Hong ije katika metuh huran belom ije biti oloh bakas rambut jadi huan kasinga jadi tisa isut. Hong ije andau tege ije biti esu je kanjera kadungil misek bue je jadi bakas te.
"Bue, pire umur muh wayah toh jadi?" Kua misek bue je bakas ongko te.
"haru epat nyelo ih nah su" kuan bue denga.
"Ah... jadi ngalilu hindai toh" kuan esu denga sambil dari-daria bangang mikeh bue mawi iye tapi bue dia basingi malah tatawe haream mamparahan kasinga je jadi lepah te.
"Ikau masih hindai mangerti alu umurku wayah toh jadi tukep jalatien puluh epat nyelo, tapi katahin jalatien puluh nyelo toh aku belom hong kalunen jatunti baguna. Katahin epat nyelo toh aku sadar arti belom hong kalunen toh je sabujur tuntang aku bahagia belom katahin epat nyelo toh" kuan bue mamader akan esu je haru umur lime belas nyelo te jadi tege pemahaman balalu mandam mahining kuan bue je kalute sabab mawi iye mayewut umur haru epat nyelo.
KALUNEN ALU IYE BELOM HONG UMUR JE PANJANG, TAPI BAYA HONG KEHAMPAAN JATUNTI ARTI, KILAU BUE JE JADI BAUMUR JALATIEN PULUH EPAT NYELO TE TAPI EPAT NYELO IH JE KAMEA BAHAGIA JALATIEN PULUH NYELO TE HONG KEHAMPAAN URAS.
Hanjewu te bue mangali petak eka mimbul bawak bua Dahuyan melai hong baun huma Betang, dumah hindai ije esu je haru buli kuliah melai Palangka Raya mamander bue te.
"Kanduem kea mimbul kare bawak bua ikau jadi bakas kea keleh ikau munduk santai melai huma ih, amun bue sampet kea kareh kuman kare bua Dahuyan kau" kuan esu manasehat bue te, bue puna oloh je sabar rajin hureh dengan kare anak esu mawi ewen te rajin kea mureh iye, tapi biar kute anak esu uras hormat denga.
Bue tende nanture esu je haru dumah hanjewu te bara Palangka Raya sambil mampuas ebes gawi mangali petak eka mimbul bawak Dahuyan te.
"Esukuh je cantik jelita kuan indu bapae, ikau masih hindai paham arti belom hong kalunen toh sabujur. Aku mimbul bawak Dahuyan melai hetuh dia kare akangkuh bewei, tapi akan ketun je tabela anak esuku tuntang kare tunda kula je beken amun maja. Ketun je tabela kau tau munduk santai dengan pacar sambil nunggu duruh bua Dahuyan toh jeha" kuan bue sambil tatawe nanture esu je hindai sampai masih jalan pikiran akan hete.
"Bue tau tutu dengan ikey, makasih bue. Maksudkuh andau jadi balasut itah buli akan huma ih tege panginan imbitku bara Palangka Raya akan bue" kuan esu setengah mucuk bue mangat malihi gawi te gawi andau jadi sasar balasu.
"Iyoh, aku gin puna umbet kea toh" kuan bue denga balalu akan batang misut pai lenge.
OLOH BAKAS MIMBUL JE TABELA BAYA MANDUAN HASIL ATAU JE BAKAS MARINTIS JALAN JE TABELA BAYA MAHURU. BELOM JE PALING BAMAKNA UMBA MAMIKIR AKAN NASIB GENERASI RAHIAN. ALU BAYA DIA PIRE NYELO TAPI TEGE NILAI JE KEKAL BARA KARE GAWI TE.
Lime belas nyelo limbah te puna tutu je kuan bue te huran, wayah toh anak esu buyut rami amun jadi wayah bua te rami. Bua je imbul bue metuh hong kabakas te are macam tege Rambutan, Asem, Dahuyan, Enyuh sukup ampi kabun te laka kaliling huma hai je panjang te. Baya bue te bapeteh sahelo malihi " petak danum ayue te ela anak esu cicit buyut bajual, eweh je bahanyi bajual baka kicas dia baumur panjang" kutelah sapa je je jadi balua, anak esu dia bahanyi malanggar hayak ewen uras mangat kea dia atie lalau susah dia kea je lalau tatau.
Inyarita Awie: Sansana Sarita
0 Pendapat:
Posting Komentar
Dohop Nulis Komentar Hapa Kutak Itah.
Tarima Kasih.