, tarus baya-baya jatun kare kalabih.
Hong ije alem metuh ie batiruh ie nupi supa dengan ije biti oloh bakas tuntang hamauh denga te hong nupi.
"Amun hong penda andau toh tege taluh je bahali angat ikau supa, hong ije katika taluh jite sabujur tege melai baun matam kabuat" limbah hamauh kute ie balalu takisik bara tiruh, menter marima nupi te ie. Ie baya baharap hong ije hanjewu tau supa kare amas intan melai hong pasah eka melai te. Amun jadi kute maka ie dia ragu hindai bahwa jite bagian akae jadi, gawi ie bisau bagawi cangkal jadi jatun rima kea.
Jadi main andau nangkalau limbah nupi jite ie tatap rajin kilau bahut bagawi, kilenkah metuh ie mananjung mahalau into tana oloh sana baju sangakawit hong kayu silu antang (entah kutak beken dia aku tawa ara kayu te aku baya manampa ara kute gawi duhi te sama kilau silu antang). Baju je baya isut mikir amun je sangkut tarus sasar are rabit baju kareh balalu jawut pisau ambang marasih manetek upun kayu te je are kea belom hong saran jalan te. Metuh kanjera tejeb-tejeb marasih jite sana ngaricing ambang te kana taluh je batekang. Penasaran angat atei balalu ie mangakas upun kayu silu antang te balalu rukat akae kayu te sakalinya hong penda kayu je rukat te tege Balanga je bakiwak isut gawi kana ambang endau. Balanga te batutup rapat ampi balalu ie mambuka tutup jite nanture huang balanga jite tarewen angat atei je amas kuntep hoang Balanga te. Sulak ie sanang tutu nanture amas je ware tutu hoang Balanga te, tapi sana ie limbah bapikir hindai balalu ie hamauh kabuat.
"Aku puna handak tatau kea baya aku balaku amas te tege into rumbak pasahkuh, tapi hambuen aku supa melai hetuh petak tana oloh hindai. Arti te Balanga tuntang Amas toh dia ie bagian akangkuh nauh ih pelaikuh melai hetuh ih" kua sambil manutup hindai Balanga te tuntang manawu hindai balalu ie buli malihi.
Metuh sampai pasah ie bakesah dengan sawa ie tege nampayah Balanga je huang kuntep amas. Sawa balalu sangit tutu denga te gawi dia manduan Balanga te akan pasah ewen te rahas tutu ie umba bana te gawi kahumung te. Bana dia manduan atei auh sawa te ancap ie patiruh arep gawi puna heka tutu angat biti bereng limbah bagawi malan manana, metuh bana batiruh te sawa mananjung maja eka tetangga silan. Ie balalu bakesah nahiu ampin kamameh bama je dia manduan Balanga te akan huma.
"Kabalingkuh te puna humung tutu amas ije Balanga lihi hong tana kanih dia hakun mimbit buli akan huma. Coba ikau mandua akan tana kanih akan ketun aku baya balaku isut ih" kuan sawan oloh je nanture balanga te dengan tetangga.
Tetangga te sanang mahining jite mahi nenga petunjuk eka barang te balalu haguet akan tana ie manalih panatau te. Sampai hong eka je mander sawan oloh te balalu ie mambuka kare uru rutik hete, puna tuti tege masih Balanga jite hong hete batutup rapat ampi. Metuh ie mukei tutup Balanga te ie tarewen tuntang basingi tutu nanture hoang Balanga te sakalinya hoang te dia ie kare amas je kilau kuan sawan oloh te tapi handipe kare Hanjaliwan je bawisa uras melai hoang Balanga jite.
"Oloh bawi je matekiapi kea pasti maksud handak manjabak aku toh. Ie pasti maharap aku balalu majuk lengekuh akan Balanga toh mangat kana tutuk gawi kawan handipe toh mangat aku matei karacunan, kareh ie keme aku mambaleh akae ie te" kua sambil manutup Balanga te hindai tuntang manduan Balanga te imbit akan huma.
Metuh andau jadi gantung alem kea ie manalih akan pasah oloh je pamalan te, ie nanture tege ije masih basengok je bauap. Ancap ie mandai tuntang balalu manusuh akae handipe je bara Balanga te akan hoang huma oloh je pamalan te limbah te ancap buhau bara hete akan huma hindai.
Hanjewu andau oloh je pamalan te misik batiruh ie balalu mananjung akan dapur handak mihup danum baputi. Metuh ie mananjung ie nanture ware duit amas je bahambur kanih-kate hapus huma. Ie hong atei basukur sambil hamauh.
"Akhir aku tau manarima kare panatau toh, gawi jituh pasti tujua akangkuh. Gawi ewen toh jadi dumah akan humakuh, sama tumun kanahoangkuh kea" kua sambil nampunan amas te, kutelah asal balalu ie jadi tatau akhir.
(Lepah)
Petehkuh;
Itah harus harati nanture nampayah palus ngasene kesempatan je tege. Hong manduan kesempatan itah harus ngasene mangat itah ela manduan kesempatan ayun oloh beken. Sama kilau oloh je pamalan je dia maku manduan amas Balanga metuh huang tana, gawi ie mangkeme amas Balanga te beken akae. Amas Balanga je tege hoang tana te je nanture, eweh tawa jite ayun oloh beken.
Memang je kuan oloh are " eweh je laju ie je dinu" tapi taukah ikau sanang belom melai hunjun penderitaan oloh beken?
Metuh kesempatan jite puna jadi dumah tuntang ikau yakin kesempatan jite puna akam, maka ikau ela manunggu mentai hindai ancap manduan kesempatan jite.
Gawi jitelah, mata te harus barendeng nanture akan kaliling. Kesempatan jite mungkin jadi tege hong sakitar arep jadi baya itah kadang kurang mamperhati. Gawi biasa taluh je bahalap te dia manarik hong tampayah mata.
Mata tau manipu arep kabuat.
Pinding tau nanjaru arep kabuat.
Urung tau nanjaru arep kabuat.
Inyarita Awie: Sansana Sarita
0 Pendapat:
Posting Komentar
Dohop Nulis Komentar Hapa Kutak Itah.
Tarima Kasih.