Kelep Manamuei

Atun ije kesah tege ije kungan Kelep je mananjung manguan jalana hong lasut andau te. Wayah mandang mawi kare sungei saka lepah keang awie kalasutan. Kelep paksa mananjung manggau eka belom je hadanum hindai sambil manetei saka je jadi keang te.

Hong tenteng jalana te Kelep supa dengan ije kungan Sabaru je kanjera mangudun melai upun kayu mahila bara lasut andau je manyangit tutu. Sabaru mangudun naharep saka je jari keang te marima ampin gau eka manggau lauk akan pangina, nanture Sabaru je mangudun te balalu Kelep maningak ie.

" oh nger... narai mawi mangudun hekau nger?" Kuan Kelep denga.

"Oi... nger! Mandam aku marima nanture kare sungei saka itah toh je jari lepah keang nger je balalu mawi bahali manggau kare lauk panginan hindai nger! Maka aku bara hanjewu endau masih jatun atie kuman aku toh nger, ikau narai gawim nger?!" Kuan Sabaru denga.

"Sama ih nger! Aku nah sama jatun kuman kea masih nger! Ye aku je nanjung toh nah manggau eka je labih are danum nger" kuan Kelep tende pander dengan Sabaru te.

"yekah, handak akan kueh jalanam toh hindai nger?" Kuan Sabaru misek Kelep te.

"Handak mangumbang laka bahu himba ih gawi toh nger, en ikau nger?" Kuan Kelep misek Sabaru hindai.

"Sama diya tawa aku toh nger masih. Jari tarawang laka hunjun pulau kayu toh nger jatun aku nanture kea eka je hadanum nger" kua mamnder usaha jari akan Kelep.

"Bada'i ih amun ikau je bara hunjun nger tau tahalau eka je hadanum nger! Awie eka je hadanum amun wayah pandang kalutuh nger baya batisa melai upun kayu je labat nger balalu diya gitan amun bara ngambu nger" kuan Kelep manjelas akae keadaan wayah pandang te.

"Haw! Tutu kea kuam te nger" kuan Sabaru manutu kuan Kelep.

"Nampi kuam nger amun itah kue pakat manggau eka je hadanum nger?" Kuan Kelep mamakat Sabaru te.

"Tau kea te nger itah kue manggau eka je balauk nger" kuan Sabaru tatarik kea handak umba jalanan Kelep te.

"Iyoh nger, nampi kuam kue haguet ih nger?" Kuan Kelep mamakat Sabaru te.

"Yo! Itah kue haguet ih arae" kuan Sabaru.

Ewen due te balalu haguet mananjung manyuru kare penda kayu jalan Kelep te je akan seruk sare mananjung te. Kanatek ewen due te manyuru kare pandang Uwei imbit Kelep, mawi Sabaru je umba manuntut jalan Kelep te lepah bulu rabit rusai-rewei sakawit kana duhi Uwei. Kana kua ewen due manyuru kare luaw, lepah petak-petak hindai biti Sabaru je umba manyuru gawin Kelep te balalu kale-kale lepah Sabaru te.

"Kayah nger! Atun laka due telo andau kue manguan tanjung jalanan kalutuh tau matei aku nger!" Kuan Sabaru denga.

"Buhen nger?" Kuan Kelep denga.

"Lepah kare bulukuh sakawit kare duhi tuntang petak-petak hindai biti berengkuh" kuan Sabaru.

"Puna ih nger je petak-petak nah tanda itah kue jari bagawi maluhak nah" kuan Kelep dengan Sabaru te.

"Yekah nger!"

"Yoh!"

Mahining je kute kuam Kelep Sabaru diya maku manahiu hindai masalah jite ie benyem manuntut Kelep te. Diya lalau tahi andau halemei jari ewen due balalu tende manggau eka bamalem hong pulau kayu te. Kelep batiruh hunjun petak Sabaru batiruh masan hong edan kayu ewen hanyut tiruh awie kahekaan biti bereng limbang mangumbang pulau kayuan te.

Andau hanjewu ewen due hakawal te misik.

"Salamat Hanjewu nger!" Kuan Kelep dengan Sabaru te.

"Salamat hanjewu kea nger! Tege nupim ikau nger?" Kuan Sabaru misek Kelep te.

"Jatun nger! Buhen ikau tege nupimkah?" Kuan Kelep denga misek.

"Tege nger aku nupi alem endau" kuan Sabaru.

"Haw! Kilen auh nupim alem endau nger!?" Kuan Kelep denga.

"Aku nupi tege tarawang nger akan hila Selatan, metuh aku tarawang te sana tege nanture ije luaw je hai nger hong betuk tana eka hayak are tutu lauk kip-kup sinde tungap. Nanture kute aku balalu tende tuntang mangaruhi hete nger sambil kuman sampai besuh angat aku te." Kuan Sabaru tende manggau kesah hindai.

"Mangat ikau tiruh te nger" kuan Kelep denga.

"Tuntang bara nupikuh te aku balalu bingat nger ije luaw je tege melai bentuk tana je puna are lauk hete, jari aku andau toh handak akan hete ih nger" kuan Sabaru sambil mambuka palapas mambirik tisa petak je keang melai bulu.

"Kilen kakejau bara hetuh nger?" Kuan Kelep tatarik mahining kesah tuntang nupi Sabaru te.

"Amun mananjung kilau ikau nger tau sampai telo andau telo alem nger kue haru sampai jake lepah awie oloh beken. Amun aku bahut jandau-jandau ih nger tarawang" kuan Sabaru denga.

"Kayah ngerlah padahal aku handak angat akan je kuam kau kea, baya bahali ih amun je kuam kute nger" kuan Kelep pehe atei awie je diya olih akan eka je kuan Sabaru te.

"Jamen ih nger aku diya kea je malihi ikau je kawalkuh. Kareh aku mimbit ikau tarawang nger mangat kue jeleng sampai akan luaw te" kuan Sabaru dengan Kelep te.

"Taulah nger! Ikau mimbit aku?" Kuan Kelep denga.

"Tau ih, ikau lumpat akan likutkuh kareh mimbit ikau tarawang hindai" kuan Sabaru dengan Kelep te.

Balalu Kelep lumpat akan likut Sabaru te ewen due siap haguet manalih luaw je kuan Sabaru te.

"En jari nger!?" Kuan Sabaru misek dengan Kelep te.

"Jari nger!?" Kuan Kelep denga.

"Batekap dehen-dehen ikau nger!"

"iyoh!"

Balalu ewen due te tarawang, sulak Sabaru te tarawang randah-randah ih nangkalau kare penda kayu. Mangkeme je tarawang kute Kelep te hanjak tutu, gadah-gadah tatawe sanang tutu atei Kelep sana tau tarawang te. Sasar tahi Sabaru mimbit Kelep tarawang sasar gantung nangkalau kare hunjun kayu tarus kangambu kanih sasar kurik ampin pulau kayu sampai sama kilau uru. Kanatek ewen te marujuk baun andau hong ngambu kanih mawi Kelep mikeh metuh nanture akan penda je minyit ewen due hong ngambu jari.

"Kayah nger! Rawan angatkuh nger lalau kagantung! Hayak balasut sampai handak bakehu angat bitikuh" kuan Kelep dengan Sabaru te.

"Tenang ih nger! Masih mangat panjalanan itah kue toh bara je kilau male nah" kuan Sabaru denga.

"Parandah isut nger lalau rawan angatkuh kutuh" kua dengan Sabaru.

"Mangat jeleng sampai kue nah harus gantung nah nger mangat jatunti je mangampeng kue" kuan Sabaru, metuh te sabaru palaju tarawang salenga mawi Kelep je into likut tambalang bara eka bajatu akan penda.

"Kayah nger! Matei aku toh! Dohop aku nger!" Kombak Kelep je nampiring jatu akan penda.

Sabaru je puna sangaja panjatu Kelep te awie ie bisau dengan Kelep je male diya marima taluh je kuan Sabaru te, ie tatap tarawang diya tahu-tahu dengan Kelep hindai. Kelep je nampiring jatu te pas akan pulau Uwei duruh kelep te. Uwei je are duhi balalu manyangkawit ikuh Kelep te balalu mawi Kelep kuak-kuak into hete. Takuluk akan penda para akan hunjun, Kelep balalu guyang-gayung melai uwei te. Karas angat Kelep handak malapas arep bara hete baya puna diya olih lapas kea bara hete ie ayun-ayun ih into hete diya olih malapas arep. Matuh kanjera ie guyang-gayung malapas arep te sana tege ije kubgan Bakei nanture Kelep te, ie balalu manalih kelep tuntang hamauh.

"Oh nger! Narai gawim je kilau kukau ampi nger?!" Kuan Bakei maningak Kelep te.

"Ela lalau habut nger! Aku lagih kanjera batuyang, tuyang ayun mamakuh maharaja toh nah" kuan Kelep sambil ayun-ayun ie mawi arep.

"Tutu nah nger?" Kuan Bakei sambil nanture Kelep te.

"Haw! Akan naraiku nanjaru ikau nah nger!" Kuan Kele sambil ayun-ayun mawi arep.

"Tau aku mancoba kealah nger?" Kuan Bakei denga hindai awie puna mangat ampi Kelep batuyang hete.

"Ela nger! Habut mamakuh maharaja kareh amun katawa. Lapah aku kana hukum gawi awie manyuhu oloh mahapan paramu ai'e toh" kuan Kelep dengan Bakei te.

Mahining je kalute Bakei balalu rahas dengan Kelep te, balalu ie manalih Kelep te tuntang lapas ikuh Kelep je sangkut duhi Uwei te. Kelep balalu jakah kejau-kejau tuntang ie balalu mangawit ikuh into duhi Uwei te hindai nangkiri Kelep endau. Sana pajuk duhi Uwei te Bakei te balalu pitip-patap kapehean, ela je handak batuyang lagih pajuk duhi Uwei usang jari kapehen narai jari. Bakei mangkeme kana tipu awie Kelep te balalu tambah karahas dengan kelep te hindai.

"Kareh ikau keme amun supah lepah parutek palumatkuh karongkongmuh kau Lep!" Kuan Bakei ngarunum sangit tutu jari dengan Kelep.

Limbah jari balapas ikuh bara duhi Uwei te Bakei balalu mananjung manggau Kelep je jakah endau. Kelep je jari kana jakah endau katawa kasala kajeng-kisu karamak-karaus ie hadari mangejau bara hete. Pire atie kalaju Kelep masih laju Bakei je bara Kelep, metuh kelep mananjung te Kelep pahuru dengan sarangan Lalawah Petak ie balalu munduk tukep hete manyarenan angat kare kaheka. Diya lalau tahi ie munduk hete sana dumah Bakei je endau hindai akan hete.

"Toh ie ikau! Sinde toh ikau keme aku mampatei ikau! Je mananjaru aku endau" Kuan Bakei manalih Kelep te.

"Haw nger! Narai mawi ikau nger?" Kuan Kelep kilau oloh je diya katawan taluh ije.

"Ela ikau handak nanjaru aku hindai! Ikau toh Kelep je jari handak mampatei aku endau. Je bakuak melai into duhin Uwei nah!" Kuan Bakei dengan Kelep te.

"Haw... ela barangai sewut kute nger melai penda andau toh diya ie kabuatkuh bewei Kelep" kuan Kelep dengan Bakei te.

"Haw... tutu kea kuam te nger! Aku awie lalau kasangitkuh nah. Narai awim hetoh nger?" Kuan Bakei denga hindai.

"Aku melai hetoh nah nger lagih manunggu garantung ayun mamakuh maharaja nyuhu mahaga, bara endate aku jatunti tindar kanih kate, kilen ampie ikau manyewut aku je handak mampatei ikau" kuan Kelep te tumbah.

"Yekah nger! Kapasim ikau nger! Kilen ampi kuam amun aku ih hindai nangkiri ikau mahaga garantung toh nger?" Kuan Bakei denga hindai.

"Ela nger! Kareh tau catokmuh garantung toh hining maharaja habut ie dengankuh tau kana hukum aku awie nger" kuan Kelep dengan Bakei te.

"Ikau sama kilau diya percaya dengangkuh nger! Aku toh nah masi tutu dengan nah nger hatuh aku ih nangkiri ikau hindai" kuan Bakei mucuk Kelep te sambil lenge nekap Kelep te tuntang Jakah akan parak ruwut.

"Aduh... nger! Ela nger! Ela ikau mancatok garantung jikau nger matei aku hukum maharaja sinde toh" kuan Kelep sambil mananjung mangejau bara hete.

Bakei je mahining jite diya tumbah narai-narai ie munduk melai tukep sarangan Handawa Petak te. Kelep kajeng-kisu malihi hete, diya lalau kejau Kelep mananjung te ie mahining tambawai Bakei kariak-kalaluk auh kapehean pasti ie mancatok sarangan Tabuan te jari. Tuntang ie pasti jari kana pepet awie kawan Tabuan te awie kamameh kabuat. Metuh Kelep manjung te sana supa dengan ije kungan Panganen je lagih batiruh, biti ngaliker bahalap ampin warna upak Panganen te. Rangkah-rangkah Kelep manukep Panganen te balalu munduk marene parati arep tukep Panganen te.

Bakei je jari bau lepah kembang muaw hayak kombak-kikuk sama oloh gila ie mawi arep. Sinde toh ie puna tutu sangit dengan Kelep jari, bara kejau ie nampayah Kelep je munduk manure.

"Oh nger! Buhen mawi ikau kukau nger?" Kuan Kelep helo-helo manngak Bakei te.

"Ela ikau pura-pura due kali toh ikau jari nanjaru aku nger, gitam ampie aku toh" kuan Bakei sambil maninjuk akan bau je kembang-muaw te.

"Kayah kapasim nger!! Buhen mawi ikau nger?" Kuan Kelep masi nanture ampi Kelep.

"Ela ikau pura-pura kilau diya tawa taluh gawim toh. Pateikuh ikeu sinde toh" kuan Kelep

"Sabar nger! Diya ie kabuatkuh Kelep je tege hong penda andau toh. Bara hanjewu endau aku jatunti tindar bara hetoh, aku manunggu panding ayun maharaja toh, ie mikeh tege oloh mandua ai'e" kuan Kelep dengan Bekei te.

"Asal ikau ela mananjaru aku ih kareh aku munduk nangkiri ikau manunggu panding toh" kuan Bakei dengan ewen.

"Ela! Kareh amun katawan mamakuh hukum matei aku awie, gawi manyuhu oloh beken manjaga paramu" kuan Kelep denga.

Mahining kute Bakei balalu dumah kasingi tuntang nekap Kelep te balalu jakah kejau-kejau sampai bajatu akan sungei je tukep hete. Kelep balalu nanture tege ije kungan Baja'i je lagih bakekei hong into saran sungei te. Rangkah-rangkah Kelep manukep Baja'i te diya lalau kejau Kelep munduk tukep ikuh Baja'i te.

Bakei je nangkiri Kelep enah, sambil mamasut kupak Panganen te.

"Kayah kahalap panding jituh, renteng-renteng ampin warna" kuan Bakei sambil mamasut Panganen jite.

Ikuh Panganen te balalu kuling awie Bakei into kahang. Mangkeme bitie tege je manguet Panganen te balalu rangkah-rangkah misik nanture tege Bakei je busik ikuh ayue. Sana katawa Bakei je mangaraen tiruh balalu ancap ie manguling bitie gancang-gancang malilit biti Bakei te. Mangkeme bitie je hapit awie panding te Bakei te pitip-patap malapas arep bara kulingan Panganen te. Tangkariak-kalaluk Bakei te sulak hining sasar tahi sasar benyem tangkariak Bakei te. Bitie-bereng lepah angat hancur sampai takahit tapani Bakei te nyarenan angat kulingan Panganen te denga. Palepah belai ie mangirut ikuh Panganen te je mawi Panganen te mampalemu lilitan tuntang Bakei te selamat bara pampatei te. Ie mananjung purung-parang sama kilau oloh babusau mihup lepah angat kare uhat tulang pehe uras awie Panganen te. Angat kasangit dengan Kelep puna jari sampai into kalaguet amun tege supa dengan Kelep puna nenga salamat kambe diya kare salamat belom hindai.

Telo kali jari Kelep mampahumung ie awie te nah pantas ih amun Kelep te patei akae amun supa kareh. Haru bapuluh depe Bakei te mananjung ie balalu supa hindai dengan Kelep te je kanjera munduk melai saran sungei te tiruh-tiruh ampi mawi arep kilau oloh mangantuk. Rangkah-rangkah Bakei manukep Kelep te. Marak angat kasangit ie manukep Kelep te sana ie tukep Kelep pura-pura tarewen mawi arep. Kelep balalu misek hindai narai kasala. Bakei tumbah marak kasangit sambil manekap Kelep te.

"Ela pura-pura ikau! Jari telo kali toh ikau handak mampatei aku tarus. Sampai handak mahutus angatkuh awie Panganen jite endau" kuan Bakei marak kasangit dengan Kelep te.

"Sabar helo nger! Ikau yakinlah jari angat amun aku toh Kelep je mawi ikau kalute?" Kuan Kelep sambil sirut-sirut ie manangis.

" jatun atie ih kelep je tege tukep hetoh amun beken bara ikau ih!" Kuan Bakei te dengan Kelep.

"Ela kute nger! Aku diya ie kabuatkuh ware kawalkuh je beken je sama tampa dengangkuh. Aku jari malei hetoh bara endate jatunti kanih-kate awie nyuhu maharaja aku manunggu jukung ayue toh. Awie te nah hampea aku supa dengam nger!" Kuan Kelep manjelas akae.

"Owh... yekah! Are ampun maaf ih arae te nger! Baya taulah aku minjam jukung jituh nger hapakuh akan dipahsilan nger?" Kuan Bakei dengan Kelep te hayak balalu lekak Kelep te akan petak hindai.

"Are ampun maaf ih nger aku toh diya bahanyi nyahaman ikau, awie amun sampai katawan Maharaja kareh aku tau kana hukum patei awie nger" kuan Kelep denga.

Mahining je kute Bakei balalu mancepak akae Kelep te akan sungei. Kelep balalu lembut hindai sambil mangejau nanture Bakei je lumpat akan hunjun likut Baja'i te. Mangkeme tege taluh je lumpat melai likut, Baja'i balalu mangayar muhun akan danum. Sanang tutu angat Bakei ie ngangkira jukung te handak mimbit ie akan dipahsilan sungei te. Sana sampai hong eka labehu Baja'i te balalu maneser mampaleteng arep. Mangkeme je kute ancap Bakei hanangui akan sare tapi lambat Baja'i jari manyambar ie hindai tuntang mampateser Bakei te akan penda danum.

Sakurang Baja'i salabih Danum je mampacapat pampatei Bakei je mameh te. Nanture kute lembut angat kanyasal Kelep dengang taluh gawi te. Ie mangkeme badosa awie gawi te je balalu Bakei matei kinan awie Baja'i. Awie angat kanyasal Kelep balalu buli akan rombak ie manyahukan arep marima ampin kare dosa tuntang kasala.

Pengalama hong tamuei te akan pelajaran je barega hong pabelom ayue. Ie bajanji hong atei ie diya nangkuli taluh gawi kilau te hindai sampai wayah Kelep te matei kea.

Kutelah Pahari sarita Kelep Manamuei toh. Atei je papa baya mimbit arep akan celaka tuntang bahaya, kilau Bakei hong sarita je basingi dengan Kelep te.

Inyarita Awie: Sansana Sarita