ege ije kungan pusa je naksir dengan pangeran raja. Pusa te sadar bahwa iye te metu dia mungkin tau kawin dengan pangeran raja mawi iye pusang kabuat dengan perasaan cinta je dia olih nyampai. Genep andau pusa jite jungun marima perasaan cinta je hai dengan pangeran raja te. Baminggu-mingu baganti bulan pusa te sasar pusang marima perasaan je tege hoang atei je jadi bauhat bakambang baya jatunti eweu harum je akan kasanang. Kilenkah huang ije andau metuh pusa te mandam kabuat melai taman istana pangeran raja, dumah ije kungan burung Cuwit tingkep melai pating kambang darah iye. Kajuk-kajuk ih cuwit jite nah handak mureh pusa jite maksud ayue, tapi pusa ije jite dia tatarik nanture gin dia mippen dengan cuwit je kurik jite. Nampayah je kute cuwit jite jadi penasaran dengan pusa jite narai je mawi iye je dia handak bangang denga, ye balalu hamauh burung cuwit jite dengan pusa.
"Oh nger, habankah ikau?" Kuan cuwit maningak iye bara edan kambang.
"Narai urusam kea handak katawan aku?" Kuan pusa tumbah jatunti kare tampaliau nampayah cuwit te.
"Amun tege masalah nah nger mander ih, mikeh aku tau mandohop ikau" kuan cuwit te bilik balingau nantuani pusa jite.
"Narai kataum kea je handak mandohop aku?" Kuan pusa misek cuwit jite.
"Ware ih kataungkuh nger, je pasti tau tarawang helo laju bara ikau je hadari" kuan Cuwit sambil mureh pusa jite.
"Masih hindai tau mandohop aku amun masih baya kalute ih kataun ayum" auh pusa te dengan burung cuwit.
"Masalah narai helo je mawi ikau nger?" Kuan cuwit baruwek misek pusa.
"Rahasia!" Kuan pusa tumbah.
"Jatun nger amun je rahasia kilau kuam kau masalah je taluh jatun ih, nanjarum arti te. Ela patuh nanjaru nger, nanjaru jite nah badosa" kuan cuwit denga.
"Eweh nanjaru ikau kau ih je lantih" kuan pusa bara penda upun kambang te denga.
"Pea kare aku lantih nger?" Kuan cuwit dengan pusa jite.
"Ampim kau dia lantihlah ara handak katawan rahasia ayungkuh ih" kuan pusa denga.
"Dia iye rahasia ara nah nger amun jatunti oloh beken je katawa, je ara rahasia nah harus tege oloh beken katawa sadia ije hoang dunia toh" kuan cuwit dengan pusa.
"Kutelah nger?" Kuang pusa hindai.
"Iyoh nger, memang rahasia ayum te akan eweh jadi andermuh nger?" Cuwit misek hindai denga.
"Jatun ih lagi nger" kuan pusa te pusang marima masalah kabuat jadi.
"Amun jatun kuam jatunti masalah ih ara keleh kue bangang ih nger" kuan cuwit mikir kabangang ayue.
"Jia aku nger lagi tege je nunggukuh melai hetuh" kuan pusa denga.
"Nunggu balawaukah ikau nger?" Kuan cuwit denga hindai.
"Jia nger" kua.
"Nunggu pacarmu?" Kuan misek hindai.
"Iyoh"
"Je kueh pacarmuh nger je baputi nah atau je babilem atau je babelang nah?" Kuan cuwit mangkira pusa je kueh je nunggu te.
"Dia nger uras beken" kuan pusa tumbah denga.
"Amun je uras beken je kueh ih iye?" Kuan cuwit.
"Rahasia nger" kuan pusa.
"Rahasia tarus tarus ayum nger dia rami je kukau nger" kuan cuwit denga hindai.
"Biar ih dia rami akam nger akangkuh nah rami tutu" kuan pusa dia maku kalah dengan cuwit jite.
"Rami narai je rahasia ayum je dia ati oloh katawa, dia iye rahasia ara jikau kamameh ih" kuan cuwit manggau karahas pusa jite denga.
"Leha nger katulas muh nyewut aku mameh" kuan pusa denga hindai.
"Dia kare tulas ara jite nah nger tanda gawi aku tau dengam nah sampai nyewutkuh ikau mameh" kuan cuwit denga hindai.
"Dia ngerti aku dengam jadi nyewut muh aku mameh maka gawi ikau tau hindai kuam dengangkuh, jaka ikau tau nah dohop aku toh" kuan pusa mengeluh jadi lepah pikir.
"Nampi aku handak mandohop ikau masalah ayum je uras rahasia kuam jadi?" Kuan cuwit denga hindai, mawi pusa jite bapikir hindai mahining kuan cuwit te.
"Tapi nger ela ikau lantih mangesah akan oloh bekenlah?" Kuan pusa jite denga hindai.
"Ikau supa kare bawau bahut jatun kare aku ngesah akan oloh are" kuan cuwit je bingung manebak masalah pusa.
"Je balawau puna pangianan ayungkuh nah nger biar ikau malapor akan maharaja kanih nantawe ih ikau, ikau puna tau kea marapus aku ngerlah" kuan pusa te denga hindai.
"Dia kare handak marapus nger mikeh ikau kurang percaya ih dengangkuh, akan naraikuh kea nahiu rahasia ayum nger" kuan cuwit denga hindai.
"Iyoh percaya ih aku dengam nger itah kue puna rancak hature melai hetuh jadi" kuan pusa te denga.
"Yete, ander ih akangkuh nger" kuan cuwit dengan pusa jite.
"Bujur nger ikau handak tawa?" Kuan pusa misek cuwit hindai.
"Iyoh nger" kuan cuwit denga.
"Amun kute ikau mohon tukep aku hetuh mikeh hining oloh beken amun kue pander bara kejau" kuan pusa dengan cuwit jite.
"Silum kau nger... taring muh kau nger... mikeh aku ikau handak kuman aku ih toh?" Kuan cuwit denga hindai.
"Amun ikau je dia percaya dengangkuh jadi nampi aku tau percaya dengam nger?" Kuan pusa denga hindai.
"Tapi ikau ela mawi akulah nger?" Kuan cuwit hindai dengan pusa jite.
"Dia" kuan pusa te tumbah.
"Ela kea sana limbah ikau mander rahasiamuh balalu pateimuh aku dia iye rahasia ara je kalute nger gawi oloh je katawan rahasia ayum jadi pateimuh" kuan cuwit denga hindai.
"Iyoh dia ancap akan hetuh ih ikau hining rahasiakuh nger" kuan pusa denga.
"Iyoh nger" kuan cuwit balalu muhun bara edan kambang manalih pusa jite.
"Narai nger?" Kuan cuwit hindai.
"Hining oloh kareh je bara hekau tukep hetuh" kuan pusa denga.
"Iyoh nger" kuan cuwit je jadi penasaran akhir pasrah ih naharep pusa je kemungkinan tau manganan umur jite.
Sana tukep pusa te balalu habisik dengan cuwit te mangesah rahasia. Cuwit umbet manunggak kuluk umbet manggeleng kuluk.
"Sutil ih masalah jikau nah nger mangat ih" kuan cuwit hamauh denga.
"Kilen ampi cara kuam je sutil nger?" Kuan pusa jite denga.
"Aku puji nger supa dengan oloh sakti nger belom hoang parak kayu iye pasti tau mandohop ikau" kuan cuwit denga.
"Tutu nger je kuam kau?" Kuan pusa hindai.
"Coba ih ikau nuntut aku toh amun angat kurang percaya dengangkuh" kuan cuwit denga hindai.
"Yo ih ara amun kuam je kukau nger" kuan pusa te.
Ye ewen due tulak manalih oloh je sakti kuan cuwit dengan pusa nah. Cuwit sambil tarawang laka edan kayu pusa sambil hadari melai petak manyasah cuwit jite.
"Kilen kakeju nger?" Kuan pusa te misek denga.
"Tukep ih nah nger aku bahut nah ije puntung andau sampai eka oloh te" kuan cuwit je mahitung waktu manumun kalaju tarawang jelas hakabekan dengan kalaju pusa hadari.
Ewen due manguan jalanan sampai ije puntung andau te jatunti kare sampai masih, penasaran angat pusa toh dengan cuwit jite.
"Kilen nger jadi bentuk andau toh kue masih hindai kuam?" Kuan pusa denga hindai.
"Are ampun maaf nger aku dia bingat ikau je rangkah hadari melai petak aku bahut tarawang laju nah nger. Mungkin tau alem kareh kue sampai eka te itah kue tende istirahat ih helu nger" kuan cuwit denga.
"Asal ela ikau nanjaru aku ih nger barangai ih aku hamalemkah hanjewukah kue sampai" kuan pusa te denga hindai.
Manduan singkat sarita pusa dengan burung cuwit jite sampai hanjewu andau haru tende melai ije baun pasah melai into bentuk parak kayu.
"Hetoh eka oloh je sakti te nah nger" kuan cuwit balalu tarawang akan batunggang pasah te.
"Tege narai wit ikau sampai akan hetoh" kuan oloh bara hoang huma te maningak burung te.
"Tege kawalkuh bue asi-asi tutu iye handak laku dohop dengan bue" kuan cuwit te dengan oloh bakas je melai huma te.
"Narai auh kasusah te nah wit?" Kuan oloh bakas je hajanggut baputi sampai kanai.
"Anu bue kawalku toh handak dengan pangeran raja baya gawi hakabeken pambelum kutuh mawi dia tau, jadi ikey dumah akan hetuh handak laku dohop dengan bue je sakti toh" kuan cuwit dengan oloh bakas te.
"Leha kapasi auh nah, kilen ampin itah mandohop iye?" Kuan oloh bakas te hindai.
"En bue taulah mubah kawalkuh pusa toh mangat tau jadi kalunen bawi je bahalap" kuan cuwit hindai mawi oloh bakas te bapikir sambil nampayah pusa je bitep-bitep denga te gawi dia kasene narai je mander burung cuwit dengan oloh bakas jite.
"Mander aka tau ih aku manyaluh iye jadi oloh bawi je bahalap baya ije pantanga iye sumur belom dia tau kuman balawau hindai amun iye sampai kuman balawau iye haluli jadi pusa hindai" kuan oloh bakas te ye balalu ngutak gawi cuwit te akan pusa te hindai.
"Iyoh nger aku sanggup ih terai kuman balawau hindai" kuan pusa te balalu ander cuwit akan oloh bakas te kasanggup pusa te.
Mahining jadi je kute oloh bakas te balalu nyadia paramu hapa manyaluh pusa te mangat jadi oloh bawi bahalap tuntang akan sawan pangeran raja. Dengan doa tuntang ilalus gawi Hatalla pusa basaluh jadi oloh bawi je bakena hayak ampin pupus baputi bahenda. Hatue je kueh je dia mippen nampayah oloh bawi je hagining malisen bau mata, urung mancung biwih bahandang mata hamancar kilau intan, sampaga bulan dengan matan andau je manyilau.
"Hoang kueh aku?" Kuan pusa misik bara tiruh.
"Melai huma buekuh" kuan cuwit denga.
"Kilen je aku je sampai nger?" Kua dia bingat narai gawi.
Ye jelas gawi cuwit te hindai akae mangat iye bingat hindai narai sabab jituh jite tuntang pantangan iye ela kuman balawau hindai.
"Iyoh haru aku bingat hindai jadi" kuan pusa te dengan.
"gawi ikau jadi basaluh hoang kalunen maka aram terai baputi babilem hindai, nampara bara andau toh aku manenga akam aran 'putri bulan taharu dengan matan andau' " kuan oloh bakas je mandohop manyaluh iye te.
"Are terima kasih bue jadi mandohop aku, aku metuh toh dia olihkuh nenga bue narai-narai baya amun aku palus kawin dengan pangeran raja kareh aku mimbit bue akan istana jadi penasehatkuh kare panatau tau ih aku bagi akan bue" kuan putri bulan taharu dangan matan andau.
"Dusah ih aku mandohop ikhlas baya ikau bingat pantangan ayum ih hayak dusah ikau manggau aku akan hetuh hindai gawi aku pindah bara hetuh" kuan oloh bakas te denga.
Hoang istana raja tege sayembara akan manggau calon sawan pangeran raja je jadi sadang kabujang masawe. Rami kare bawi anak menteri kare bangsawan je umba mandaftar jadi sawan pangeran raja je bakena balinga hayak bajenta jite. Uras kumpul hapa pakaian je mewah rantai amas babatu intan hasil ewen oloh bakas korupsi masang akan anak mangat manambah daya pikat akan pangeran, kute kea kare kaji lampah sampaga tuntang kare minyak karuhei uras hapan mangat olih supa atei pangeran raja. Persaingan je ketat jite jatunti tame pikiran pangeran raja sampai kalute kare oloh bawi je baminat akan sawa.
"Bingung aku je kueh je duangkuh" kuan pangeran hamauh dengan bapa je umba nampayah anak manggau sawa te.
"Intih babuah ih ela ikau main-main dengan oloh bawi" kuan bapa sambil maningak iye.
"Memang taulah amun aku manduan ewen palepah pa?" Kuan pangeran sambil mananjung hamauh dengan bapa.
"Jite ara serakah nak dia bahalap akan itah je serakah te gawi jite tau mahancur kerajaan itah" kuan bapa hindai denga. "Amun je mampahayak belai nah nak bilak je hapus Petak Danum toh handak uras angat arep tempu" sambung bapa tinai.
"Nafsu kuda tenaga pusa" kuan putri bulan taharu dengan matan andau hamauh kurik-kurik tapi puna hining gawi pangeran raja je tukep denga.
"Eweh aram ikau ndi?" Kuan pangeran raja manalih iye balalu manjuluk lenge.
"Akukah?" Kuan putri bulan tarewen pea dia bahut metuh jadi pusa melai istana rancak ih gawi ngarunum kute jatunti je tahu-tahu.
"Iyoh ikau eweh aram?" Kuan pangeran raja.
"Arangkuh putri bulan taharu dengan matan andau" kuan putri bulan je balalu tabe dengan pangeran raja te, haru bingat bahwa iye jadi basaluh akan kalunen.
"Kayah kalahalap auh aram ndi, intu kueh ikau melai?" Pisek pangeran hindai je masih hindai malapas lenge ewen due.
"Aku oloh kejau nah ka sasat tanjungkuh sana sampai kerajaan ayum hetuh jadi aku coba-coba ih umba mendeng hetuh kea" kuan putri bulan hawen-hawen dengan pangeran te.
"Tapi ikau hakunlah amun aku manduan ikau akan sawangkuh ndi?" Kuan pangeran denga gawi mahining je coba-coba kuan putri bulan endau. Padahal putri bulan hamauh kute gawi manumun peteh bara oloh bakas je manyaluh iye jadi kalunen.
"Amun kaka tutu-tutu handak dengangkuh aku handak kea dengan kaka" kuan putri bulan. "padahal bara metuh jadi metu sampai jadi kalunen aku cinta dengam" kua hamauh hoang atei.
"Iyoh aku puna tutu-tutu handak manduan andi akan sawangkuh" kuan pangeran raja mantap hamauh, mawi putri bulan handak tutu angat mamangkut pangeran raja hete-hete tapi gawi bingat hindai keadaan bahwa iye jadi kalunen dia metu pusa hindai paksa manguat atei.
"Bujurkah ka? En kaka dia handak nampayah bawi je beken helu mikeh manyasal amun baya tanjung kaka sampai latuh masih are hindai bawi beken likut kanih" kuan putri bulan manumun peteh bara oloh bakas je jadi.
"Tutu kea kuam ndi baya ikau nandakuh helu" kuan pangeran raja manenga ije topi akan takuluk putri bulan. "Ela ikau tindar kanih kate bara hetuh aku pasti akan hetuh hindai" kuan pangeran raja denga.
"Andi manunggu janji kaka melai hetuh ih" kuan putri bulan mananggapi auh pangeran raja.
"Kaka akan kanih baya manyukup tanjung ih ndi" kuan pangeran raja malihi putri bulan te.
Hanjewu te Langit balawa barasih manarang petak danum. Pesta pangawin pangeran raja dengan putri bulan taharu dangan matan andau ilalus melai istana te. Acara je mewah marawei sampai akan kerajaan sansila uras dumah manumun andau undangan. Pangeran raja dengan putri bulan taharu dengan matan andau munduk basanding melai pelaminan. Jatunti halangan narai-narai sampai uras undangan buli lepah, uras manumun kanahuang kilau rencana. Kute kea hoang rumah tangga ewen due je bahagia kea kilau hoang doa tuntang hajat ewen due kea.
Minggu baganti minggu bulan baganti bulan, pangeran raja tambah cinta dengan putri bulan taharu dengan matan andau te. Putri bulan te di eleh cantik tapi hayak harati iye tau umba isut-isut urusan negara je mawi kerajaan ewen sasar jaya gawi petunjuk je nenga akan kabali hoang manggawi tugas kerajaan te.
Hoang ije bentuk andau katika ulang tahun je due nyelo pangawin ewen due, tapi masih jatun anak. Ewen due munduk maraya baduean ih melai eka istirahat ewen raja. Kilenkah pas kanjera tiruh-tiruh dumah ije kungan balawau baseput gayar-gayar rangkah.
"Ceh balawau jikau narai gawi hekau" kuan putri bulan hoang atei giri-giri angat dengan metu jite. Harak balawau jite mangat mangejau, sanunuh kea balawu jite hadari rangkah.
Dia tahi mules hindai balawau jite nangkenya iye hindai singut-singut, mawi putri bulan giri-giri angat handak manyupek.
"Buhen mawi ikau ndi habankah?" Kuan pangeran raja nanture kabali je hagenjeh maka andau balasut.
"Tawa buhenkah aku" kua balalu manyantah biti akan kabali.
"Istirahat ih ikau helu mikeh ikau kahekaan gawi umba aku sur-ser tarus" kuan kabali denga.
"Tau herah kuan kaka te aku kahekaan" kua tumbah kabali.
Haluli iye coba batiruh tapi puna dia tau batiruh, mahi tege balawau jite nangkenya iye hindai gayar-gayar melai laseh tukep denga. Tahi iye nantuani balawau jite puna manis menyak tutu ampi balawau te sampai dia sadar iweh mahasur nanture balawau jite. Sasar iye nyarenan belai sasar are iweh balua mippen tahi dia kuman balawau jadi. Sinde iye coba handak manekap balawau jite hapa lenge rangkah-rangkah manggutil ih maksud putri bulan te tapi hila gawi balawau te lapas.
"Hau balinek ampi ih metu jituh hinya" kua ngarunum kabuat balalu siap-siap handak nangkarap balawau jite hindai, pas metuh te kabali tame akan kamar hindai.
"Narai gawim ndi?" Kuan kabali denga.
"Tege balawau nah ka dia maku hadari iye bara kamar toh" kuan putri bulan denga je balalu balang handak nangkarap balawau gawi buhau tege bana hete.
"Puna kawal itah ulun kalunen ela ikau mawi arepmuh kilau pusa handak nangkarap kea" kuan bana mureh iye.
"Ah... kaka tau tutu mureh andi wayah toh" kuan putri bulan je haru sadar dengan keadaan.
Kutelah genep andau alem tege tarus balawau nangkenya iye, dia iye laka istana eka bagawi balawau tarus tege nangkenya iye bahkan rancak kuman kare panginan ayue jadi.
Kilenkah hoang ije andau metuh ewen kumpul melai istana balawau jite dumah hindai nangkenya iye. Gawi mangkeme rise hayak puna mippen kea putri bulan hilap balalu nangkarap balawau jite. Oloh are uras tarewen gawi te tuntang kabali tarewen kea, hindai lepah katarewen oloh are putri bulan salenga basaluh jadi pusa hindai. Oloh are uras geger nampayah jite putri bulan je terkenal cantik bakena hasaluh jadi pusa gawi mangkarap balawau.
Sifat je asal puna dia tau ubah, alui kilen ampi manyaluh arep, je pusa tatap pusa ih watak ayue. Balawau jite iyete jelmaan bara oloh bakas je sakti jite sengaja manguji pusa jite. Pusa jite akhir duan gawi pangeran raja ih akan jaga istana bara kare balawau hindai.
Kutelah kesah Putri Bulan Taharu Dengan Matan Andau, gawi kurang iman maka iye talanggar pantang je meteh gawi oloh bakas te sehingga iye haluli basaluh hindai jadi pusa je pantas kuman balawau. Belai je mimbit akan kasasat je mawi iye hilap sampai nangkarap ije kungan balawau.
Iyarita Awie: Sansana Sarita
0 Pendapat:
Posting Komentar
Dohop Nulis Komentar Hapa Kutak Itah.
Tarima Kasih.